Мордовиянь Оцюнясь Артём Здунов 21 мартста Москуса васетькшнесь Россиянь здравоохранениянь министрть Михаил Мурашконь мархта. Корхтафоль здравоохранениянь региональнай системать работанц, нацпроектть эряфс ётафтоманц, коронавируснай инфекциять келемоманц мархта ситуациять колга.
Артём Здунов пачфтезе, што эпидобстановкась республикаса стабильнай. «Республикаса панчф 790 койка-васта ковидса и аф больничнай пневмонияса сярядихненди, апак заняк лядонды коечнай фондть 25 процентоц, - мярьгсь сон. – Регионца пуроптф лекарственнай препаратонь сатомшка запас. Населениять вакцинациянц коряс планць пяшкотьф 90 процентта, вакцинировандаф оцю населениять 72 процентоц. 60 кизода сире ломаттнень ёткса прививкат тифт 86 процентти. Эпидситуациять цебярьгодомац макссь эреклафтомс плановай медицинскяй лезксть, тяконь лувксса диспансеризациять ётафтоманц. Башка мяль шарфнетяма ломаттненди, конат сярядсть коронавирусса».
Васедемаса корхтафоль 2021-2025 кизотненди здравоохранениянь первичнай звенать одкстоптоманц, пчкафнемань учреждениятнень квалифицированнай кадраса обеспечендамаснон, отраслять цифровизациянц колга.
Стане жа Артём Здунов шарфтсь мяль сянди, што эряви тиемс реконструкция Республиканскяй онкологическяй диспансерть корпусонцты, кона строяф 1970 кизоня 1954 кизонь типовой проектть коряс. Лятфтасаськ, што ётай кизоть песта стройс сувафтфоль онкодиспансерть од поликлиникац. Пчкафнемань корпусть реконструкцияц максы цебярьгофтомс онкологическяй урмаса сярядихненди максови лезксть.
Мордовия Республикань Оцюнять пресс-службац