Понедельникста, 5 июньцта, Мордовияса кемокстафоль торгово-экономическяй, научно-техническяй, гуманитарнай, культурнай и лия ширетнень эса сотрудничендамать колга Соглашения МР-ть (Российскяй Федерациясь) и Бурунди Республикать еткса.
Мордовия Республикань Оцюнять аф лама пингс тевонзон тиендиснон В.Д.Волковонь лемста инжихненди приветствиянь валхт азсь МР-нь Правительствать Председателец Владимир Сушков.
Соглашениять кемокстамда инголе В.Ф.Сушков азондсь Мордовиять социально-экономическяй и политическяй касондоманц-вииякшнеманц колга. «Республиканьке – Россиянь лама нациянь промышленно-аграрнай политическяй ширде стабильнай регион, - мярьгсь сон.- Мекольдень вете кизоста экономикаса касомась пачкодсь 20 процентс, промышленнай и велень хозяйствань производствань объемтне кассть 1,2-крда, ВРП-сь – 20 процентта. Основной капиталти инвестициятнень лувкссна пачкодсь 260 миллиард цалковайс».
Правителствань Председательсь китькстазе, што Мордовиясь лидер странаса алхнень, лофцть и сивольть производстваснон, а стане жа инновационнай продуктать пяльксонц, а тя 28 процент, коряс.
«Мордовияса эряфс етафневихть инвестиционнай проектт, тяконь лувксса пуроптф волоконнай оптикань и оптоэлектроникань кластер. Оптическяй волокнать производстванц коряс Россияса фкя и тяка заводть мощностец 2,5 миллиотт километра кизоти. Тядде тевс сувафтови предприятиять омбоце очередец», - поладозе Владимир Сушков.
МР-нь Правительствать Председателец азсь надияма сянди, што кафта ширдень сотрудничендамась поладови лия отраслятнень эсовок.
Бурунди Республикань омбоце Вице-премьерсь, делегациять вятиец Жозеф Буторе отмечазе, што африканскяй республикась шарфни мяль культураса и спортса сотрудничендамань соткснень ладямаснонды. Инжихне оцю мяльса примазь 2018 кизонь футболть коряс Миронь чемпионатть эса участвондамс тердемать.
Мордовиянь делегацияти стане жа сувсесть МР-нь Правительствань Председательть васенце заместителец – велень хозяйствань и продовольствиянь министрсь Владимир Сидоров, МР-нь Правительствать Председателенц заместителец – промышленностень, наукань и од технологиянь министрсь Александр Седов, МР-нь Правительствань Председательть заместителец – экономикань министрсь Владимир Мазов, МР-нь Правительствать Председателенц заместителец – целевой программань министрсь Алексей Меркушкин и региононь предприятиятнень представительсна.
Соглашениять кемокстамда меле мероприятиянь участникне казсть фкя-фкянди казнет.
Справка
Мордовиять и Бурунди Республикать еткса сотрудничендамань васенце аськолксне тифтольхть 2016 кизоня, мзярда африканскяй региононь представительхне сашендсть ширезонк. Улемок апрель ковста «Лисма» ГУП-са, кемокстафоль Бурундиса светотехническяй продукциять нолнеманц коряс марстонь предприятиять панжеманц колга Меморандум. Тяка кизонь май ковста республикасонк улемстост корхтафоль кабельно-проводниковай продукциять, медицинскяй препаратонь, электрооборудованиянь пачфнемать колга. Кемокстафоль сотрудничествать колга Меморандум «Сарансккабель» ООО-ть и Режидесо компаниять еткса, а стане жа Бурундиса лампань нолнемать коряс«Лисмать» мархта марстонь производствать ладяманц колга Дорожнай карта.
2016 кизонь октябрьста пуроптф «ТЛЛИННО» акционернай обществась, конанди участникокс арась «Лисмась». Марстонь предприятиясь кармай нолнема светотехническяй продукция, кона ушеды мишендевома аф аньцек Бурундиса, но и Восточнай Африкань странатнень эса.Маластонь пингть Бурундив пачфтеви оборудования, конань анокласы «Лисма» ГУП-сь.
Фотось «Известия Мордовии» газетать