Лятфтасаськ, «Оцю перемена» конкурссь – Россияса иттненди и подросткатненди инь оцю проектсь. 2022 кизоня теенза поладсть 4 миллиотт ломанць, тяконь лувксса 8-10 классонь 1,5 миллион учениксь. Саранскяи полуфиналс, кона кармай молема недялять аделавомс, пуромсть ПФО-нь сембе 14 региононь представительхне.
Полуфиналонь участникненди сави няфтемс маштомошиснон, конат меле эрявкстыхть теест эряфса. Конкурссь ётафтови 12 тематическяй ширес коре. Подросткатненди ётафневихть мастер-класст и васедемат содаф ломаттнень мархта.
Мордовиянь Оцюнять мархта васедемась ётафтовсь Н.П.Огарёвонь лемса МГУ-нь «Точка кипения» площадкаса. Участникнень приветствондамста Артём Здунов азозе, мезть лувондсы инь важнайкс странати и од ломаттненди. Республикань руководительсь отмечазе тяниень пингонь условияса Россиять технологическяй суверенитетонц виияфнеманц эрявиксшинц. Кода кочкамс эрявикс шире профессияса, кода арамс вешеви специалистокс – од ломаттне сембе пинкнень макссесазь эстеест тя кизефкснень, вешендсазь эсь пряснон, вешендихть, коза водендамс эсь асушиснон и маштомошиснон.
«Но результатт ули кода сатомс аньцек работамок командаса, мон тянди кеман, - китькстазе республикань Оцюнясь. – Ялгаксшинь сотксне, конатнень тинь мушендсасть тяса, пяк важнайхть. 10-20 кизода меле (а синь ётайхть пяк курокста, верондада) тинь карматада кочксемонза политикать странаса».
Стане жа Артём Здунов отмечазе од ломаттнень профессияса эсь пряснон мумаса наставникнень вастснон. Эстеенза главнай наставникокс республикань руководительсь азозень Татарстанонь президентть Рустам Миннихановонь иГосударственнай Думаса «Единая Россия» фракциять руководителенц Владимир Васильевонь, конань мархта работась Дагестанонь Правительстваса. «Конешна, наставниктон ульсь сяда лама, мон синь ашине аза, но мяляфтьсайне сембонь, тяконь лувксса эсь школьнай учительнень, - мярьгсь Мордовиянь Оцюнясь. – Мон марян гордость наставниконень инкса!»
Артём Здунов отвечась шабатнень кизефксснон лангс – васендакиге синь сотфтольхть профессиянь кочкамать мархта. Мордовиянь Оцюнясь отмечазень республикаса производствань отраслятнень, конат вииякшнихть и коза эрявихть цебярь специалист: тя фармацевтикась, волоконнай оптикась и приборостроениясь, кабельнай промышленностсь, вагоностроениясь, велень хозяйствань продукциять переработкац.
Полуфиналонь участникне стане жа корхнесть Н.П.Огарёвонь лемса МГУ-нь ректорть Дмитрий Глушконь мархта.
Мордовия Республикань Оцюнять пресс-службац