14 сентябрьста «Мордовия Арена» стадионца ётась оцю и валда «Время героев» премиянь сяськихнень каземасна. Сонь эсонза примась участия Мордовиянь Оцюнясь Артём Здунов.
«Тя фестивальсь арась тейнек цебярь койкс, конань минь тяштьсаськ минь шачема масторнеконь – Мордовиять историянь лопазонза. Тячи минь карматама чествовандамост сятнень, кие тись героическяй поступкат эрь кодама тевса , - мярьгсь Артём Здунов. – Минь ётксонк ашет сят, кит максозь эсь эряфснон Родинать Западнай рубеженц эса. Вечнай мялям геройхненди, конат шавовсть Россиять суверенитетонц, русскяй мирть инкса».
Геройхнень мяляфснон мяляфтозь кашт аф моли минутаса.
«Время героев» народнай премиясь кочкаф «Подвиги» социальнай афкоммерцескяй медиапроектть команданц инициативанц коряс. Премиясь уже колмоце кизось получсесы президентскяй грантовай кирдемать.
««Время героев» проектсь - инь валдсь, конац токсесыне минь сединьконь. Минь геройнеконь лемсна кармайхть тяштьфт Россиять великай историязонза. Мялезе, штоба тя стака пингть кивок эздонк афоль синдев врагть идеологиянц алу. Тейнек эряви улемс виикс. Героень пингсь - тя минь пингоньке!» - китькстазе Мордовиянь Оцюнясь. Государственнай наградатнень СВО-нь участникнень семьяснонды, конат шавость боевой заданиять пингста, максозень Артём Здунов – Мужествань Орден максф Ромодановскяй районцта Владимир Кладовонди и Рузаевкаста Анатолий Лапшинонди.
Мужестванкса, отваганкса и эсь прянь аф ужяльдеманкса, конат няфтьфтольхть воинскяй шумоть пяшкодеманц пингста, «За отвагу» медальхть максфт СВО-нь участникне и ветераттне Вадим Калугин, Сергей Макаров, Александр Теркин, Жуковонь лемса медальса - Дмитрий Курченков.
Артём Здунов максозе народнай премиять «Время героев» специальнай номинацияса - «Герои нашего времени». Сон тяфта жа ульсь максф специальнай военнай операциянь участникненди Константин Пронькинонди, Александр Беляйкинонди, Виталий Ергинонди, Евгений Автайкинонди и Евгений Шнякинонди.
Денис Шапкарин «Подвигить» сембе команданц эзда сюконясь Мордовиянь Оцюняти проектть сембеширдень кирдеманц инкса.
Сяськихнень каземасна ушедсь важнай номинацияста «Герои трудовой династии».Семьянь кизоть, Мордовияса дополнительна чествовандасазь и семьятнень, конатнень эса аф фкя поколениясь максозе эряфонц тя или тона профессияти. И символична, што сяськикс тя номинациять эса арась Мордовиянь представительницась. Сценать лангс лиссть Оксана Старостинать педагогическяй династиязонза сембе сувайхне. Учителень семьять марстонь стажсна 250 киза.
«Герои наставничества» номинацияса сяськсь студенческяй отрядонь руководительсь Артём Колобов Пензенскяй областьста, наградать теенза казезе Саранскяй и Мордовскяй митрополитсь Зиновий. Сон китькстазе: «Ваномок номинанттнень лангс, минь сембе марясаськ героизмань вийть, няйсаськ сонь. Тя сембось моли минь кунардоь пингонь койнеконь эзда, конатненди минь мрдаме. Минь - народсь-сяськись, минь - героень народсь!»
Премиянь участникнень ПФО-са Россиянь Президентть полномочнай представителенц эзда илафтозень МР-ть коряс прявкс федеральнай инспекторсь Анатолий Гулин.
Премиять смузец и прявкс целец – образованиясь. Сяськихнень ёткса кочкафт благороднай примехне, конат заслуживандайхть ванф, примерхне, конат эрявихть сембонди тяфтама стака пингть. «Герои по призванию» номинацияса наградать максозе эсьлацонь ломанць - Россиянь Геройсь, «Уральские авиалинии» авиакомпаниянь менельгя лии кшнинь нармонень командирсь Дамир Юсупов. Ётась вете кизот ся пингсть эзда, мзярда сон ванфтсь 233 эряф, озафтомок самолетть кукурузнай паксяв аварийнай посадкать пингста. Наградась ульсь максф МЧС-нь сотрудникти Сергей Аршиновонди Чувашияста. «Герои правопорядка» номинацияса сяськикс арасть Екатерина Сиротина, Александр Соколов и Дмитрий Воеводин Нижегородскяй областьста, конат кундазь ломантть, конац взорвандазе писательть Захар Прилепинонь машинанц.
«Герои семьи» номинациять эса сяськсть Юрий и Надежда Горшенинттне Мордовияста, конат касфтыхть ниле идтть и тиендихть питнефтома цебярь тефт.
«Медицинань геройкс» арась врачсь-гинекологсь Фаина Магдеева Мордовияста, конац профессияса уже 44 киза, «Наукань геройкс» - биофизиксь Марина Ширманова Нижегородскяй областьста, конань мечтац - арьсемс ракть эзда лекарства, «Образованиянь геройкс» - физикати тонафтысь Николай Вихарев Нижегородскяй областьста, «Промышленностень геройкс» - «ВКМ-Сталень» сталеварсь Мордовияста Виталий Кузнецов. Виталий лемдезе эсь сяськоманц алянцты, кона аф кунара кулось, - сон тожа ульсь сталеваркс.
«Герои добровольчества» номинацияса экспертнай советсь кочказь аф фкя сяськи - Юлия Куценко Ульяновскяй областьста – тядякс сонь лемнесазь аф аньцек эсь иденза, но и СВО-нь боецне, протоиерейсь Владимир Кугушев Мордовияста - батюшкась кочказень сембе валда вайме прихожаниттнень фронтти лезксс, и нинге Никита Иванов - социально ориентированнай предпринимательсь, конац лезды ломаттненди лац эрямс, «Всех обнял» фондть участникоц.
«Социальнай предпринимательствань геройкс» арась Сергей Сорокин Чувашияста, конац покоди строительстваса и лезды шачема ширень койхнень ванфтомаса, «Герои воспитания» номинацияса сяськсь Екатерина Вдовина Пензенскяй областьста.
«Культурань геройкс» лемтьф Воронинонь лемса Мокшэрзянь краеведческяй музейть директороц Дмитрий Фролов.
«Герои спорта» номинацияса сяськсь Юрий Назаров, а «Преодолениянь геройкс» арась Александр Яшин – кафцьке Ульяновскяй областьста. Александр, аф ваномок аф лац няеманц лангс, кочкась хоккейнай команда и занимандай адаптивнай спортса. «Велень хозяйствань геройкс» арась Пензенскяй областьста передовиксь Юрий Родионов.
«Герои трудовой династии. Основатель» специальнай номинацияса сяськикс арась Валентина Бучумова Мордовияста - сонь «Саранский» ЛВЗ-са покодемань стажец 43 киза, а Бучумовнень династияснон марстонь стажсна – 180 кизода лама.
«Герои качества» нинге фкя специальнай номинацияса казьф «Атяшевский» мясоперерабатывающай комбинатть Торбеевскяй подразделениянь производствать начальникоц Ольга Сорудейкина.
«Герои зоозащиты» номинацияса сяськсь Наталия Кадомцева Пензенскяй областьста, «Герои экологии» - квадро-эко-патрульть арьсиец Мордовияста Надежда Бояркина, «Герои сервиса» - электрогазосварщиксь Нижегородскяй областьста Михаил Дёмкин, «Герои транспорта» - аэродромнай службань начальниксь Валерий Маслов Пензенскяй областьста, конань сембе семьяц тожа покоди аэродромса.
«Герой сохранения исторической памяти» номинацияса сяськсь Мордовияста поисковай отрядть руководителец Александр Планкин, «Исполнительскяй искусствань геройкс» арась Елена Хорькова Чувашияста, «Декоративно-прикладной искусствань геройкс» - Наталия Панкова Нижегородскяй областьста.
Медиаменеджерхнень кядьса – ломаттнень ёньснон лангса оцю власть. Ваймонь образованиясь –эрь журналистть, редакторть, ведущайть, рекламщикть и медиабизнесонь руководительть миссияц. «Герой медиа» номинацияса сяськсь спортивнай журналистсь и комментаторсь 20-кизонь стаж мархта Пензенскяй областьста Владимир Тер-Казаров. «Герои по зову сердца» номинацияса лама идь мархта тядясь Надежда Цветкова Чувашияста, конац идесь кафта ваяй ломатть.
«Эряфонь китне, аф туфтсазь кить лангста геройть» - премиянь гимнать валонза, конац, минь содасаськ, курок арай всероссийскяйкс.
«Время героев» церемониять шумордаста «Мордовия Арена» стадионтть инжиензон лемс морась Dabro группась.
Мордовия Республикань Оцюнять пресс-службац