Мордовиясь ванфтозе вастонц инь оцю социально-политическяй устойчивость мархта региоттнень группасост. Уликс кемонь баллхнень эзда кафксось макссть республикати возможность занямс 8 вастть «Петербургская политика» Фондть февральскяй исследованиясонза.
Инь няеви событиятнень еткса, конатнень эзда ащесь оцю результатсь, эксперттне азозь Саранскяйса «Кванториум» идень технопаркть панжеманц.
Меля Мордовиясь сувась странань 17 региоттнень еткс, конатненди максфтольхть ярмаконь средстват идень технопарконь строяманкса. Тя макссь возможность рамамс тяниень пингонь оборудования и тиемс лабораторият несколька направленияс коре исследованиянь етафнеманкса. Тя лазернай технологиятне, биотехнологиясь, альтернативнай энергетикась, роботостроениясь, компьютернай технологиятне и лиятне.
Мордовиянь Оцюнясь тердезень республикань промышленнай предприятиятнень вятиснон активнайста сотрудничендамс идень технопаркть мархта, аноклакшнемс тяса эсь производстваснонды сай пингонь кадрат. Тяда башка, муниципальнай райоттнень эса панжевихть организациять филиалонза, а специализациятнень лувкссна кармай касфневома.
Нинге фкя событиясь – «Молодежный» бизнес-инкубаторть панжемац. Сон арьсеф ушеткшни предпринимательхнень ширеснон кирнеманкса. Тяса ули кода занямс арендас помещения, кона козякофтф эрявикс оборудованияса.
Панжемстонза журналисттнень мархта корхнемста, Владимир Волков китькстазе, што «Молодежный» бизнес-инкубаторсь должен панжемс од рабочай вастт IT-сфераса, ванфтомс уликснень, а од предпринимательхнень бизнес-проектсна улихть вешевикст аф аньцек Россияса, но и омба масторса.
Главнай культурнай событиясь стане жа ашезь ляда мялень шарфтомафтома. 3 февральста Мордовиянь Оцюнясь примась участия Государственнай русскяй драматическяй театрать реконструкцияда меле панжемасонза. Валонзон коряс, властень институттне сяда товга кармайхть шарфнема оцю мяль театральнай искусствать виияфнеманцты. Кепотьксонди, примаф решения нолдамс 1 миилион цалковаень лувксса 5 специальнай грантт творческяй проекттнень ширеснон кирнеманкса, од постановкань тиендеманкса, гостролень пуропнеманкса.