«Мекольдень пингть полафтсть бизнесть ширень кирдемань мератне. Предприятияньке васедсть ладяф соткснень и экспортть колавомаснон мархта. Эряви шарьхкотькшнемс кодама прябалатне тяни теенть тяниень пингоннет. Васедемать основной целец – тя, конешна, меки моли сотксть получамац», - китькстазе Артём Здунов.
Республикаса ширень кирдемань федеральнай и региональнай мератнень тевс нолдазь пцтай 2 тёжятть юридическяй лицась. Мордовиянь экономикань, торговлянь и промышленностень министрть тевонзон тиендисна Иван Горин крхкаста азондсь тянь колга.
«Внешнеэкономическяй ширеса РФ-нь Минэкономразвитиясь шарфни мяль од каналонь вешемати, логистическяй цепочкатнень одукс ладямаснонды. Ведомстваньке анок максомс ширень кирдема бизнести дружественнай странань любой торговай представительть мархта», - китькстазе Иван Горин.
Сон стане жа отмечазе, што улихть государстват, конатнень мархта ули кода виияфтомс экспортть, ётксост: Беларуссь, Казахстанць, Китайсь, Индиясь, Киргизиясь и лиятне.
Аньцек АПК-нь предприятиятненди тядде максф 9,6 миллиард цалковай льготнай кредит. Отрасляти гослезксть лувксоц арась пцтай 1,8 миллиард цалковай, конатнень эзда 1,3 миллиард цалковайсь пачфтьфт ни Мордовиянь аграрийхненди. Сентябрьста – октябрьста велень хозяйствань предприятиятненди нолдави субсидия зерновой культуратнень производстванкса и миманкса карьхцнень пяльксснон мрдафтоманкса – 120 миллион цалковай. Тяда башка, Росагролизингть вельде рамаф 78 единица велень хозяйствань техника, 36-сь конатнень эзда поступасть ни республикав.
Республикань оцю предприятиянь руководительхне азондозь Артём Здуновонди уликс прябаласнон. «Сарансккабель-Оптика» предприятиять директороц Рашид Абаев азозе, што импортть эзда ащемасна решандаф пцтай педа-пес, пцтай сембось тяни рамсеви Китайста. Виде, лоткафтфт кой-кона инвестпроекттне. Тяда башка, ули ащема импортнай оборудованиять обслуживандаманц и программнай обеспечениять эзда. «Тя кизефксса минь надиятама российскяй IT- специалисттнень лангс», - отмечазе предприятиянь руководительсь.
Мордовиянь Оцюнясь китькстазе, што инвестпрограмматнень эряфс ётафтоманкса эряви вятемс марстонь работа федеральнай Ростелекомть мархта. Лезкс тя тевса региононь руководительть ширде кармай. Тянь коряс порученият максфт МР-нь промышленностень, наукань и од технологиянь министрти Игорь Губайдуллинонди.
Мордовия Республикань Агроопромобъединениять председателец, крестьянскяй хозяйствань оцюнясь Ирина Ямашкина азондсь эсь велень хозяйствань тевонц колга, китькстазень прябалатнень.
МР-нь Правительствань Председательть заместителец Раиса Цыбизова азозе, што 2023 кизоня сувафтови вийс федеральнай проект, конань мяльса кирдезь федеральнай бюджетста модамарень и перень сёронь производствать касфнеманкса нолдави субсидия. 2024 кизоста сявомок лезкссь ушеды макссевома хранилищатнень одкстоптоманкса.
Предприятиятнень эса ситуациять колга пачфтсть стане жа Автосамосвалонь саранскяй заводть, «Агросоюз – Красное сельцо» ООО-нь и «Опора России» Мордовскяй региональнай отделениять руководительсна.
Мордовия Республикань Оцюнять пресс-службац