Мордовиянь Оцюнясь Владимир Волков 28 октябрьста етафтсь рабочай васедема «Промомед» компаниянь группать директоронь советонц председателенц Петр Белаень мархта. Корхтамась мольфтевсь «Биохимик» заводть работань итогонзон колга, тяконь лувксса корхтафоль лекарственнай препараттнень нолямаснон квалма, конат эрявихть коронавируснай инфекциять пчкафнеманкса.
Васендакиге, Владимир Волков азозе, што пяк важнай и эсь пингстонне Россиянь Президентть Владимир Путинонь решенияц питнефтома обеспечендамс лекарстваса коронавирус мархта пациенттнень, конат пчксихть амбулаторнайста. Тянкса ули нолдаф 5 миллиартта лама цалковай, государствань оцюнясь макссь распоряжения нолдамс синь апак кирнек. Тиф тя сянкса, штоба валхтомс сталмотнень больницятнень лангста, штоба инь «теждя» пациенттне, а тя сярядихнень 70 процентсна, пчксельхть кудса.
«Тя принципиальнай решения, кона лезды тейнек минь работасонк, лезды лац ладямс марнек пчксемать, кона сотф ковидть мархта», - китькстазе республикань Оцюнясь.
Петр Белай азозе, што пандемиять каршес тюремань тя аф теждя пингть заводсь водендазень сембе эсь мощностензон, ламонь-крда касфтомок вешеви медицинскяй препараттнень производстваснон. «Биохимикса» курокста ушетфоль «Арепливир» противовируснай препаратть и антибактериальнай препараттнень нолдамаснон – эздост заводсь ноляй пяк лама.
«Биохимиксь» странаса фкя и сяка производительсь, кона нолясы «Азитромицинть» укол лаца. Здравоохранениять сембе вешфксонзон минь пяшкотькшнесаськ», - китькстазе Петр Белай.
Сатомс тянь удалась техническяй одкстоптомать и цебярь кадратнень вельде.
«Миньцонк ламода полафтовсть кадратне, колективоньке одкстомсь: заводса работайхть Н.П.Огаревонь лемса МГУ-нь выпускникне, минь именной стипендиатоньке. Ламоцне тисть ни карьера, вятихть структурнай подразделеният, синь работасна лац пандови», - мярьгсь Петр Белай.
«Тя пяк цебярь, што производствав сашендыхть од ломатть, - китькстазе Владимир Волков. – Нинге 10 кизода инголе минь промышленнай предприятияньке сиретькшнесть, а тяни одкстомкшнихть».
Азфоль, што и средняй заработнай платась заводса касонды, сон ламода сяда оцю среднереспубликанскяй показательхнень коряс.
Стане жа васедемать пингста корхтафоль инвестиционнай проекттнень эряфс етафтомаснон колга, конат лездыхть панжемс од рабочай вастт и касфнемс предприятияса заработнай платать.
Мордовия Республикань Оцюнять пресс-службац