4 мартста Мордовиянь Оцюнясь Владимир Волков етафтсь рабочай васедема «Мордовия» футбольнай клубть руководстванц и налхкиензон мархта. Корхтафоль клубть тячиень тевонзон и тяддень сезонти планонзон колга.
Командать старшай тренероц Марат Мустафин азсь благодарностень валхт республикань вятити клубть финансовай прябаланзон решандаманкса и отмечазе налхкихнень цебярь анокшиснон сезонть тундань пяльксонцты.
Командань капитанць Евгений Осипов надияфтсь, што коллективсь путсыне сембе виензон, штоба старандамс кода можна сяда вяри куцемс турнирнай таблицаса.
Мордовиянь Оцюнясь китькстазе, што республикань руководствась аф кадсы командать лезксфтома, но клубть инголе ащи задача ванфтомс подпискать Футбольнай национальнай лигаса. Владимир Волков отмечазе, што тянь квалма сон аф ня шитнень корхнесь Москуса Россиянь Правительствать Председателенц заместителенц Виталий Мутконь мархта.
Стане жа регионть вятиец шарфтсь мяль сянди, што болельщикне учендыхть командать эзда цебярь налхкома. «Аф нолдама, штоба налхкоманте колальхце болельщикнень мяльснон. Командать поклонниконза фалу марясазь налхкихнень настройснон и должетт няемс, што футболисттне паксять лангса аф ужялесазь вийснон. Командать качественнай футболоц мрдафтсыне болельщькнень трибунатненди!» - киткстазе Владимир Волков.
Маластонь кафта налхкоматнень «Мордовия» ФК-сь етафтсыне эсь аренасонза. 8 мартста кармай налхкома новосибирскяй «Сибирьть» мархта, 12 мартста – нижнекамскяй «Нефтехимикть» мархта.
«Инголет – сезонть решающай матченза. Командати эряви тиемс семботь, штоба пяшкодемс болельщикнень надиямаснон и няфтемс, што «Мордовия» футбольнай клубсь – тя команда, конанди вийс коре сяськондемс!» - тяфтама напутствия тись республикань Оцюнясь клубонь налхкихненди васедемат шумордамста.
Мордовия Республикань Оцюнять Пресс-службац