22 июльста Мордовиянь Оцюнять аф лама пингс тевонзон тиендисна Артём Здунов видеосвязень режимса етафтозе коронавируснай инфекциять профилактиканц и келемоманцты кить персеманц коряс региональнай оперативнай штабть очередной заседаниянц. Корхтафоль тяниень пингонь эпидемиологическяй обстановкать, ковид-19 урмать каршес вакцинациять мольфтемац, здравоохранениянь региональнай системать работанц, санитарно-эпидемиологическяй вешфкснень пяшкотькшнемаснон мельге контрольть колга.
Региононь вятись китькстазе, што коронавируснай инфекциять келемоманц мархта ситуациясь республикаса лядонды стакакс: эрь шиня мушендови 60 лама од случай. МР-нь Оцюнять аф лама пингс тевонзон тиендисна азозе, што од штаммса сярятькснихть нльне од ломаттневок. Ковиднай госпиталень реанимационнай отделениятнень эса ащи сярядихнень пцтай 40 процентсна – 18 кизоста сявомок 59 кизос молемс од ломатть. Ламоцне еткстост работайхть оцю коллективса. Артём Здунов нинге весть шарфтсь мяль сянди, што эрявихть касфнемс вакцинациять темпонза.
«Оцю предприятиянь тя работникнень улихть семьясна, тосовок может эвондамс аф пара ситуация. Вихца кошардомс тифтемс прививка тейнек аш кода. А вов азонкшнема кальдяв примерхнень колга обязательна карматама. Ковиднай госпиталень реанимационнай отделениятнень эса ащи 140 ломанть еткста прививка ашезь тифте фкяське», - мярьгсь Артём Здунов.
МР-нь вице-премьерть тевонзон тиендисна Галина Лотванова азозе, што касонды лувкссна ся ломаттнень, конат пачфневихть больницяв. «Од коронавируснай инфекция» диагноз мархта больницяв недяляньберьф пачфтьфт нинге 660 ломанць.
«МР-нь Минздравти савсь етай недялять панжемс нинге 85 койка-васта. Торбеевскяй ЦРБ-сь етась работань ковиднай режимс, сембоц эсонза заняфт здравоохранениянь 9 учреждениятне. Работайхть 1345 вастсь, эздост заняфт 1111. Шавоста лядондыхть 17,5 процентсна», - азозе Галина Лотванова.
МР-нь здравоохранениянь министрть тевонзон тиендисна азозе, што 22 июльти вакцинань васенце компонентть получазь 230281 ломанць, мезсь оцю населениять 30 процентоц. Сон тяшкстазе, што «СпутникV» вакцинась тячи лезды аф аньцек кирьфтамс сярятькстоматнень, но и лоткафтомс урмать сяда товолдонь полафнеманц.
«Тейнек ули кода кирьфтамс урмать келемоманц эсь регионцонк. Ученайхне корхнесть ни сянь колга, што сай пингть, шять, эвондай тяфтама вирус, конань каршес уликс вакцинатнень аф кармай вийсна. Вирусть мутациянза эвондакшнихть эста, мзярда тянкса тиендевихть цебярь условият регионть потмоса. Кодак аньцек тейнек удалай саворгофтомс вирусть фкя ломанть эзда омбоцети етаманц, саворгофтови и од штаммтнень эвондамасна», - азозе Олег Маркин.
Оперативнай штабть заседанияса шарфтфоль мяль сянди, што аф сатомшка лац мольфтеви вакцинациясь промышленнай, перерабатывающай предприятиятнень эса, а стане жа оцю федеральнай мишендемань центратнень эса. Ответственнай министрхненди максф поручения етафтомс васедемат компаниянь вятихнень мархта.
Мордовия Республикань Оцюнять пресс-службац