Мордовиянь Оцюнясь Артём Здунов 25 апрельста рабочай поездка мархта сась Инсарскяй району. Республикать руководителец ульсь «МолАгро» ООО-са, коса кярьмодсть зерновойхнень видемаснонды. Предприятиять директороц Александр Киреев пачфтсь велень хозяйствань сезонти платтнень колга.
«Минь 1200 пря потяма стаданьке, нолятама 35 тонна лофца суткати. 2017 кизоста сявомок ушедоськ лама пинге тевс аф ноляви модатнень видемань площаттнень келептемаснон инкса разработкаснон, тядде видетяма 7,5 тёжянь гектар», - шарфтсь мяль сон.
Мордовиянь велень хозяйствань и продовольствиянь министрсь Александр Кечайкин полатксонди азозе, што видемань кампаниясь ушедсь республикань сембе райоттнень эса. Зерновойхнень и зернобобовайхнень мархта регионца ули заняф видемань площаттнень пцтай 270 тёжянь гектарсна.
Лятфтаськ, Мордовиянь Оцюнять Государственнай Собранияти Посланиясонза путф задача тядде кочкамс миллион пяле мархта тонна сёра, а вете кизонь перспективаса лисемс кафта миллион тоннати.
Артём Здунов ванозе удобрениянь и запчастень рамамань кизефксть аграрийхнень и республиканскяй Минсельхозть руководстванц мархта. Министрти максф поручения курокста ётафтомс работать Россиянь Минпромторгту заявкать, конань эса азови республикань велень хозяйствань предприятиятнень комплектующайхнень эса, конат рамсевихть омба масторонь производительхнень кядьста, вешфкссна.
Мордовия Республикань Оцюнять Пресс-службац