Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кирова ульцяса 250 вастонди идень садть и Тавлинскяй набережнайса 1450 вастонди школать тевс сувафтомаснон мархта.
Идень садсь ули сувафтф тевс тонафнемань од кизоти, тяниень пингть объектть эса мольфтевихть мекольце работатне. Ошть тя пялькссонза тяни строявихть эрямань кутт – частнай секторть вастса эвондакшнихть тяниень пингонь лама этажень кутт, а идень садсь тяса аньцек фкя – Пушкинскяй паркть маласа. Дошкольнай од учреждениять строяманц шумордаманц тя райононь эряйхне пяк учендсазь.
Башка мяль шарфтфоль «Безопасные и качественные автомобильные дороги», «Содействие развитию дорожного хозяйства» и «Комплексное развитие сельских территорий» нацпроекттненди.
Марса регионца нормативнай состоянияс пачфтевихть пцтай 307 вайгяльбень кувалмоса кит. Инь оцю значения мархта объекттнень ётксот – Саранскяйса Ботевградскяй ульцять эзга седсь, конань капитальнайста петемац «Безопасные и качественные автомобильные дороги» национальнай проектть мяльса кирдезь ушедовсь тунда. Работатнень арьсекшневи шумордамс кизоть аделавомс. Сяда тов поладовихть строямань работатне Рузаевка ошть обходонц омбоце этапсонза и Строительнай ульцяса автомобильнай кить лангса.
Тядде Мордовия Республикань дорожнай фондонь бюджетнай ассигнованиятнень объёмсна касфтовсь 2019 кизоть коряс 5,6 миллиард цалковайда, 2020 кизоть коряс – 4,8 миллиард цалковайда, 2021 кизоть коряс – 2,5 миллиард цалковайда и арась 8,7 миллиард цалковай. Эздост 4 миллиартта лама цалковайсь – федеральнай бюджетонь средстват.
Мордовия Республикань Оцюнять пресс-службац