22 апрельста Саранскяйса ётась Мордовия Республикань 7 созывонь Государственнай Собраниять 10 сессияц. Сессиять работаса примась участия Мордовиянь Оцюнясь Артём Здунов. Депутаттне ванцть несколька кизефкс, тяконь лувксса Мордовия Республикань республиканскяй бюджетть 2022 кизонди и 2023 и 2024 кизотнень плановай периодснонды полафтксонь сувафтомать мархта сотфть.
Мордовиянь финансонь министрть тевонзон тиендисна Сергей Тюркин, азондомок бюджетть колга законопроектть квалма, ушетксста пачфтсь васенце кварталть итогонзон колга. Налоговай и аф налоговай дохоттнень Мордовия Республикань консолидированнай бюджетти поступамансна тисть 8 млрд. 444 млн. цалковай, мезсь 332 млн. цалковайда сяда лама мелять тяка пингонц коряс, касомать темпоц тись 104,1 %.
Касомась обеспечендаф НДФЛ-ть коряс - 267 млн. цалковайда, нефтепродуктатнень лангс акцизать - 136,4 млн. цалковайда, налогообложениянь тёждялгофтф системать и налогообложениянь патентнай системать коряс - пцтай 100 млн. цалковайда, мезсь сатфоль регионца предпринимательствать виияфтоманцты тиф цебярь и эрявикс условиятнень анокламаснон вельде.
Республиканскяй бюджетть расходонза касыхть 1 млрд. 560 млн. цалковайда ся средстватнень лятксснон вельде, конат апак нолдакт тевс финансовай кизоть ушедоманцты.
Тяконь лувксса 621 млн. цалковай арьсеви нолдамс региональнай значениянь марстонь тевс нолямань автомобильнай китнень капитальнай ремонтснонды (нят дорожнай фондть средстванза);
100 млн. - муниципальнай образованиятненди пирьфонь территориятнень благоустройстваснонды межбюджетнай трансферттненди;
150 млн. - МР-нь муниципальнай образованиятнень бюджетснон сбалансированностьснон обеспечендаманц коряс мератнень ширень кирдемаснонды;
130 млн. - социальнай сферань учреждениятненди коммунальнай услуганди;
120 млн. - социальнай сферань учреждениятнень налогснон и страховой взносснон пандомс;
100 млн. - граждаттнень льготнай категорияснонды питнефтома ардомать максоманцты;
70 млн. - урос-иттненди квартирань рамамс (2022 кизоня ули рамаф аф 80 кржа квартира урос-иттненди, 2021 кизоня рамафоль 66 квартира);
99 млн. – нят субсидият коммунальнай инфраструктурань систематнень модернизацияснон коряс мероприятиятнень обеспечендамснонды (тяфта, Саранскяйса Фурмановонь ульцянц коряс канализационнай коллекторть реконструкцияц);
26 млн. - субсидият граждаттнень аварийнай и ташта эрямань фондста лия эряма вастс ётафтомаснон коряс мероприятиятнень обеспечендамаснонды;
11 млн. - опекуттненди и приемнай тядятненди-алятненди пандоматнень касфтомаснонды (2022 кизонь февральста примафоль тянь коряс закон).
Мордовия Республикань Оцюнять Пресс-службац