Шумбракстомок од исследовательхнень, Артём Здунов китькстазе: «Кенярдян поздравляндамс тинь лац прянтень няфтеманкса Сембе Россиянь астрономиять коряс школаса тонафниень олимпиадаса - сон кемодонга кеме! Тя маркать минь кирьдсаськ аф васенце кизось ни. Поздравляндатядязь, васенцекссь, тонафтыхнень – тя оцюдонга-оцю труд. И тинь, шабат – тинь кемоста и мялень пуроптозь моледе цельти и сатость сонь! Тячи минь шумордасаськ пялькстомать химиять коряс – пяк лац, мес сон ётни Мордовияса».
Республикань Оцюнясь тяшкстазе, што асу шабатненди Лицейсь – флагман асу од ломанень анокламать коряс. Сон сюконясь тя тевть инкса директорти Евгений Вдовинонди, тяшкстазе, што пяк эряви маштомс кочкамс педагогическяй кадрат – тянц эзда ламода ащихть сатфксне.
Эрек корхтамать пингста шабатне азондозь эсь мяльснон-арьсемаснон, ётаф олимпиаднай пялькстоматнень колга, азозь эсь мяльснон и макссть кизефкст Республикань Оцюняти. Вера Меркуловать мялецоль содамс, примсесь ли участия олимпиадаса школаса тонафнемста региононь руководительсь.
Артём Здунов азозе, што примсесь участия математикать, рузонь кяльть и литературать, астрономиять коряс олимпиадаса – тя пяк питни и эряви.
Астрономиять коряс Сембе Россиянь олимпиадаса сяськись Илья Иляков арьсекшни поступамс тонафнема
«Прикладной математикати и физикати». Сонь мялецоль содамс: кармай ли тя специальностсь эрявикс республикаса сай пингть. Мордовиянь Оцюнясь азозе: «Региононь ламоц предприятиятненди эрявихть тяфтма кадрат. Мордовияса фалу кармай улема теенть работа!»
43 № Лицеень физикань и астрономиянь тонафтысь Людмила Зуева азсь мяль панжемс республикаса астрономиять коряс кизонь школат – тя лезды касы поколениять кеподемс мяльснон тя предметти. Артём Здунов кирдезе тя мяльть, стане жа мярьгсь анокламс заявка грантовай поддержкать лангс тиемс тематическяй смена марса Движения первыхть мархта.
Россиянь командань руководительсь народъётконь олимпиадаса астрономиять и астрофизикать коряс, Санкт-Петербургскяй государственнай университетонь математико-маханическяй факультетонь менелень механикань кафедрань старшай преподавательсь Борис Эскин китькстазе, што маластонь пингть Мордовияса астрономиясь кармай оцю уровеньца – тянди тифт сембе условиятне. Ётаф олимпиадаса республикань командась сатсь сяда оцю сатфкст странань столицать коряс. Сон стане жа пачфтсь, што прясонза кирди аф фкя научнай проект астрономиять и космонавтикать коряс, коза арьсекшни шарфтомс мяль и минь республиканьконь.
«Мордовияса пяк цебярь школась, тяса лац кирдьсазь образовательнай процессть. Шабат, кирдеда школантенди, республикантенди! Мордовиясь колгант аф юкстай!» - мярьгсь Борис Эскин.
Химиять коряс школаса тонафнихнень Сембе Россиянь олимпиадаса жюрить председателенц полафтыец, М.В. Ломоносовонь лемса МГУ-нь химическяй факультетонь деканць Сергей Карлов тяшкстазе, што Мордовияса школаса тонафнихнень сатфкссна кеняртьфтихть, а сонць олимпиадась аноклафоль оцю уровеньца.
Республиканскяй лицеень химиянь тонафтысь Дмитрий Хлевин, кона примась участия Саранскяйса ётафтф химиять коряс олимпиадаса азозе: «Ётафнемс пялькстомат тяфтама уровеньца – тя оцю честь, но и оцю ответственность. Ламоц региоттне тянь лангозост аф сявондьсазь. Минь лицейсонк тифт цебярь условият, минь келиста нолясаськ тевс ня возможносттнень!»
Васедемать пингста азфоль нинге фкя мяль, кона сотфоль Россиянь школаса тонафниень национальнай сборнаень анокламань естественнай предметтнень коряс народъётконь олимпиадати, конат ётафтовихть Республиканскяй лицеень базаса. «Мяльсь пяк цебярь!» - мярьгсь Мордовиянь Оцюнясь.
Васедемать шумордамстонза Артём Здунов арьсесь школаса тонафнихненди сяда товолдонь сатфкст и оцю сатфкст эряфса и казсь мяляфтови казнет.
Мордовия Республикань Оцюнять пресс-службац