Корхтафоль Содамошинь шиня и Терроризмать каршес тюремаса фкя мяльс кирдемань шиня безопасностть обеспечендаманц колга, а стане жа вайгялень максомань единай шити анокламста и ётафтомстонза обстановкать сталгодоманцты вийхнень и средстватнень анокшиснон квалма. Артём Здунов макссь порученият Правительствати и профильнай ведомстватненди региононь эряйхнень безопасностьснон обеспечендаманц коряс.
1 сентябрьста ушедови тонафнемань од кизось. Тянкса башка оцю мяль шарфтфоль тонафнемань учреждениятнень антитеррористическяй аралафшиснонды. Мордовия Республикань Образованиянь министерствати максф поручения маластонь шитнень ваномс, кода анокт тонафнемань орг анизациятнень руководствасна и персоналсна террористическяй пелькснень пингста прянь вятемати. Тяда башка, арьсефт информационно-пропагандистскяй мероприятият, конат водендафт населениять анокшинц касфнеманкса.
Идень саттнень, школатнень и колледшнень антитеррористическяй аралафшиснон колга азондсь МР-нь образованиянь министрсь Елена Солдатова. Сон отмечазе, што дополнительнай средстватнень вельде, конат нолдафт Мордовиянь Оцюнять поручениянц коряс (тя 30 миллион цалковай), удалась козякофтомс республикань школатнень металлодетекторса и доступть контроленц и управлениянц коряс системаса. Артём Здунов китькстазе, што тя работать эряви шумордамс 100 процентта. «Сяс мес тя системась аралакшни эряфт», - мярьгсь региононь руководительсь, лятфтамок кой-кона региоттнень эса лисьф зияттнень колга.
Тонафнемань объекттнень антитеррористическяй аралафшиснон колга стане жа пачфтсть республикань райононь оцюнятне.
Терроризмать каршес тюремаса фкя мяльс кирдемань шиня (3 сентябрьста) арьсекшневи ётафтомс «Сердце Беслана» и #МордовияПротивТеррора акцият, информационнай флешмопт Интернетса и патриотическяй творческяй конкурст – «Беслан. В памяти навсегда!», «Пламя памяти», «Юность, опалённая войной».
Республикань Оцюнясь лятфтась Антитеррористическяй комиссиять решениянзон пяшкотькшнемаснон эрявиксшинц колга, исполнительнай и местнай самоуправлениянь органонь должностной лицатнень персональнай ответственностьснон касфнеманц квалма. Артём Здунов китькстазе: комиссиять мархта примсеви решениятнень цебярьста и эсь пингстонза пяшкотькшнемаснон эзда ащи регионть безопасностец.
Тяда башка, заседанияса азфтольхть ся объекттне, конатнень лангс ули кода шарфтомс мяль террористическяй тевонь вятихненди.
Мордовия Республикань Оцюнять пресс-службац