15 декабрьста Республикань Кудса ётафтфоль пуромкс, коса корхтафоль «Безопасные и качественные автомобильные дороги» национальнай проектть колга. Пуромксса ульсь «Москва — Нижний Новгород» Упрдор ФКУ-ть управлениянц оцюняц Сергей Карпов.
Тифтольхть итокт тяддень кизоти и корхтафоль сай пингонди платтнень колга. Тядде республикаса кинь строяманкса нолдаф 5 миллиартта лама цалковай, эздост 2 миллиартта лама цалковайсь — тя федеральнай бюджетонь ярмакт. Лятфтасаськ, тяддень августста Россиянь Президентть мярьгоманц коряс республикати максфоль 500 миллион цалковаень лувксса финансирования РФ-нь Правительствать Резервнай фондстонза региональнай, межмуниципальнай и местнай китнень петеманкса, конат явфтольхть субсидия лаца муниципальнай образованиятненди.
Тяддень сентябрьста Владимир Путин кемокстась мярьгомат Мордовиять социальнай и экономическяй виияфнеманкса, кафттне конатнень ёткста стане жа сотфт кинь строямать мархта.
Фкясь — тя Моску — Нижняй Новгород — Казань автомобильнай кить Саранскяйть и Рузаевкать мархта сотнемац. Арзамасста Саранскяйть и Рузаевкать эзга Пензенскяй областти молемс автомобильнай кись тиема ниле китьксса. Проектнай документациять анокламац ушедови сай кизоня.
Омбоце проектсь — тя кись, кона видеста сотнесы Темниковать Дивеевать мархта. Сонь строямац ламода кирьфтасы Санаксарскяй и Дивеевскяй монастырьхнень ёткса вастть: 130 вайгяльбеста сявомок 60 вайгяльбес молемс.
Стане жа пуромксса ванфтольхть лия кизефкст, тяконь лувксса корхтафоль мератнень колга, конат перясазь кить ки лангонь зияттненди.
Мордовия Республикань Оцюнять пресс-службац