7 декабрьста Республикань Кудса ётась торжественнай пуромкс, кона лемтьфоль Доброволецонь (волонтеронь) шити. Мероприятиянь участникнень поздравляндазень Мордовиянь Оцюнять аф лама пингс тевонзон тиендисна Артём Здунов. Сон азозе, што республиканьке примси активнай участия Россиянь добровольческяй движениять эса—тячи волонтерскяй тевти водендафт Мордовиянь пцтай 38 тёжянь эряйсь. И тя аф аньцек од ломатть, но и эряфкшуфт, и нльне шумбрашинь ограниченнай возможность мархта ломатть.
Доброволецне кярьмотькшнихть эрь кодама тевс: трудендайхть больницятнень и социальнай учреждениятнень эса, лезнихть ветераттненди, инвалитттненди, уроз шабатненди и лама идень семьятненди. Синьфтемост республикаса аф ётни фкявок оцю мероприятия.
Республикань вятись азозе, што од коронавируснай инфекциять келемомста волонтерхне макссихть оцюдонга оцю лезкс пандемиять каршес тюремаса. «Васенце этапса медицинскяй работникненди, эряфкшуфненди, кальдяв шумбраши мархта ломаттненди лездома састь 600 лама волонтерсь-медиксь. Синь примсесть заявкат телефононь пачк, рамсесть и пачфнесть лекарстват, ярхцамбяльхть и араламань средстват, лезнесть сире ломаттненди эрь кодама тевса. Кепотьксонди, «Минь марсотама» всероссийскяй акциять мяльса кирдезь ярхцамбялень лезкс получасть 20 тёжяньда лама пенсионерсь,—мярьгсь Артём Здунов.—Мзярда, «пси линияв» сашенды обращениятнень лувкссна ушедсь касома, республикаса пуроптфоль доброволецонь нинге фкя штаб, коза сувасть «Победань волонтерхне». «Теенза поладсть пцтай сембе НКО-тне, бизнесонь и оцю предприятиянь представительхне, конат сявондсть шефства больницятнень лангса, рамсесть тяза оборудования, транспорт, араламань средстват, макссесть благотворительнай лезкс».
Мордовиянь Оцюнять аф лама пингс тевонзон тиендисна китькстазе, што лувондсыне волонтерхнень важнай кадровай резервакс.
«Минь путнетяма оцю надиямат од ломаттнень маштомошиснон, содамошиснон лангс, тинь мялентень-арьсемантень лангс. Тинь нажадема вастоньке, ученттама эздонтт од предложеният»,—мярьгсь Артём Здунов.
Республикань Оцюнять аф лама пингс тевонзон тиендисна спасибась волонтерхненди активнай гражданскяй позицияснон инкса, арьсесь теест шумбраши и сатфкст эрь кодама тевсост, а стане жа казезень добровольческяй движениянь инь цебярь представительхнень казнеса. Тяконь лувксса волонтерхне казьфтольхть Россиянь Президентть памятнай медаленц и «Добровольцы Мордовии» республикань Оцюнять Почётнай знаконц мархта.
Стане жа пуромксть пингста Артём Здунов путсь ушеткс «Мялень кузня» благотворительнай акцияти, сон ётафневи эряфс «Мечтай со мной» Всероссийскяй проектть мяльса кирдезь, кона сувси «Россиясь - возможностень страна» президентскяй платформати. Артём Алексеевич валхтсь илань кузнять лангста республикань шабатнень мяльснон-арьсемаснон мархта кафта открыткат и сявозень мархтонза, штоба пяшкодемс синь.
Мордовия Республикань Оцюнять пресс-службац