Коронавирусть коряс оперштабсь: «Пелькс инфекциять каршес тюремаса инь важнайсь – вакцинациясь»

Коронавирусть коряс оперштабсь: «Пелькс инфекциять каршес тюремаса инь важнайсь – вакцинациясь»

Мордовиянь Оцюнять аф лама пингс тевонзон тиендисна Артём Здунов 10 июньцта видеосвязень режимса етафтозе коронавируснай инфекциять профилактиканц и келемоманцты кить пересеманц коряс региональнай штабть очередной заседаниянц. Корхтамась мольфтевсь тяниень пингонь эпидемиологическяй обстановкать, ковид-19 урмать каршес вакцинациять мольфтеманц, здравоохранениянь региональнай системать работанц, санитарно-эпидемиологическяй вешфкснень пяшкотькшнемаснон мельге контрольть колга.

Региононь вятись азозе, што коронавируснай инфекциять келемоманц мархта обстановкась лядонды тяда ингольдень уровеньца.

«Няеви цебярьгодома минь мзярс аф няйхтяма, - мярьгсь Артём Здунов. – Конешна, сярядихнень лувксснон касомац аф няеви, но сетьмосемс аш кода, сяс мес ковиднай стационарса пациентта ингольцекс лядонды 400 ломань, а «якстерь» зонаса лядондыхть 10 муниципалитеттне».

Инь важнай тевсь пелькс инфекциять каршес тюремаса – вакцинациясь. Республикаса прививочнай кампаниясь мольфтеви планц коре, тянь колга азондсь вице-премьерть тевонзон тиендисна Галина Лотванова. Тяка пингть поступай вакцинать объемонза макссихть касфнемс прививкатнень объемснон и ванфнемс ломаттнень эряфснон.

МР-нь здравоохранениянь министрть тевонзон тиендисна Олег Маркин азондсь оперштабти ситуациятнень колга, конатнень мархта васетькшнихть врачне ковиднай госпитальхнень эса. «Миньцонк пяк лама примерда, мзярда реанимацияса ащихть радня ломатть фкя семьяста. Финцне пчксихть, омбоцне кулсихть. И кода сяльде ломатть сюцекшнесазь эсь пряснон, мес ашесть тифте прививкат эстеест и эсь мала ломаньцнонды, конатнень синь юмафтозь! – мярьгсь Олег Маркин. – Кда ломанць аф вакцинировандаф, сон обязательна урмаяй. Кда тинь надиятада, што сярядеде ни и оду аф урмаськоттяда, тя аф виде! Коронавирусса сярядихнень 10 процентсна – тя одукс урмаськотьфт, улихть реанимацияв пачкодемань и кулсемань случайхть. А вов вакцинась лац аралай коронавируснай инфекциять эзда».

Эксперттне лувондсазь, што именна тяни, сексеть самс, самай пинге тифтемс коронавирусть каршес прививка. А сексенда ушедови гриппть каршес вакцинациясь.

Оперштабть пингста стане жа корхтафоль отпускнень пингста безопасностень мератнень пяшкотькшнемаснон колга. Башка мяль – иттнень ваймосемасна. Ответственнай руководительхненди марса МР-ть эзга Роспотребнадзоронь Управлениять мархта эряви обеспечендамс кизонь кампаниять етафтоманц пандемиянь условияса сембе профилактическяй мератнень пяшкотькшнезь.

«Исяк мон ваныне школать видеса фкя лагерть. Кода минь корхнеме тяда инголе, шабатне должетт  етафтомс тя пингть польза мархта, тонадомс од тевс. МЧС-ти тяса ули кода лездомс, волонтерхненди, медикненди – тонафтомс шабатнень, кепотьксонди, максомс васенце лезкс. Тяда башка, эряви обеспечендамс лагерьса аф пелезь улемаснон», - китькстазе Мордовиянь Оцюнять аф лама пингс тевонзон тиендисна.

Стане жа оперативнай штабть заседанияса корхтафоль 12 июньцта Россиять шиньцты, Саранскяйть 380 и Рузаевкать 390 кизонь топодемаснонды лемтьф мероприятиятнень етафтомаснон колга. Сембе синь эрявихть етафтомс санитарнай вешфкснень пяшкотькшнезь.

Тяда башка, оперштабса примаф решения 26 июньцта Лямбирскяй райононь Аксеновскяй велень поселенияса етафтомс «Сабантуй» национально-фольклорнай ила.


Мордовия Республикань Оцюнять пресс-службац