Тяддень мартста организациясь васьфтезе 35 кизонь топодеманц. Мордовиянь Оцюнясь китькстазе, што ветеранонь Советть оцю значенияц регионца и путни оцю путкс региононь кассы поколениять воспитандаманцты. Корхтасть памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.
«Тинь советфтомонт тейнек саволь стакаста ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, кона может тиемс кальдяв од ломаттненди, сяс кадондомс мялень апак шарфтт тя категориять аш кода», - китькстазе Артём Здунов васедемать панжемста.
Мордовия Республикань ветеранонь Советть председателец Иван Цыганок азозе, што ветеранонь мордовскяй организациясь – фкя инь оцю лувкссоннесь республикаса, эзонза сувси 803 первичнай организация, 140 тёжяньда лама ломань. «Минь фкя инь васенце задачаньке – ветераттнень колга заботендамась, республикать общественнай эряфонц эзда ширеса аф ащекшнемась, кассы поколениять мархта марстонь тевонь вятемась. Ветераноньке – легендарнайхть, кажнайть козя эряфонь киц, тяфтама примерхнень коряс и эряви касфнемс од ломаттнень. Республикань руководствась фалу кирнесы минь инициативаньконь ширеснон. Тя кеняртьфти и максси вийхть – минь аноктама работамс нинге сядонга лац!» , - мярьгсь МР-нь ветеранонь Советть руководителец.
Васедемань участникне корхтасть Мордовиянь школьникнень ёткса кадетскяй движениять виияфнеманц колга. Тя самай ся категориясь, конань эса воспитандави Родинати кельгомась, странать историянц колга содамошитне. Примафоль решения эреклафтомс республиканскяй патриотическяй мероприятиятнень, конат мзярошка пингс лоткафтфтольхть пандемиять пингста.
Большеберезниковскяй райононь ветеранонь Советть председателец, Великай Отечественнай войнань ветеранть цёрац Пётр Прокин пшкядсь региононь руководительти Мордовиянь спортонь ветераттнень лемста, эняльдсь эреклафтомс спортивнай легкоатлетическяй мероприятиятнень ётафнемаснонды мялень шарфтомать, коса участвондайхть эряфкшу ломаттне. Сонць примси активнай участия легкоатлетическяй пробегса, кона ётафневи Большеберезниковскяй районца 22-цеда ни.
Артём Здунов спасибась теенза цебярьс надияманц инкса и азозе, што тяниень пингть арьсекшневи тёждя атлетикать коряс ПФО-нь Кубкать ётафтоманц колга кизефкссь.
Теньгушевскяй раононь ветеранонь Советть председателец Антонина Чалдушкина спасибась региононь руководительти ветеранскяй организациятненди лезксонь макссеманкса. Шарфтсь мяль республикань райоттнень эса ветеранскяй клупнень ширеснон кирдеманцты, а стане жа велеса рабочай вастонь панчсемати.
Саранскяень Николаевка посёлкань ветеранскяй организациянь Иван Таракин пшкядсь эняльдема мархта панжемс населённай пунктса спортивнай площадка, конанди улель кода арамс од ломаттненди пуромома вастокс, спортти синь водендаманксост.
Военно-космическяй виень ветеранць Александр Подкатов китькстазе од поколениять мархта работать эрявиксшинц, тяфтама мероприятиятнень эреклафтомаснон, кода «Зарницась», ётафнемс военно-патриотическяй лагерьхть. Сон стане жа тердезе Мордовиянь Оцюнять Атемару, коса ащи Атемарскяй засечьесь. Мордовиянь Оцюнясь азозе, што тядде арьсекшневи ётафтомс военно-патриотическяй лагерень колма сменат.
Меколи Артём Здунов китькстазе, што ветеранскяй активть мархта тяфтама форматса васетькшнематне кармайхть ётафневома фалу. «Поздравляндатядязь тинь всенароднай илать – Победань шить мархта. Сюконян, мес аф ащекшнетяда озадонь седихть республикать эряфонцты и шарфнетяда мяль од ломаттнень патриотическяй воспитанияснонды».
Васедемать пингста Мордовиянь ветеранскяй движениянь активисттне казьфтольхть оцю казнеса: Мордовия Республикань Почётнай грамотаса, «За личный вклад в развитие Республики Мордовия» Почётнай знакса и Мордовия Республикань Оцюнять Благодарностьса.
Мордовия Республикань Оцюнять пресс-службац