28 февральста Культурань Республиканскяй дворецса Мордовиянь Оцюнясь Владимир Волков выступандась МР-нь Государственнай Собранияти эрь кизонь Посланиянц мархта.
МР-нь Оцюнять валонзон коряс, аф ваномок стакатнень-сталмотнень лангс, 2016 кизоня республикати удалась сатомс аф емла сатфкст. Инголи аськолкст тифтольхть экономикань сембе отраслятнень эса. ВРП-ть касомац пачкодсь 3,5 процентс, етай кизоннет лаца ванфтовсть инвестиционнай вложениятне. Касфтфоль эряма вастонь и кинь строямась, Саранскяйса панчфоль аф кржа эрявикс ки, строяфтольхть од кит республикань райоттнень эса. Заработнай платать касомац инголдазе инфляциять.
Поладовсь социальнай ширеть виияфнемац. Марса странань Правительствать мархта Мордовиянь руководствась тиендезе семботь, штоба лездомс ломаттненди, ванфтомс сембе социальнай гарантиятнень, етафтомс эряфс социальнай проекттнень. Тя работась поладови сяда товга.
«Китькстаса, што, аф ваномок аф теждя экономическяй ситуациять лангс, меля работаньке водендафоль аф аньцек кризисть сяськоманкса, но васендакиге экономикать и социальнай ширеть виияфнеманкса, - азозе Владимир Волков. – И тя пачфтемазь аф кальдяв результатс: Мордовиясь арась странань инь цебярь регионкс Россиянь Президентть Владимир Владимирович Путинонь «майскяй» Указонзон пяшкотькшнемаснон коряс. Минь пцтай аш шумоньке заработнай платать коряс, а безработицась – фкя инь емлась странаса».
ЭКОНОМИКАСЬ
Мордовиянь промышленнай производствать объемонза 2015 кизоть коряс кассть 108 процентта. 7 процентта кассть объемтне аграрнай секторса. Получаф республикать историяста серонь инь цебярь урожайсь, ладяф рекорд сахарнай якстеряпсонь кочкамать коряс, касфтф сиволень, алонь и мекольце кизотнень васенцеда – лофцонь производствась. 4 процентта сяда лама работада пяшкотьф строительстваса.
«2017 кизоня тейнек 5 процентта обеспечендама валовай региональнай продуктать касомац, промышленнай и сельскохозяйственнай производствать – 6 процентта. Пяшкодемс оцю программа эряма вастонь и социальнай объектонь строямать коряс. Среднероссийскяйть коряс 1,5-крда касфтома средняй месячнай зарплатась, тяка пингть инголдамок инфляциять, - отмечазе Владимир Волков. – Сяда тов виияфнемс республикать, а значит цебярьгофнемс ломаттнень эряфснон, ули кода аньцек эста кда тиендемс модернизация экономикань сембе отраслятнень эса».
Республикась сатсь цебярь результат инновационнай касондомаса-вииякшнемаса и сувси промышленнай производствань марстонь объемтнень эса инновационнай продукциять пяльксонц коряс региоттнень-лидерхнень еткс (28 процент)
Корхтамок ся задачатнень колга, конатнень путнесыне региононь руководствась, азсаськ, што тядде эряви лихтемс проекттнай мощностьс «Оптоволоконные системы» АО-ть видеса «Создание производства оптического волокна» проектть васенце очереденц и кярьмодемс омбоце очередти.
Поладома работась касомань-вииякшнемань несколька проектть эряфс етафнемасна. Тяконь лувксса шумордамс тяфтама проекттнень:
- кизоти 10 тежятть тонна алюминиевай катанка проектнай мощностьса алюминиевай металлургическяй производствать («Сарансккабель»);
- 1,5 миллиард цалковай проектнай мощностьса силовой кабелень од виттнень производстваснон(«ЭМ-КАБЕЛЬ»);
- кизоти 50 единица проектнай мощностьса вертикальнай стальной резервуаронь производствать (РМ Рейл РВС»);
- корпуснай и мягкай мебелень производствать коряс мебельнай фабрикать строяманц («Бертавуд»), коса эрь кизоня кармай нолневома мебелень15 тежянь комплект;
- 180 домокомплект и хозяйственнай постройкань 90 комплект проектнай мощностьса немецкяй технологиятнень коряс каркасно-панельнай куттнень производстваснон («ЭкоЛайф»);
А стане жа ушедомс продукциянь производствать сетевой приборонь Саранскяй заводса, коса кизоста арьсекшневи нолдамс 500 миллион цалковаень питнеса продукция.
Сембе тя проекттне максыхть возможность панжемс тежяньда лама од рабочай васта.
Тяда башка, эрявихть поладомс тяфтама проекттне:
- кизоти 130 МВт –с келептемс солнечнай электростанциянь компонентонь уликс производствать («Хелиос-Ресурс»), мезсь лезды занямс солнечнай рынкать пцтай пяленц, и 2018 кизоти пачфтемс производствань среднегодовой объемть 7 миллиартт цалковайс. Од рабочай васттнень лувкссна – 135;
- осветительнай приборонь техническяй перевооружениять и массовай производствать («Ардатовский светотехнический завод»), лисемок 5 миллиартт цалковай кизоньберьфонь объемс;
- келептемс цебярьгофтф характеристика мархта бактерициднай излучателень опытнай производствать («Лодыгинонь лемса НИИИС-сь»);
- силовой электроникань од элементнай базать производстванц («Орбита»), пачфтемок производствань объемтнень 2019 кизоти целайнек 2 миллиартт цалковайс. Тяда башка, «Орбитаса» тиема модернизация производственнай мощностттненди;
- шяняфтьф серань пачфнеманкса вагононь производствать («Рузхиммаш»). Тя 500 вагон кизоньберьф и 500 од рабочай васта;
Тя кизоня ушедомат од проектт:
- литьевой технологияс коре алюминиень катанкать и сонь сплавонзон производстваснон («Цветлит»). Проекттнай мощностец – 46 тежянь тонна кизоти;
- кизоти 150 миллион цалковай проектнай мощностьса велень хозяйствань техникань од виттнень производстваснон модернизациянц («МордовАгроМаш»);
- кирпичень производствать реконструкциянц, касфтомок объемтнень 60 миллион штукас («Рузаевский завод керамических изделий»);
- «Биохимикса» панжемс жидкай готовай лекарственнай препаратонь и активнай фармацевтическяй субстанциянь, опытно-промышленнай производствать, а стане жа Россияти эсь лацонь лекарствань од виттнень анокламаснон коряс научно-производственнай центрать, кона водендави импортть полафнеманкса («Биохимик»).
«Тейнек кемоста работама продукцияньконь экспортонц касфнеманц лангса. Тиема сембось, штоба касфтомс предприятиятнень лувксснон, конатненди вийс коре работамс мировой рынкаса. Экспортть касфнемаса оцю васта макссеви кластерхнень виияфнемаснонды. Мелянь октябрь ковста «Волоконная оптика и оптоэлектроника» промышленнай кластероньке лиссь сяськикс всероссийскяй конкурсса. Мордовиясь получазе «Развитие инновационнох кластеров – лидеров инвестиционной привлекательности мирового уровня» приоритетнай проектонь участниконь статусть и сувафтф Россиянь Минпромторгть реесторс кода регион, кона кармай получсема лезкс васенцетнень лувксса», - поладозе В.Д.Волков.
Мордовиянь Оцюнясь отмечазе странань ведущай научнай центратнень и школатнень мархта сотрудничествать виияфнеманц полаткшнеманц эрявиксшинц, касфтомс Мордовскяй госуниверситетонь технологиянь трансферонь Центрать, вуснень видеса емла инновационнай предприятиятнень, бизнес-инкубаторхнень рольснон, водендамс техническяй задачатнень решандаманксост изобритательхнень и рационализаторхнень.
«Сявомок мяльс сянь, што аф сырьевой экспортти господдержканкса маластонь колма кизотненди федеральнай бюджетса арьсеф 80 миллиард цалковай , республикань предприятиятненди , конат работайхть импортонь полафни проекттнень лангса, продукциянь экспортерхненди эряви активнайста сувсемс тя проекттненди, - азозе Владимир Волков.- Федеральнайть лаца минь стане жа панжеме промышленностень виифнемань Республиканскяй Фонд. Сонь лезксонц вельде предприятиятненди ули кода получамс 20 миллион цалковайста сявомок 100 миллион цалковайти молемс льготнай заем федеральнай фондста экспортоориентированнай проекттнень лангс».
ВЕЛЕНЬ ХОЗЯЙСТВАСЬ
Етай кизось мяляфтови Мордовиянь агропромышленнай комплекса рекорднай сатфкснень мархта. Тячи тя республикань экономикать касонды-вииякшни и пяк перспективнай отрасляц, фкя инь цебярсь странаса.
«Аграриеньконь оцю трудснон вельде получаф 1 миллион 314 тежянь тонна сера, тяконь лувксса 190 тежянь тонна кукуруза. Серотнень урожайностьсна пачкодсь 30 центнерс гектарста. Тя омбоце результатсь республикать историяса! Сахарнай якстеряпста гектарста сявфоль 434 центнер. Тя инь цебярь результатсь Приволжскяй округса. Сяда лама кочкаф перень серода, тяка пингть 16 тежянь тонна перень серось касфтовсь аралаф грунтса, мезсь 12 процентта сяда лама меляннеть коряс. Жуватань фкя пряти аноклаф 30 центнер кормовой единица, апак луфт сероть пяльксонц, - азозе В.Д.Волков. – Модать лангса работайхненди путф кеме фундамент сай пингонь урожайть алу. Озимой культуратне озафтфт 182 тежянь гектаронь площадьса. Вешфкснень педа-пес пяшкодеманкса видефт яровой культуратне. Аноклаф модась сахарнай якстеряпсть алу. Козякофневи велень хозяйствань техникань парксь. Аньцек меля рамаф 50 од трактор и 40 тяниень пингонь комбайна».
Рекорднай показательхть сатфт животноводстваса. Траксонь и нармонень сиволень производствать кизоньберьфонь объемонза пачкодсть 279 тежянь тоннас. Нолдаф 1 миллиард 422 миллион ал. Велень хозяйствань организациятнень и КФХ-тнень эса фкя траксста потяф пцтай 5700 килограмма лофца, мезсь 304 килограммада сяда лама 2015 кизоть коряс. Улихть хозяйстват, коса потяф кемонь тежяньда лама лофца. Тя Ичалковскяй райононь «Агро Мир» и «Дружба хозяйстватне (10107 килограмма и 10607 килограмма) и «Октябрьская» агрофирмать Елховскяй отделенияц (10288 килограмма).
«2017 кизоня эряви ванфтомс аграрнай производствать касоманц, нолдамс 287 тежянь тонна траксонь и нармонень сиволь эрек сталмоса, лофцта – 415 тонна и фкя траксста потямать пачфтемс 6000 килограмма. Алонь производствась должен пачкодемс 1 миллиард 450 миллион штукас, - мярьгсь МР-нь Оцюнясь. – Мялезе башка китькстамс: тяда инголе тейнек эрявкснесть кота кизот, штоба касфтомс лофцонь продуктивностть тежянь килограммада. Кафта кизода инголе минь тяка пингста получаме 5 тежятть. Тяни маласькоткшнетяма 6 тежяттненди! Тяфта, минь етасаьк тежянень рубежть колма кизоста! И тя тейнек сатовомшка! Андомать цебярьгофтоманкса и грамотнай селекционно-племенной работать вельде. Минь тя ширетнень эса ули минцень цебярь опытоньке. Эряви панжемс лофцть селекционнай качестванц мельге ваномать коряс лаборатория!».
Оцю задачат путфтольхть растениеводстваса. 2017 кизоня кочкама аф 1 миллион 330 тежянь тоннада кржа сера, а маластонь кафта кизотнень – 1,5 миллион тонна, мезенкса 10 тежятть гектарда касфтомат витцеви площаттне.
«Эряви сяда активнайста виияфнемс крестьянскяй (фермерскяй) хозяйстватнень. Тяниень пингть республикаса эздост тежяньда лама, синь касфнисазь серотнень пцтай 12 процентснон, ули синцень пялькссна лофцонь и сиволень рынкаса. Тяда башка, фермероньке примсихть участия нинге фкя пяк эрявикс задачать решандамаса – синь обеспечендакшнесазь велень населениять заняфшинц», - азозе Мордовиянь Оцюнясь.
Мекольдень кизотнень касфневи пищевой и перерабатывающай промышленностень производствась.
Нолдаф 95 тежяньда тоннада лама колбаснай изделия, пцтай 16 тежянь тонна сыр, 109 тежянь тонна сахар.
Мордовиянь товархнень качествасна кемоксневи аграрийхнень международнай и всероссийскяй выставкатнень эса цебярь участияснон мархта. Аньцек меля «Золотая осень» выставкаса предприятияньке получасть рекорднай лувксса медальхть – 26 золотань и 10 сиянь. И кафксоце кизось мельцек республиканьке сявондьсы Гран-прить.
«Переработкань предприятияньконь пяк цебярьхть шанссна международнай рынкав лисеманкса. Федеральнай уровеньца примсевихть ширень кирнемань мерат велень хозяйствань продукциянь производствать и экспортть касфнеманкса. Тянь колга пачфтсь В.В.Путин стратегическяй касомать-вииякшнемать и приоритетнай проекттнень коряс Советть заседаниясонза, - азозе Владимир Волков. – Штоба етафтомс эряфс арьсефоньконь, тядде поладома ламоц инвестиционнай проекттнень эряфс етафнемасна, тяконь лувкссот тяфтамотне, кода: 95 тежянь тоннас, а сяда тов 140 тежянь тоннас колбасань производствать касфнемац ( «Атяшевский» МПК-сь); пищевой компаунттнень производстваснон коряс эксплуатационнай линиять тевс сувафтомац ( «Рузово»). А стане жа кярьмодемс од эрявикс проекттнень эряфс етафнемаснонды: лофцть переработканц коряс цехть строяманцты («Норовское молоко»); Атяшевань мясокомбинатса касфтомс сивольть кельмофтеманц коряс мощность суткати 50 тоннас; келептемс зерненнай мичкть производстванц мощностензон суткати 10 тоннат Анок продукцияс («Саранский» молочнай комбинатсь); 1300 тоннат перень сера производствань объемса од тепличнай комплексть строяманцты («Тепличное»).
Велень хозяйствань производствась аф явоштовиста сотф велеть социальнай ширде сьмекаманц-ладяманц коряс работать мархта. Меля «Устойчивое развитие сельских территорий» программас коре эряма вастонь условиятнень цебярьгофтоманкса господдержка получась 192 семьясь, тевс сувафтф 17 тежянь квадратнай метра эряма васта, ладяф 51 вайгяльбе водопроводнай и 12 вайгяльбе газовай сеть.
Строяфт и тевс сувафтфт : 150 тонафниень вастонди школа Оцю Игнатоваса, 75 вастонди идень сад Ковылкинскяй райононь Кочелаево велеса и 55 вастонди Ардатовскяй райононь Баево велеса, 120 вастонди культурань куд Краснослободскяй райононь Куликово велеса, социальнай центра Баево велеса, ФАП Ичалковскяй райононь Кергуды велеса, стадион Атюрьеваса.
«Тядде поладома велеса эряма вастонь строямась – тянкса федеральнай бюджетста нолдаф 161 миллион цалковай. Ня средстватнень лангс республикать участиянц мархта новоселья праздновандайхть нинге кафта сядода лама семьясь. Поладови водо- и газоснабжениянь объекттнень строямасна. Эряви шумордамс Ковылкинскяй райононь Кочелаево велеса комплекснай компактнай застройкать коряс проектсь и кярьмодемс Дубенскяй райононь Ардатово велеса од проектть эряфс етафнеманцты», - мярьгсь республикань Оцюнясь.
СТРОИТЕЛЬНАЯ ОТРАСЛЯСЬ
Мелянь кизось удалафоль строительнай отрасляти. Работань объемтне тяса касфтовсть 27 миллиард цалковайс. Строяф 328 тежянь квадратнай метра эряма васта, мезсь 4 тежяньда сяда лама 2015 кизоть коряс. Сяда активнайста кармасть нолневома тевс тяниень пингонь технологиятьне и отделочнай материалхне.
Тяддевок строительхнень инголе путневихть оцю задачат. Работань объемтнень эряви касфтомс 7 процентта и строямс 335 тежянь квадратнай метра эряма васта, тяконь лувксса эконом-классонь 202 тежянь квадратнай метра. Тяка пингть башка мяль шарфтома «Жилье для российской семьи» программас коре комплекснай застройкати.
«Стане жа обеспечендама лама идень семьятненди эряма вастонь строяманкса земельнай участкатнень лангса коммунальнай и транспортнай инфраструктурать ладяманц коряс странань Президентть «майскяй указонзон» пяшкодемасна, - азозе МР-нь Оцюнясь. – Сяда товга нолнема тевс ипотекась. Тяка пингть сяда келиста тевс нолнемат строительствать алу документонь оформляндамать коряс од условиятне. Маластонь колма кизотнень ипотечнай и аренднай проекттнень ширеснон кирнеманкса странаса эрь кизоня кармай нолневома 20 миллиард цалковаень».
Федеральнай бюджетста 2,3 миллиард цалковаень лувксса финансовай лезксть вельде строяф, тиф капитальнай ремонт и реконструкция 83 вайгяльбень кувалмоса кинди. Шумордаф фкя инь эрявикс трассать строямац, кона сотнесыне Саранскяйть кафта райононзон – Светотехстройть и Юго-Западть. Сувафтфт тевс аэропортти лисемать обеспечендакшнесы развязкась (Красная и Севостопольская ульцятнень кирашкса) и аэропортти вяти тратуар и велосипеднай киня мархта кись. Полатф Восточнай ширде Саранскяйть шароманц коряс кись, кона сотнесыне «Саранск – Ульяновск» и Ялга поселкать ваксста «Саранск – Рузаевка» китнень.
Меля кинь строяманкса муниципальнай образованиятне получасть 200 миллион цалковай. Тя лездсь строямс и тиемс реконструкция комсь велень поселенияса 20 вайгяльбеда ламонь кувалмоса кинди, тиемс реконструкция велень хозяйствань продукциянь производствань и переработкань объекттненди вяти китненди.
«Тядде кинь строяманкса нолдави пцтай 5 миллиартт цалковай. Тейнек эряви тиемс ремонт и строямс 90 вайгяльбень кувалмоса федеральнай ки и 37 вайгяльбень кувалмоса региональнай и местнай ки. Тяконь лувксса, поладомс Саранскяйть восточнай шароманц коряс кить, тиемс реконструкция и ремонт «Подъезд к Саранску от автодороги М-5 «Урал» кить несколька участканзон эса Торбеевскяй, краснослободскяй, Старошайговскяй и башка Лямбирскяй райоттнень эса, «Нижний Новгород – Саранск – Пенза – Саратов» кить лангса Лямбирскяй и Рузаевскяй райоттнень эса и «Саранск – Ульяновск» кить лангса Чамзинскяй районца. Оцю значенияц Дубенки велеса тя кить участканц строяманц аделаманц, - азозе В.Д.Волков. – Путнян Правительствать инголе кода инь важнай задача максомс федеральнай собственностьс «Лямбирское шоссе – «Тепличное» участкаса «Северный обход Саранска» кить и тиемс теенза капительнай ремонт. Тяда башка, Лямбирскяй шоссеса тиемс ремонт Светотехстройста ГАИ-ти вяти участкати».
Тядде велень китнень строяманкса республикась получай средствада кафтонь-крда сяда лама мелянь кизоть коряс. 160 миллион цалковайда ламось туйхть автотрассать эзда велень хозяйствань продукциянь производствань и переработкань объекттненди, велень поселениятненди вяти китнень строяманкса и теест реконструкциянь тиеманкса.
Республиканскяй дорожнай фондть эзда местнай китнень цебярьгофнеманкса муниципальнай образованиятненди нолдаф 305 миллион цалковай.
ЖИЛИЩНО-КОММУНАЛЬНАЙ ХОЗЯЙСТВАСЬ
Меля оцю работа тиф жилищно-коммунальнай хозяйствань объекттнень одкстоптоманкса. Государственно-частнай партнерствань схемать коряс Ковылкинскяй, Рузаевскяй и Большеигнатовскяй райоттнень эса строяф 8 автоматизированнай блочно-модульнай котельнай, тиф модернизация котельнайхненди и теплоснабжениянь сеттненди Чамзинка и Комсомольский поселкатнень эса. Ковылкинскяй и Чамзинскяй райоттнень эса кемокстафт концессионнай соглашеният теплоснабжениянь объекттнень модернизацияснон коряс, тянди тядде арьсекшневи путомс 230 миллион цалковаень лувксса вложения.
Тядде райоттнень эса эряви тиемс модернизация 12 объектонди 1,2 миллиард цалковаень питнеса. Райоттнень администрациясна обязатт тонадомс и эффективнайста нолнемс тевс государственно-частнай партнерствань механизматнень. 2017 кизоть Россиянь Президентсь азозе Экологиянь кизокс. Республикаса экологическяй обстановкать цебярьгофтоманцты аф емла путкс путы Саранскяйса очистной сооружениянь од линиясь, кона строяви Россиянь Правительствать и реконструкциянь и вииякшнемань Международнай банкать марстонь проектснон рамкаса. Сембе работатнень тяса эряви шумордамс колмоце кварталста.
Стаки мольфтеви ломаттнень аварийнай эряма вастста етафтомаснон коряс работась. Тянкса нолдаф пцтай 5 миллиртт цалковай. Тя лездсь срафтомс-калафтомс 400 аварийнай куд, строямс 115 тежянь квадратнай метрань площадьса од эряма вастт, етафтомс тоза эряма 5700 ломань. Тяддень 1 сентябрть самс эряви срафтомс нинге 23 тежянь квадратнай метрат аврийнай эряма васта, и етафтомс эздост 1600 лама ломань.
Меля капитальнай ремонт тифоль 984 тежянь квадратнай метрань марстонь площадьса 293 лама квартиранди, конатнень эса эряй 43 тежянь ломань. Тядде работань объемсь кармай сяда оцю – эряви тиемс ремонт 351 кудти и цебярьгофтомс эрямань условияснон 56 тежянь ломанть. Башка мяль шарфтома тиеви ремонтть качестванц лангс . Подряднай организациятнень работаснон мельге ваномаса должетт активнайста участвондамс Государственнай жилищнай инспекциясь, организациятне, конат пяшкотькшнесазь техническяй надзорть и , конешна, синць лама квартираса куттнень эряйсна.
«Штоба аф коламс капремонтонь программать, эряви обеспечендамс сонь финансированиянц. Тя васендакиге тиема Саранскяень, Рузаевкань и Атюрьевань администрациятненди, коса капитальнай ремонтонкса пандомать мархта сотф тефне аф мялень кеподихть. А кочкаф средстватнень лангс, - нинге весть шарфтан мяль тянь лангс, - тиемс пяк качественнай ремонт, конац меле аф эвондафты кизефкст эряйхнень ширде, - отмечазе Владимир Волков. –Стане жа тядде эряви аделамс Ардатовскяй, Атяшевскяй, Зубово-Полянскяй, Инсарскяй, Кадошкинскяй, Темниковскяй, Атюрьевскяй райоттнень эса расчетнай центратнень строямаснон».
Стане жа мярькфоль шарфтомс башка мяль поселениятнень эса цебярь условиянь тиендемати. Общественнай пространствать виифнемаса важна сембось: кода валдопневихть ульцятне, кода ладяфт тратуархне, идень площадкатне, пешеходнай зонатне, кодама состояниясот паркне, китне, общественнай транспортонь остановкатне, кода няфтихть ваймосемань васттне. Тяни тянкса эвондасть дополнительнай возможностть – «ЖКХ и городская среда» проектсь сувась странань Президентть В.В.Путинонь мархта азф приоритетнай проекттнень лувксс.
Маластонь колма кизотнень Саранскяйти и республикань райоттненди эрявихть етафтомс эряфс эсь территорияснон благоустройстваснон коряс проекттнень. Тянкса аньцек тядде нолдави 200 миллион цалковайда лама. Благоустройствать коряс оцю работа тиема Саранскяйса, тяконь лувксса ульцянь дорожнай сетть модернизациянц коряс. Эряви тиемс ремонт и реконструкция Васенко, Ботевградская, Т.Бибинать, Луховка поселкаса Заводской и Николаевка поселкаса Октябрьскяй ульцятнень эзга китненди. Тяда башка, сентябрть самс аделама ошть маласта кота велетнень эса водопровоттнень строямаснон коряс тяддень программась.
«Тиема сембось, штоба ломаттне няелезь цебярь шири полафткснень. Отмечаса стане жа, што тя проектса участвондамать тейнек оцю значенияц 2018 кизонь чемпионатти анокламатнень карша, - азозе Мордовиянь Оцюнясь. – Башка китькстаса: аноклави сембе проекттнень колга лац-ряц корхнема синцень эряйхнень мархт. Должен эвондамс благоустройствать коряс синь инициативаснон ширеснон кирнемаснон механизмац. Тяда инголе ульсь цебярь практика казендемс куттнень и куд перьфнень обустроендаманкса активнай участиянкса. Инь цебярьхненди макссевсь «Дом образцового содержания» званиясь. Эряви эреклафтомс тя конкурсть и казендемс казнет сяськихненди».
2018 КИЗОНЬ МИРОНЬ ЧЕМПИОНАТСЬ
Республикати эрявихть сувафтомс тевс чемпионатонь сембе объекттнень тядде ни. Тяниень пингть ламоц работатне вятевихть графикс коре, а кой-конат нльне инголясазь сонь. Тяка пингть ламоц мероприятиятне эряфс етафневихть пяк стакаста.
«Правительствати эряви виияфтомс марстонь работать «Спорт-Инжинирингть» и «Казань» ПСО-ть мархта, ваномс сянь мельге, штоба чемпионатонь инь важнай объектть – стадионтть эса работатне мольфтевольхть графикс коре. Шоворькшнема и Саранскяень аэропортть реконструкциянцты, решандакшнемс кизефкснень пассажирскяй од терминалть строяманц коряс, - отмечазе В.Д.Волков. – Эряви вишкоптомс Саранск и Рузаевка станциятнень эса пешеходнай седнятнень реконструкцияснон, маласта работамс «РЖД-ть» мархта и шумордамс ня проекттнень кизоть аделавомс. Целевой программань министерствась обязаннай обеспечендамс «Шератон» и «Меркюри» гостиницатнень тевс сувафтомаснон, шумордамс строительно-монтажнай работатнень «Тавла» гостинично-жилой комплексса. Саранск ошень округонь Администрацияти эрявихть пяшкодемс сембе обязательстватнень ФИФА-ть и «Россия-2018» Оргкомитетть ингольде».
ОБРАЗОВАНИЯСЬ
Мекольце вете кизотнень Мордовияса строяф и тиф реконструкция 52 идень садонди, панчф 6,5 тежянь дополнительнай васта. Тянкса карьхцяф 2 миллиартт цалковай. Обеспечендаф дошкольнай образованиять сяда процентонь доступностец 3 кизоста сявомок 7 кизотненди молемс шабатнень еткса.
«Тейнек мяляфтома, што од условиятне тиендевихть, васендакиге, тонафнемань тяниень пингонь метоттнень эряфс етафнеманкса. Идень садса ни эряви сяда келиста нолнемс тевс программатнень, конат виияфнесазь шабатнень эса творческяй и изобритательскяй асушить. Миньцонк лама частнай центрада, коса макссевихть платнай услугат, конатненди оцю вешфкссь родительхнень ширде. Корхтамась мольфтеви емланястокиге омаба масторонь кяльть тонафнеманц, аф фкя лацонь творческяй студиятнень, од техниконь кружокнень и лиятнень колга. Образованиянь министерствати виияфнема тя ширесь государственно-частнай партнерствань принципнень лангса, макссемс лезкс тяфтама образовательнай программатнень эряфс етафнемасост», - мярьгсь Мордовиянь Оцюнясь.
Кда корхтамс школатнень колга, синь должетт работамс эряфть вешфксонзон коряс, нолнемс тевс информационнай технологиятнень и дистанционнай обучениять. Тянкса аф сатомшка явомс иттненди ноутбукт, путомс электроннай доска и лемдемс тянь электроннай образованиякс. Эрявихть виияфнемс соткснень тонафтыть и тонафнить еткса.
Ниле кизоста республикаса строяфт 5 од школат. Тядде эряви аделамс Саранскяень Солнечнай ульцяса 550 вастонди, Инсарса 1№ и Дубенскяй райононь Поводимово велеса школатнень рекострукцияснон. Кярьмодемс Краснослободскяйса и Рузаевкаса од школатнень строямаснонды.
«Вете кизода меле школьниконь ке должетт тонафнемс фкя сменаса, а 2025 кизоти сембе школатне должетт отвечамс тяниень пингонь вешфксненди, - азозе Владимир Волков. – Мордовиясь странаса васенцетнень еткста получась средстват «Юбилейный» микрорайонца од школать строяманкса , коса тонафнема кармай пцтай 1,5 тежянь идь. «Тавла» образованиянь центрась должен арамс сай пингонь эталоннай школакс! Кода и Асу шабанди республиканскяй лицейса тясовок тиема инновационнай площадка, конань лангса кармайхть тонафневома тяниень пингонь инь од технологиятне и методикатне. Меля Всероссийскяй олимпиадатнень эса Мордовиянь школьникне сатсть 45 призовой васта. Тя рекорд марнек олимпиаднай движениять пингста!».
Омбоце кизось мельцек Асу шабанди республиканскяй лицейсь занцесы омбоце вастть Россиянь 500 инь цебярь школатнень рейтингсост. Рейтингти стане жа повсть 4№ лицейсь, 12№ гимназиясь, 1№ школась, Краснослободскяень школась, а стане жа кафта велень школат Ельниковскяй и Торбеевскяй райоттнень эзда.
«Эряви, штоба преподавательсь аф аньцек лац содальхце предметонц, но и улель цебярь психолог и цебярь наставник. Учительть васенце задачат виияфнемс шабатнень эса критическяй мышлениять, арьсема маштомать и самостоятельнайста работамать. Лиякс, кодама физик или агроном касы шабать эзда, кда 1 класса ни кудонь заданиятнень инксонза тиендьсазь сембе, аньцек аф сонць? Да, тейнек лезнема шабаньконди, но аф эряви тиендемс семботь вастозозт. Тя арась оцю прябалакс родительхненди».
Башка мяль шарфнема патриотическяй воспитанияти. Тиендема тя идень садста сявомок. Виияфтомат «Российское движение школьников» проектсь, военно-патриотическяй работась, спортонь военно-прикладной виттне. Республикаса активнайста виияфневи «Юнармия» общественнай движениясь. Юнармеецень отрядсь должен улемс пуроптф республикань сембе райоттнень эса.
Республикаса тиендеви модернизация профессиональнай образованияти. Тя сфераса виияфневи государственно-частнай партнерствась. Панчф 12 образовательно-производственнай комплекс, прикладной квалификациянь 4 многофункциональнай центрат. Тядде должен ушедомс работама «Строительные технологии» направленияс коре центрась.
Коль сяда активнайста тевс сувафневи дуальнай тонафнемань модельсь. Мзярда анокламать теоретическяй пяльксоц етни техникумть видеса, а практическяйсь – рабочай вастса. Тяфтама тонафнемась ладяф миньцонк 14 программас коре и пуропни 500-да лама студент. Специалистонь анокламати шоворсть экономикань реальнай секторонь 460 представительсь. Етксост оцю предприятият, кепотьксонди, «Станкостроительсь», Мордовагромашсь», «Восток» МАПО-сь, а стане жа средняй и емла бизнесонь представительхне.
«Кизоть аделавомс аф 30 процентта кржас должен касомс студенттнень лувкссна, конат получайхть образования целевой обучениять основаса. Колледжста или техникумста должен лисемс афкуксонь мастер, конанди ули вешфкс обществаса. А синь дипломсна должен арамс цебярь работань получаманкса цебярь гарантиякс» - поладозе Владимир Волков.
Фкя инь важнай темась – высшай школать развитияц. Вете кизоста университетть виияфнеманц коряс Программать рамкаса панчф мировой уровенень 80-да лама лаборатория, строяфтод корпуст и общежитият. Путневи задача ладямс инновацияттнень виияфнемаснон коряс система, кона лезды университетти добувамс эсь интеллектуальнай продукциянц лангса. Университетть несколька проектонц, конат етафневихть эряфс марса ведущай предприятиятнень, Мордовиянь Технопаркть мархта, оцю значениясна отечественнай промышленностти. Васендакиге корхтамась мольфтеви оптическяй волокнать производстванц коряс заводть и энергоэффективнай кластеронь предприятиятнень мархта марстонь раблотать колга.
«Тядде университетти марса «Электровыпрямительть» мархта эряви кярьмодемс кремниень карбидонь монокристалхнень касфнемаснон коряс проектть сяда товолдонь этапонцты. Тянь вельде маластонь колма кизотнень анокламат и сувафтомат производствати полупроводниковай приборонь од поколениять, - отмечазе Мордовиянь Оцюнясь. – Маластонь пингть вузти ладяма марстонь работа «Оптикэнерго» компаниянь группать, Саранскяй телевизионнай заводть, агропромышленнай комплексонь ламоц предприятиятнень мархта. Инь важнай задачатне вузти – НИОКР-нь объемтнень касфнемасна, предприятиятнень мархта сотрудничествать келепнемац».
ЗДРАВООХРАНЕНИЯСЬ
Мекольдень вете кизотнень Мордовияса тиф оцю работа здравоохранениять материально-техническяй базанц кемокснеманкса , специалисттнень анокламанкса, тяниень пингонь медицинскяй центратнень панжеманкса. Аделавсь колма уровенень системать пуроптомац. Строяф 55 и капитальнай ремонт тиф сядода лама медицинскяй объектса.
«Меля минь ушедоськ од поликлиникатнень строямаснон, иденнеть и оцювоннеть, «Юбилейный» жилой комплексса, Республиканскяй онкодиспансерть поликлиниканц. Кярьмодеме Идень республиканскяй больницять хирургическяй корпусонц строяманцты. Пяк важна поладомс работать велень фельдшерско-акушерскяй пункттнень стройсемаснон коряс, строямс нинге 54 ФАП, сядода ламоть эса тиемс ремонт», - азозе МР-нь Оцюнясь.
Тядде шумордама Ситуационнай центрать строямац, кона ваны «Скорай помощть» работанц мельге.
«Тядде сядонга вииста сувафнемат здравоохраненияти инновационнай технологиятне. Отчеттнень коряс республикаса компьютезировандаф медработниконь васттнень 70 процентсна. Но сидеста уленди стане, што врачсь васенда тяштьсы семботь кядьсонза, а меле печатласы компьютерса, - отмечазе Владимир Волков. – Россиянь Президентсь В.В.Путин Посланиясонза китькстазе, што врачнень эряви нолдамс кагодонь пяшкотькшнемать эзда, максомс теест сяда лама пинге сярядить мархта работаманкса».
Республикань ламоц центратнень эса – Сосудистайса, Перинатальнайса, Республиканскяй клиническяй больницяса - макссеви оцю технологиянь лезкс, кона отвечай международнай стандарттненди. Сембе синь обеспечендафт тяниень пингонь инь од оборудованияса. Вете кизоста республикань эряйхнень лувкссна, конат получасть оцю технологиянь лезкс, кассь кафтонь-крда. Кизоста колмонь-крда кирсь шири пчксема тушендыхнень лувкссна.
«Медицинать качестванц колга ломаттне корхтайхть аптекаса эрявикс лекарственнай препараттнень сатнемаснон, синь питнеснон мяльс сявондезь. Правительствати башка контроль ала кирдема «Фармация» ГУП-ть виияфнеманц коряс программась. Кд аминь путоме задача тиемс порядка медицинскяй учреждениятнень видеста аптекатнень работаснонды, то сон должен пяшкотькшневомс оперативнайста. Лиякс лиси, што фкя аптекась больницяста тусь, а омбоцесь сонь вастсонза нинге ашезь эвонда.
Тяниень пингонь оборудования мархта центратне аф эффективнайхть профессионалфтома, конат путнесазь эсь тевснонды ваймонь пялькскяснон и содамошиснон. Тянь колга мяляфтома руководительхненди».
Здравоохранениянь отрасляса улихть сатфкст. Главнай результатсь – республикаса смертностть киремац. Меля Мордовиясь получазе «Время жить!» всероссийскяй премиять, арамок инь цебярь регионкс инсультть сюнеда кулсихнень лувксснон кирьфтаманц коряс. Оцю путксоц тя сатфксти Сосудистай центрать.
Республикаса стаки инь емла показательсь атнайнятнень еткса кулсематнень коряс. Мекольдень вете кизоста сон кирсь пцтай кафтонь-крда. Здравоохранениянь Всемирнай организациять мяленц коряс, тя фкя и тяка ширесь, кона инь лац няфнесы регионца здравоохранениять состояниянц. Азома, што меля ашель тядянь кулсемань фкявок случай.
СПОРТСЬ
Мордовиясь меля тага азфоль инь спортивнай ошекс. Эряйхнень лувкссна, конат фалу занцихть пря спортса, фалу касонды и пачкодсь 36 процентс.
Арьсекшневи Петр Григорьевич Болотниковонь лятфнеманкса легкоатлетическяй пробегти максомс международнаень статусть и тиемс сонь Мордовиять визитнай карточкакс.
«Эряви шарфтомс башка мяль шабатнень и подросткатнень еткса любительскяй пялькстоматненди, аф фкя лацонь спартакиадатненди и семейнай состязаниятненди, кирнемс сятнень ширеснон, кит пуропнихть дворовай командат, - азозе В.Д.Волков. – Тя кизоста сявомок арьсекшневи сембе вастова тевс сувафтомс ГТО-ть. Шарфтома мяль школьнай и студенческяй спортти. Цебярьхть коенза-обуцянза республикаса шахмататнень. Шарфтома мяль тренерхнень-преподавательхнень анокламаснонды».
«Мордовия» футбольнай клубть инголе путфоль конкретнай задача – командать составса налхкихнень пялесна должетт улемс местнай воспитаникт.
Фкя инь важнай задачась – спортивнай резервать анокламац. Спортонь сембе виттнень эса васендакиге мяль шарфтома минцень спортсменоньконь анокламаснонды. Нолнемс средстват шабатнень асуснон, мастерстваснон касфнеманкса, а аф «легионеронь» рамсеманкса. Оцю классонь спортсменонь анокламста тевс нолнемат тяниень пингонь методикатне, сявондема мяльс мировой опытсь. Минспортти опеспечендама учрежденияньконь идень спортивнай школатнень модернизацияснон, синь оборудованияса и инвентарьса козякофнемаснон коряс од федеральнай программать эса результатонь канни участияц», - поладозе Владимир Волков.
ТУРИЗМАСЬ
Гостиничнай инфраструктурась активнайста вииякшни. Достопримечательносттнень мархта прябалат стане жа аш. Нинге фкя вии ширеньке – ошень од инфраструктурась, Саранскяйть пцтай марнек центрац строяф оду, а ульцяньконь арушиснон путнесазь примеронди.
Региональнай туризмать виияфнемаса башка васта макссеви конечнай турпокеттнень анокламаснонды, конатнень активнайста мишенделезь российскяй фкя инь оцю туроператорхне. Меля аноклафоль туризмань сфераса инвестиционнай проектонь реестр.
«Сяда тов азан мяль лисендемс аньцек конкретнай результаттнень эзда, штоба ста каф карьхцендакшнемс бюджетнай ярмакнень. Катк миньцонк ули аньцек 3-5 туристскяй маршрут, но синь улихть педа-пес аноклафт. Аньцек тяфта тейнек сафтови сувафтомс синь российскяй турфирматнень «менюзост», - отмечазе МР-нь Оцюнясь.
Региональнай власттненди сави вятемс работа туристскяй объекттнень благоустройстваснон, национальнай кухня мархта кафетнень, сувенирнай продукция мархта магазиттнень панчсемаснон, туристическяй автобусненди парковкань латцемать коряс.
КУЛЬТУРАСЬ
Лама кизефкста сотф культурань объекттнень строямаснон и ремонцнон мархта. Аф кунара капитальнай реконструкцияда меле пажевсь Русскяй драматическяй театрась. Тядде кенькшензон панчсыне Музейно-архивнай комплекссь.
«Тейнек эряви шумордамс Кочкуровань Культурань кудть строяманц, а стане жа Рузаевкаса Ухтомскяень клубонц реконструкциянц. Китькстаса, тя и лия объекттнень квалма корхтафоль кочкамада ингольдень накаснень эса, и минь обязаттама тиемс семботь, мезе надияфтоме ломаттненди, - поладозе Владимир Волков. – Аноклаф 2020 кизоть самс театральнай тевть виияфнеманц Концепцияц. Минь примаме решения тяддень кизоста сявомок макссемс 5 миллиотт цалковаень лувксса специальнай грантт театратнень творческяй проектснон ширеснон кирнеманкса, од постановкань анокламанкса, гастролень пуропнеманкса. Тяда башка, эряви шарфтомс башка мяль идень и самодеятельнай театральнай студиятнень виияфнемаснонды, тяниень пингонь отечественнай литературань произведениятнень популярностьснон касфнеманцты».
***
Мордовиянь Оцюнясь Владимир Волков китькстазе, што задачатне, конат азфт Посланияса, пяк стакат. Но синь пяшкодемасна пяк эрявикс республикать касоманкса-вииякшнеманкса.
«Тядде тейнек сави работамс стане, кода ашеме работце тяда инголе. И тянь должетт шарьхкотькшнемс сембе. Аньцек тяфта удалай сатомс путф цельхнень. Аньцек тяфта пяшкодьсаськ ломаттнень надиямаснон, - отмечазе республикань вятись. – Легендарнай путешественникть и гуманистт Нансенонь, стака пингста Россиять цебярь ялганц, ульсь девизоц: «Стака – тя ся, мезсь может улемс тиф эстокиге. Аф тиевомшкась веши аф ламода сяда лама пинге». Тя валхнень эзда должен ащемсь ся настройсь, конань мархта Мордовиясь кармай молема од сатфксонкса 2017 кизоня.
Кода и тяда инголе, минь башка мяль карматама шарфнема высокотехнологичнай промышленностти, велень хозяйствати, касфнема строительствань объемтнень. Кеме нежекс арайхть тейнек гражданскяй обществань институттнень, объединениятнень, массовай информациянь средстватнень активнай участиясна, ломаненьконь, конат аф лядондыхть озадонь седихть странаньконь и республиканьконь сай пингснонды, эсь судьбаснонды, оцю гражданскяй позициясна».