Мордовиянь Оцюнясь корхнесь школьникнень-активисттнень мархта, содафтсь синь творческяй и научно-образовательнай проектснон мархта. Стане жа региононь руководительсь ванозе «Фалу ульхть анок!» выставкать, конань пуроптозе республиканскяй архивсь.
Пионерияти тевонь поладыкс тяниень пингть ащи Школьниконь российскяй движениясь, кона водендазень эсь ёткозонза странань сембе региоттнень эзда фкя мяльс кирдихнень.
Шабатнень приветствондамста Мордовиянь Оцюнясь азондсь эсь пионерскяй ётай пингонц колга. «Мзярда минь арнеме пионерскяй лагерьхненди, фалу улеме заняфт: виияфнеськ пря уеньконь, кяденьконь, мушендоме ялгат, - азозе сон. – Мон тячивок кирнян соткст пионерскяй ялганень мархта. Ванфтость тя пингть, тя ялгаксшить».
Шабатненди ульсь кода максомс кизефкст спикерхненди. Сембода лама кизефнезь Мордовиянь Оцюнять. Кизефксне сотфтольхть ламоц ширетнень мархта: аквапаркть и художественнай гимнастикань центрать строямаснон, предпринимательскяй сообществать мархта марстонь работать, личнай пионерскяй опытть мархта. Артём Здунов азондозе, што сонь пингстонза ульсь пяк почётна арамс пионеркс, и кда киньге ашезь примсе васенцеда тяряфтомста, тя кошарязень шабатнень арьсемс эсь прянь вятемаснон колга и полафтомс сонь.
Тиемок итокт васедемати, Мордовиянь Оцюнясь макссь школьникненди совет, кода сатомс сатфкст. «Кда тинь тонаттада пуроптома команда, работамс марса, эста теенть сяда тов ули вийс коре вятемс любой коллективть и пяшкотькшнемс путф задачатнень», - мярьгсь Артём Здунов.
Мероприятиять шумордамста ванфоль «Артек. Большое путешествие» од художественнай фильмась.
Мордовия Республикань Оцюнять пресс-службац