Понедельникста, 30 ноябрьста, Мордовиянь Оцюнять мзярошка пингс тевонзон тиендисна Артём Здунов ульсь ошень кой-кона аптекатнень эса, штоба эсь сельмосонза няемс, што улихть лекарстватне, конат эрявихть ковидть пчкафнемста.
Фкя коммерческяй аптекань сотрудницать мархта корхнемась няфтезе, што частникне путф задачать ашезь пяшкоде. Пцтай мезевок аш противовируснай лекарстватнень, антибиотикнень, антикоагулянттнень, гормональнай препараттнень еткста, конат эрявихть коронавируснай инфекциять пчкафнемста. «А мезе тинь корхнетяда рамайхненди пачфтемань пингть колга?» - кизефтезе региононь вятись. «Мезевок аф, минь аш информацияньке», - тяфтамоль ответсь.
«Фармация» МР-нь ГУП-нь сетень фкя аптекаса, коса стане жа ульсь Артем Здунов, тефне ащесть ефси лиякс, тя эстокиге няевсь рамайхнень лувксснон коряс. Пцтай сембе лекарственнай препараттне, конат нолявихть тевс коронавируснай инфекциять пчкафнемста, тяса ульсть, тяконь лувксса рецептурнайхневок.
«Государственнай аптекатнень эса минь муськ сембе эрявиксть, а коммерческяйса – пцтай мезевок аш, да нинге питнетне кафтонь-крда сяда оцюфт, - мярьгсь МР-нь Оцюнять мзярошка пингс тевонзон тиендисна. – Частнай аптечнай сетьтне стане жа должетт кирдемс социальнай ответственность. Минь аф весть тиендеме предупреждения руководительхненди, што тяниень ситуацияса эряви обеспечендамс препараттнень улемаснон. Няйса, што прябалась стаки лядонды, карматама башка работама сятнень мархта, кие ашезень сяв мяльс предупреждениятнень!»
Мордовия Республикань Оцюнять пресс-службац