Конкурсть финалозонза лиссть 7 школьникт: Андрей Боровец (Саранск ошень 27№ школась), Софья Бочкарёва (Лямбирскяй райононь Большеелховскяй школась), Ангелина Илюшкина (Краснослободскяй райононь Селищинскяй школась), Алина Киселёва (3№ Торбеевскяй школась), Даниил Латышов «Ковылкинскяй райононь 1№ гимназиясь), Кристина Токарева (Большеберезниковскяй школась), Юлия Тувышкина (Рузаевскяй райононь 8№ школась).
Финалисттненди приветствиянь валхт азсь Мордовиянь Оцюнясь Артём Здунов. «Сембе тинь - сяськихтяда ни, - мярьгсь сон. – Тинь лиседе финалти, а тя корхтай оцюдонга оцю потенциалонтень колга. Конкурсса участвондамста, тинь ётаде конкуренциянь цебярь школа, мезсь кондясти теенть сяда тов. Муде од ялгат – тявок пяк эрявикс. Арьсян теенть аф лотксемс сатфть лангс и эсь проектонтень мархта полафнемс эряфть цебярь шири!»
Республикань вятись корхнесь финалисттнень ёткста эрьть мархта. Од ломаттне азондсть эсь планцнон, мяльснон-арьсемаснон колга. Сембонь синь мяльсна мумс вастснон кельгома тевсост, финцне – творчестваса, омбонцне – спортса и бизнесса. Кепотьксонди, Даниил Латышов арьсекшни военнаень профессиять колга и сембе вийса венеми путф целенцты, тядде кармай поступама военнай училищав. «Мон – патриотан и фалу анокан аралакшнемс Родиназень», - мярьгсь сон.
Ангелина Илюшкинать мялец арамс физикокс-ядерщикокс, Алина Киселевать – международнай правать коряс специалистокс. Софья Бочкарева и Кристина Токарева занцихть пря музыкаса, Андрей Боровец – восточнай единоборстваса, кштимаса, шахматаса. Юлия Тувышкина – православнай од ломанень Союзонь активистка. Сембе финалисттнень тонафнемаса и общественнай тевса сняра сатфкстост, марнек афи лувовихть.
Жюрить решениянц коряс «Ученик года» республиканскяй конкурсонь сяськикс арась Торбееваста Алина Киселева. Тяддень сентябрь ковста теенза сави араламс республикать честенц всероссийскяй конкурсса. Мордовиянь Оцюнясь арьсесь сяськити сяда товолдонь сатфкст.
Мордовия Республикань Оцюнять пресс-службац