Шумбракстомок кочкафнень, Артём Здунов китькстазе, што од ломанень политикань кизефксне и касы поколениять мархта ладямась лисенди васенце плантти сембе уроветтнень эса.
«Оцю мяль тячи шафттама од ломаттнень эряз гражданскяй позицияснон тиеманц лангс. Но мезе ба минь афолеме корхта, мон содаса, и арьсян, педагокне мархтон согласиндайхть – сембода эрявикссь няфтемс эсь кепотьксоньконь: кода минь вятьсаськ эсь прянеконь, кода примсесайнек событиятнень, кодапт минь интересоньке. Сембонь тянь няйсы и сявоньдьсы молодежсь. Тяфтама позицияти минь кирдтяма эсь работасонок Мордовияса. Тяниень пингть молодежнай политикась фалу ащи минь Президентоньконь сельме инголе и ПФО-са Россиянь Президентть полномочнай представителенц», - мярьгсь республикань руководительсь.
Мордовиянь Оцюнясь путозень прявкс направлениятнень, конатнень коряс регионца мольфтеви покодема. Ули сотрудничествань колга соглашения рузонь православнай церкавть, региональнай Минобромть, Минкультть и од ломанень тевонь коряс Госкомитетть ёткса. Работась тя направлениять эса строяф системна. Республикась странань лидерть мяленц вельде арьсеф проектть «Регион для молодых» эряз участникоц.
Башка ванф макссеви асу од ломанень вешемати, лидерскяй пялькстомань ётафтомати, наставническяй корпусть покодеманцты, кадровай политикань системнай кочкамати, регионтть участиянцты федеральнай проектса.
«Эрьда лац ряц корхтатама сянь колга, мезть ули влиянияц минь од ломанньконь лангс: кие синь теест общественнай мнениянь лидерхьне, конат эряйхть етксонк, кодама задачат путнихть инголест, мезсь синь салсесы мяльснон и кинь мархта синь ладяйхть, - китькстазе руководитель регионть руководителец. - Сюконян Тейть, Олег Александрович, тяфтама эрек сувамати тя темать потмос и сянкса, што имена Мордовиясь арась тя актуальнай кизефкснень коряс окружной совещаниянь ётафтома вастокс».
ПФО-са Россиянь Президентть полномочнай представительть полафтыец Олег Машковцев китькстазе:
«Тячи минь кочкавоме, штоба корхтамс тяниень пингонь государственнай од ломанень политикань прявкс прябалатнень ёткста фкять, конац сотф од ломаттнень радикализациять каршес мерань арьсемать-тиемать колга, келепть экстремизмать и терроризмать вельф ётамать од ломанень сфераса. Тят задачатнень путнесыне ингольнок странать руководствац».
Совещаниять пингста ульсть ванфт од ломаттнень ёткса эряф гражданскяй позициянь, од ломанень средаса экстремизмань профилактикань, деструктивнай идеалогиянь аф нолдамать коряс компетенциянь тиемань кизефксне. Участникне тяфта жа полафтсть инь цебярь региональнай практикатнень мархта тя направлениять коряс.
Китькстасаськ, што окружной мероприятиянь ётафтома шитнень республикаса тяфта жа ётни IX Интеллектуальнай студентонь олимпиадась «IQ ПФО».
Мордовия Республикань Оцюнять пресс-службац