Сонь эзонза сувасть: республикань Правительствать председателенц полафтыец Батыр Эмеев и вирень, охотниконь хозяйствань и природопользваниянь министрсь Адель Галиуллин. Покодемань молемать пингста бизнес-миссиясь кармай покодема кафта ширдень, Мордовия Республикать и Красноярскяй крайть ёткса сотрудничествать кемокстаманц лангса.
Васенце тев мельге васьфтемась етась Красноярскяй краень Правительствань председательть полафтыенц Алексей Медведевонь и исполнительнай властень оргаттнень руководительснон мархта, конат мольфтсазь промышленнай, мишендемань, туризмань и образованиянь сфератнень.
Адель Галиуллин корхтась крайть перьфпялень ресурсонь и вирень комплексонь министрть Алексей Пановонь мархта. Мордовиянь вирень, охотниконь хозяйствань министрсь ванозе краень Вирень пожаронь центрать региональнай диспетчерскяй службанц покодеманц.
Алексей Иванович явсь палы вастонь мумста БПЛА-нь тевс нолдамань опытонц мархта.
«Мордовияса тяфта жа арьсеви рамамс пилотфтома лии аппаратт. Федеральнай бюджетть средстванзон лангс кармай рамаф 8 беспилотник. Сембоц вирень хозяйстваса кармай 11 БПЛА-т, конат лездыхть мушендомс палы васттнень, аф законнай исань веляфтомать», - азондозе Адель Галиуллин.
«Красноярскяй крайсь – тя вишкса касы-виияй Россиянь регион оцю экономическяй и социально-культурнай потенциал мархта, - китькстазе Мордовия Республикань Правительствать Председателенц полафтыец Батыр Эмеев. - Мордовиясь шарфни оцю мяль торгово-экономическяй, научно-техническяй и культурнай соткснень кемокстамаснон лангс. Анцек ётай кизоста минь регионнеконь ёткса товарооборотсь няфтсь 1,34 млрд цалковай. Арьсемаса – объепне касфтомс».
МР пресс-центрась