Компаниясь вов ни 13 киза покоди республикаса, 2018 кизоста сявомок тиендьсы кочкамань, лихтемань, урядмань и лядыксонь тевс нолдамань покодемать кода Мордовиянь региональнай оператор пцтай 650 населённай пунктса. Тя пингста компаниясь тись путкст аф аньцек коммунальнай техникати, контейнернай паркти, но и производственнай мощностти, сотрудникненди цебярь трудонь условиянь тиемати. Тиф клиенттнень мархта покодемань тяниень пингонь абонентскяй центра, ремонтно-техническяй база, техниканди эсь заправочнай станция и логистикань центра. Аньцек мекольце кафта кизотнень путфксне пачфтсть пцтай 200 млн цалковайс.
Артём Здуновонди няфтезь техникать, кона тиендьсы лядыксонь кочкамать и лихтемать. Тядде компаниясь рамась колма ёмла габарит мархта мусоровозт КАМАЗонь двуоснай шасси лангса. Синь нолдавихть тевс ошень средаса – тяйня ётама васта мархта эряма застройкаста ТКО-нь лихтемаса и мусоропровод мархта МКД-ста. Тяфтама мяльхть азсть ТСЖ-нь и управляющай компаниянь вятихне Мордовиянь Оцюнять мархта васедемста, кона ётафтовсь февральста. Компаниясь эрязста няфтезе прянц.
«Ремондис Саранск» ООО-ть гендиректороц Светлана Бигессе азозе, што республикаса арьсеф мусоровозонь паркть одкстопневомс эрь кизоня. Кизоть пенцты кармай рамаф нинге колма ёмла габарит мархта мусоровозт (тя 29 млн цалковай), а сай кизоть – нинге вете тяфтама коммунальнай машинат. Стане жа тядде техникать заправканц удобстванц инкса производственнай площадкаса тиф эсь автозаправочнай станция дизельнай топливань 40 тёжянь литрань объём мархта. Мордовиянь Оцюнясь ванозе и мусоровоснень петемаснон и сервиснай обслуживанияснон коряс ремонтно-техническяй базать – сон стане жа ащи компаниянь имущественнай комплексть ТКО-нь бесперебойнай лихтемань обеспечениять коряс территорияса.
Республикань руководительти стане жа няфтезь эряйхнень мархта покодемань Региональнай операторонь абонентскяй центрать и административнай помещениятнень – эрь шиня тяза пшкятькшнихть Саранскяень и Лямбирскяй райононь лама эряйда, конат ёрайхть получамс консультация ТКО-ть обращениянц мархта ярмаконь пандомать, справкань и дубликатонь получамать коряс. Марнек республикаса покоди райононь эряйхнень мархта покодемань 21 подразделения мархта абонентскяй центра.
Логистикань компаниянь центраса ётни формированиясь и маршрутнай графикнень мархта вятемась. Эрь шиня лядыксонь лихтемась ётни 10 тёжяньда лама контейнернай площадкаста, коса кемокстаф 17 тёжяньда лама контейнер. «Ремондиссь – фкя инь оцю предприятиясь региононь ЖКХ-нь сфераса (тяса покод 475 ломань), сяс оцю мяль шарфневи покодемань цебярь условиянь тиемати. Артём Здунов макссь оцю питне эряйхнень обслуживанияснон коряс организациянь уровенти, сотрудникненди заботань максомати.
Мордовиянь Оцюнясь стане жа ётафтсь рабочай васедема «REMONDIS International» народъётконь концернань руководствать мархта, сонь пингстонза корхтасть 2022-2023 кизонь итокнень коряс региональнай операторхнень ётафтф работаснон колга, стане жа платтнень предприятиять сай пингонь касоманц-виияфтоманц колга. Лятфтасаськ, што 2022 кизоня республикаса нолдафт эксплуатацияс ТКО-нь ладямань и урядамань линиясь 20000 т/г мощностьса и касыксень лядыксснон компостированиянь линиясь – инвестициятнень объёмса сатсть 75 млн цалковай. Ётай кизоть 15 млн цалковай максофль мусороперегрузочнай станциянь и Краснослободскяй районца ТКО-нь логистикать коряс тяниень пингонь предприятиянь строямс.
Васедемать шумордамстонза Артём Здунов тяшкстазе мусоронь башка кочкамати компаниять ванфонц и экологическяй повесткать видеса покодемати, тяконь лувксса од ломанень сфераса. «Пара, што компаниять мяльса-арьсемасонза одкстоптомс машиннай и контейнернай паркнень. Карматама ванома мусороперерабатывающай комплексть строяманц коряс эрь аськолксть мельге – тя пачфти цебярь работати лядыксонь кочкамать и урдамать коряс сембе системати», - азозе региононь руководительсь.
Васедемаса примасть участия МР-нь Правительствань Председательть полафтыец Инсаф Хайруллин и Мордовиянь ЖКХ-нь и энергетикань министрсь Александр Голянин.
Мордовия Республикань Оцюнять пресс-службац