Саранскяйса атяснон и алянь атяснон портретснон мархта шествияса примасть участия Победителень поколениять уноксна и идень уноксна. Эрь снимкать эшксса, конань синь кандозь, ломанень, семьянь и целай странань судьбат. Кафта кизот Бессмертнай полксь ётафневсь онлайн режимса. Тя пингсь няфтезе, кодама оцю вешфкссь акцияти Россиянь граждаттнень ширде. Мордовиять столицаса шествиять вятезе республикань Оцюнясь Артём Здунов. «Бессмертный полк» акцияс сон сашендсь семьянц мархта. Республикань вятись кандозе кядьсонза атянц и алянь атянц фотографияснон.
Алянь атяц Иван Васильевич Лобанов ульсь фронтса старшай сержантокс, миномётнай взводонь командирти помощникокс, 2-це Белорусскяй фронтонь 65-це армиянь 186-це стрелковай дивизиянь 238-це стрелковай полкть составса. Воявась Белоруссияса, Польшаса, Германияса.
Атяц Николай Кузьмич Здунов тусь фронту 18 кизоса. Сон ётазе марнек войнать, ульсь сержантокс, сяльде – мичманкс. Командовандась 1-це Украинскяй фронтонь 31-це армиянь противотанковай 45-миллиметровай пушкать мархта. Пачкодсь Кенигсбергу, ётафтфоль Японияв. Николай Кузьмич казьф лама казнеса.
Саранскяйса шествиясь ушедовсь 15 частста машина кинь вокзалть ваксста Геройхнень Стратонафттнень площадьстост. Но Мордовиянь столицань эряйхне и инжихне кармасть пуромкшнема тяза ламода акциять ушедомда инголе. Эрьти «Бессмертный полк» акцияса участвондамась – тя честень путома шавф боецнень, конат аф пелезь аралазь Отечестваньконь, мяляфтомаснонды. Кой-кона участникне тячиень шить самс надияйхть содамс судьбаснон мала ломаньцнон, конат ашесть мрда тюремань паксятнень лангста.
Сембода лама ломанень пуропни патриотическяй мероприятиясь Саранскяйса шумордавсь Победань площадьса Вечнай толти панчфонь путомаса и минута кашт аф молезь ащемаса. Саранскяйса «Бессмертный полк» шествияса примась участия 35 тёжянь ломань, а республикаса – пцтай 70 тёжянь ломань.