15 сентябрьста Мордовиянь Оцюнять аф лама пингс тевонзон тиендисна Артём Здунов Рузаевкань аймакса улемстонза ванозе «Рузхиммаш» АО-ть вагонь строямань площадканц.
Тяса нолявихть хопперхт, платформат и лия продукция, кона пачфневи Россиянь, Баларусень, Казахстанонь и Эстониянь промышленнай предприятиятненди.
Региононь вятись ванозе производствать и корхнесь заводса покодихнень мархта. Артём Здуновонди азозь: компаниясь няфтьсы прянц покоди профессиятнень коряс Россиянь чемпионатса, кона ётафтови сай кизоня Мордовияса. «Рузхиммашсь» арьсекшни лисемс васенце вастти инь кржась вете маштомошитнень коряс.
«Тиньцонт лац ладяфт тефне, - мярьгсь МР-нь Оцюнять аф лама пингс тевонзон тиендисна. – Чемпионатть вельде тейнек эряви ламода касфнемс профессиональнай маштомошиньконь. Тинь ащетяда васенце вастса покоди профессиятнень ёткса».
Корхтафоль предприятияса социальнай ширень кирдемань мератнень колга. Тяса ётафневихть профессиональнай маштомошинь пялькстомат, макссевихть ярмаконь премият. Сай кизоня заводса покодихненди тевс сувафтови «Социальная среда» программась. Стане жа арьсекшневи, што компаниясь марса регионть мархта кармай улема предприятиянь сотрудникнень ширеснон кирнеманкса льготнай ипотечнай кредитованиянь программать анокламаса.
Тяда башка, васедемаса корхтафоль университетть мархта марстонь покодемать, Рузаевкать петнеманц-мазопнеманц, железнодорожниконь ошть и Саранскяйть ёткса транспортть арнеманц колга.
Мордовия Республикань Оцюнять пресс-службац