«Тейнек сави сай кизоня примамс участия оцю и важнай мероприятияса — Од ломанень Всемирнай фестивальса. Сонь главнай целец — ладямс соткст сятнень мархта, кит сайхть страназонк, - азозе Артём Здунов. - Мордовиять фестивальса няфтьсазь 80 участниксь и 30 волонтёрсь, делегациять эса кармай Васенцетнень движенияснон эзда лама активист. Стане жа тейнек сави васьфтемс Мордовияса омба масторонь 80 участник».
Мордовия Республикань Од ломаттнень тевснон коряс Госкомитетть председателец Анастасия Гришнёва азозе, што фестивалень участникокс арай 20 тёжянь од лидерсь — нят россиянитт и пцтай 10 тёжятть инжи сембе мирста. Од ломанень Всемирнай фестивальсь пуроптсыне бизнесонь, медиань, образованиянь, наукань, международнай сотрудничендамань, культурань, волонтёрствань и благотворительностень, спортонь и лия сферань активисттнень и представительхнень. Васенцеда фестивальнай оцю движенияти ули кода поладомс 14-17 кизоса подросткатненди. Мероприятиятнень ётафтомаса примайхть участия 5 тёжятть волонтёрсь марнек Россияста, тяконь лувксса ЛНР-ста, ДНР-ста, Запорожскяй и Херсонскяй областтнень эзда.
«Фестивалень основной мероприятиятне ётафтовихть 1 мартста сявомок 7 мартть самс Сочиса «Сириус» федеральнай территорияса. Кармайхть дискуссият и лекцият, выставочнай программат, спортивнай пялькстомат и марстонь тренировкат, добровольческяй акцият и путешествият. 2024 кизонь Од ломанень Всемирнай фестивальти полатксокс арай региональнай программась — омба масторонь участникне сайхть и Мордовияв. Региоттнень эса синь содафтыхть Россиять культурнай и национальнай козяшинц мархта, ванцазь промышленнай предприятиятнень», - азозе Анастасия Гришнёва.
Од ломанень Всемирнай фестивальти финалкс арай «Действуй» региональнай фестивальсь. Сон ётафтови 14-15 мартста странань сембе субъекттнень эса. Сонь пингстонза волонтёрхне и участникне, конат мрдайхть Сочиста, арайхть фестивалень идеятнень амбассадоркс и макссазь тя наследиять странань од ломаттненди.
Тяфтама жа фестивальть колга, кона ульсь 2017 кизоня, эсь мяльснон-арьсемаснон азозь сонь участниконза. Ксения Кугушева - «Кубик Рубиков» смарт-пространствать арьсиец — азозе, што цебярьдонга цебярь возможность полафтомс опытса аф фкя лацонь направлениятнень эса инь цебярь представительхнень мархта.
МР-нь депутатсь Ринат Раимов китькстазе, што фестивалень участникнень инголе ащи эсь лацонь задача — панжемс лия ширде странаньконь сембе мирста саф инжихненди.
Мордовиянь Оцюнясь макссь поручения оргкомитетонь члеттненди, а синь ётксост региональнай сембе ведомстватнень, общественнай и религиознай организациятнень представительсна, пяк серьёзнайста маладомс республикать эзда делегаттнень участвовандамань программаснон, а стане жа региональнай фестивальть мероприятиянь планонц лангса работати.
Мордовия Республикань Оцюнять пресс-службац