Артём Здунов спасибась АСИ-ть генеральнай директоронцты Светлана Чупшевати Мордовияв саманкса и обществати тяфтама эрявикс ширетнень коряс марстонь работань вятемань возможностенкса.
Светлана Чупшева китькстазе: «Минь сембе шарьхкотькшнесаськ, што государственнай политикать эффективностенц показателец — тя, конешна, ломаттнень благосостоянияснон касондомац, эряфснон цебярьгофнемац. Кеняртькшнян, што Россиянь Президентсь кирдезе проектоньконь — Национальнай социальнай инициативать ширенц. Сонь целец социальнай сферать уровененц фалу касфнемац, штоба тиемс цебярь инфраструктура. Региоттнень мархта работанкса минь нолдаме тевс тяфтама инструмент, кода эряфть качестванц рейтингоц — меля сон няфтьфоль РФ-нь Президентти, странань субъекттненди. Сон пуропневи опроснай показательхнень эзда — конашкава тушенды эряйхнень мяльс социальнай сферась, конашкава аф пелькс теест эрямс регионца, кода возможностть улихть эряфса вастснон муманкса и лия факторхне — экологиясь, петемась-мазоптомась, медицинскяй обслуживаниясь, образованиясь. Тяса тейнек эряви общественнай, аф коммерческяй организациятнень, предпринимательхнень, эксперттнень и специалисттнень, конат работайхть социальнай сфераса, лезкссна, штоба синь поладольхть тя работати».
Эсь социальнай проектснон колга васедемаса азондсть республикань и лия региононь НКО-тне.
Мордовияста Ольга Буйнова азондсь «ёню браслеттнень» вельде эряфкшу и ськамост эряй ломаттнень витальнай показательснон мельге фалу ваномать коряс социальнай проектть эряфс ётафнеманц колга. «Ёню браслеттне» лезнихть мушендомс юмаф эряфкшу ломаттнень, конат ащихть социальнай обслуживанияса и конатнень колсеви мялямсна. Проектсь сувась «Сильные идеи для нового времени» форумти 100 инь цебярь инициативатнень лувксс.
Шабанди и подростканди «Надежда» Республиканскяй социальнай приютть директороц Татьяна Барашихина азондсь аватнень и шабатнень социально-психологическяй адаптацияснон колга, конат повондсть насилия алу.
Наталья Батраченко азондсь «Импульс» алашань клубть работанц колга. Тяса ётафневихть занятият ограниченнай возможность мархта шабатненди.
Эсь проектснон колга азондсть лия региононь эксперттневок, тяконь лувксса корхтамась мольфтевсь инвалиттненди и стакаста сяряди шабатненди медицинскяй лезксонь максомать и реабилитацияснон колга.
Китькстафоль: эряфонь палатне улендихть аф фкя лацоннет — тя инвалид шабань шачемась, семейнай насилиясь, шумбрашить юмафтомац. Но сембе тя случайхнень пингста государствати лездыкс арсихть социально-ориентированнай НКО-тне, конат макссихть ломаттненди адреснай лезкс. И тя работать эряви полаткшнемс сяда тов. «Тяда пеле лисендемс эсь инициативантень мархта, карматама решандакшнемост кизефкснень марса», - мярьгсь Мордовиянь Оцюнясь.
Мордовия Республикань Оцюнять пресс-службац