МР-нь Госсобраниять Председателец Владимир Чибиркин содафтозе пуромфненди Мордовиянь од прокурорть Сергей Лапинонь, кона путф тя должностти 2022 кизонь 11 октябрьста Россиянь Президентть Указонц мархта.
Пшкядемок депутаттненди, спикерсь азозе, што странати инь таколфты кизефксокс тяни ащи частичнай мобилизациять коряс мероприятиятнень ётафтомасна. Минь республикасонк Мордовиянь Оцюнять и региональнай Правительствать, трудовой коллектифнень, сембе уровенень депутаттнень, волонтёрскяй, общественнай организациятнень и ломаттнень вийсна водендафт кеме тылонь тиендемати, специальнай военнай операциянь и участникненди синь семьянь членцнонды лезксонь максомати.
Владимир Чибиркин отмечазе Мордовиянь Госсобраниянь депутаттнень ламошкаснон активностьснон, конат Мордовиянь Оцюнять поручениянц пяшкодеманкса активнайста обеспечендакшнесазь военнослужащайхнень экиперовкаса, медикаментса, макссихть материальнай лезкс. Спикерсь кошардозень коллеганзон поладомс сяда тов тя работать. Тяка пингть, сялтфтольхть кой-кона депутаттне, конат формальнайста малаткшнихть лезксонь максомати.
«Нолямс тянь аш кода. Минь аш моральнай праваньке ащекшнемс ширеса и ваномс, кода лиятне пяшкотькшнесазь путф задачатнень. Тейнек эряви улемс кепотьксокс ломаттннень, минь кочкаеньконь мархта тя работаса. Эряви лезнемс, штоба афоль уле визькс ваномс ломаттненди фкя-фкянь сельмос», -китькстазе Мордовиянь Госсобраниять Председателец.
Сессиять пингста сувафтфтольхть полафткст «2022 кизонди и 2023 и 2024 кизонь плановай пингти Мордовия Республикань республиканскяй бюджетть колга» МР-нь Законти. Бюджетть доходнай пяльксоц касфтф 1 миллиард 430 миллион цалковайда, карьхцне — 2 миллиартт 170 миллион цалковайда. Дополнительнай средстват улихть нолдафт граждаттненди социальнай ширень кирдемань мератненди, национальнай проекттнень эряфс ётафтомаснонды, ЖКХ-са, кинь строямаса, велень хозяйстваса и лия сфератнень эса кизефксонь решандамати.
Эрявикс полафткст сувафтфт «Транспортнай налогть колга» МР-нь Законть 4 статьязонза. Одкстоптф документсь нолясыне транспортнай налогть пандоманц эзда ломаттнень, конат участвондайхть специальнай военнай операциять эса и синь семьянь членцнон (рьваснон, мирдьснон, аф совершеннолетняй идьснон, 23 кизонь топодемс шабаснон, конат тонафнихть образовательнай организацияса тонафнемань очнай формас коре).
Кода мярьгсь МР-нь финансонь министрсь Сергей Тюркин, налоговай льготась максови 2021, 2022 и 2023 кизотненди легковой автомобильхнень лангс, конатнень двигательснон мощностец 200 алашань вийс молемс. Кда вяре азф лицатнень лангс регистрировандафт кафта и сяда лама автомобильхть, эста льготась максови инь оцю мощность мархта транспортнай средствать лангс.
Тяда башка, кемокстафт 2023 кизонди избирательхнень наказснон коряс предложениятне. Спискати сувафтфт Ардатова ошса канализационнай сетьтнень реконструкциясна, Кадошкино посёлкаса паркть реконструкцияц, Ковылкинскяй райононь Порапа велеса идень площадкатнень строямасна, Оцю Игнатова велеса ваймосемань вастть тиемац. Сембе ня объекттне кармайхть ащема депутатскяй контрольть ала.
Киртьфт федеральнай закоттнень проектсна, конат водендафт традиционнай питнишитнень араламаснонды, аф традиционнай сексуальнай отношениятнень пропагандаснон аф нолдаманцты. Мордовиянь Госсобраниять Председателенц заместителец, «Единая Россия» партиянь фракциять руководителец Наталья Долматова азозе, што Россиять каршес ушетф информационнай войнась водендаф семейнай питнишитнень коламаснонды, поколениятнень ёткса соткснень сяземаснонды, од ломаттненди тяряфневи вихца тонгомс идеалхнень, конат аф малат российскяй народти и сонь культуранцты, духовнай питнишинзонды.