14 декабрьста Россиянь Президентть мярьгоманц коряс Мордовиянь Оцюнясь Артём Здунов видеоконференциянь режимса примазень ломаттнень эсь кизефксснон мархта. Пшкядематнень коряс сяда курокста покодеманкса тертьфтольхть государственнай властень исполнительнай органонь представительхне. Кизефксне сотфтольхть коммунальнай инфраструктурать, ЖКХ-нь сферать одкстоптомаснон, территориятнень петемаснон-мазоптомаснон мархта.
Тяконь лувксса Сире Шайгавонь эряйсь пшкядсь региононь вятити коллективнай эняльдема мархта — лездомс петемс Сире Шайгавса Г.И.Сураевонь-Королёвонь лемса искусствань идень школать. Артём Здунов мярьгсь, што петемань тефнень арьсекшневи ушедомс сай кизоня «Модернизация региональных и муниципальных детских школ искусств путём их реконструкции и (или) капитального ремонта» проектть эряфс ётафтоманц мяльса кирдезь. Тяда башка, сай кизоня «Культурная среда» региональнай проектть вельде учрежденияти максови субсидия музыкань инструментонь, оборудованиянь и тонафнемань материалонь рамаманкса.
Куря ляйть шудема вастонц урядаманц коряс кизефкс мархта пшкядсть Ичалка аймаконь Ладскяй велень поселениянь эряйхне. Тя кизефксть аф весть кепсезь муниципалитетонь ломаттне РФ-нь Президентти и МР-нь Оцюняти пшкядемаснон эса. Ляй трвась кассь кусторксса и шуфтоняса. Шадотнень пингста ведсь занцесыне 130 кудть. Республикань вирень хозяйствань, охотничьяй хозяйствань и природопользованиянь министрсь Алексей Ларькин азозе, што тядде ульсь аноклаф проектно-сметнай документация, сави чистендамс ляйть 3,4 вайгяльбень кувалмоса вастонц. Тяниень пингти чистендаф пцтай 250 метра. Шумордамс тефнень арьсекшневи 2023 кизонь ноябрьста. Артём Здунов мярьгсь кирдемс тя кизефксть башка контроль ала.
МР-нь Оцюняти пшкядсь Лямбирскяй велень поселениянь «Сельхозтехника» микрорайононь эряйсь. 2 тёжяньда лама ломанць пеняцякшнихть симома ведть качестванц лангс. Ведень сявомань установкась велеса строяфоль 1992 кизоня. Сянкса, штоба тястонь эряйхнень фалу улель цебярь симома ведьсна, эрявихть полафтомс сембе резервуархне и 200 метрань кувалмоса водопроводсь и петемс водозаборть.
«Тяни шарьхкотьф ни мзяра тев сави пяшкодемс. Республикась аф лядонды шири «Ару ведь» проектть эзда, конань мяльса кирдезь стройсевихть и петневихть тянь лаца сооружениятне. Тянкса минь нолдатама 100 миллионда лама цалковай, кемокстафт сембе эрявикс соглашениятне. Петемань-тиемань тефне шумордамат 2022 кизонь 1 ноябрть самс», - мярьгсь Артём Здунов.
Ломаттнень эзда сембе пшкядематнень Мордовиянь Оцюнясь сявозень башка контроль алу.
Мордовия Республикань Оцюнять пресс-службац