Ваныхненди стадиону сувамась ульсь питнефтома, футболонь афкуксонь кельгихнень мяльснон ашезе кола нльне сёксень пизему погодаське. Матчть ушедомда инголе стадионца ётафтовсь концертнай программа, работась буфет и футбольнай атрибутикань ёмла ярмарка.
Финалть панжемста республикань Камернай хорсь моразе Россиянь Гимнать. Мордовиянь Оцюнясь Артём Здунов пшкядсь пуромфненди: «Приветствовандасайне сембонь, кие кельгсы футболть, Мордовскяй футбольнай лигать финалса! Пяк правильнай мероприятиясь массовай спортть виияфнеманкса, сятненди, кие ванонды футбол, налхкси футболса, тренировандакшни и аф пели лисендемс паксять лангс».
Региононь руководительсь спасибась организаторхненди и сембонди, кие кирдезе Мордовскяй футбольнай лигать ширенц. Од турнирть тя сезонцонза примасть участия 18 любительскяй командась, конат пуроптфт республикань предприятиянь и организациянь работникнень эзда. Ламоц участникне аф аньцек няфтезь эсь коллективснон МФЛ-са, но и сявсть эсь лангозост кураторства идень и юношескяй команадатнень лангса: рамасть од налхкихненди форма и футбольнай амуниция, паннихть пялькстомаса улендемаснон инкса.
«Карматама виияфнемонза массовай спортть сяда товга!» - китькстазе Артём Здунов.
МФЛ-нь частникненди, организаторхненди и болельщикненди приветствиянь валхт азсть Российскяй футбольнай сюзонь региональнай вииякшнемань Департаментть руководителец Валентин Минкин, Мордовскяй футбольнай лигать президентоц, Россиянь заслуженнай тренерсь Валерий Четверик и международнай классонь спортонь мастерсь, «Спартак» футбольнай клубть лувксса Россиянь вейхксонь-крдань чемпионць Дмитрий Ананко.
«Нектарин» и «Газовики Мордовии» командатнень ёткса финальнай матчсь шумордавсь 5:1 счётса. Саф мяльс, што 2023 кизоня Мордовскяй футбольнай лигась кармай сяда тов кеняртьфнемост эсь матчензон мархта футболонь кельгихнень.
Лятфтасаськ, Мордовскяй футбольнай лигать турнироц ушедовсь регионца 2022 кизоня республикань Оцюнять Артём Здуновонь инициативанц коряс. Августста сявомок октябрти молемс ётафтфоль 80 матч, тевс нолдафтольхть Саранскяйса и республикань муниципальнай райоттнень эса пялькстомань футбольнай сембе площадкатне, лигать матчензон эса марса участвондась 532 налхки. МФЛ-нь финалсь ульсь «Мордовия Арена» стадионца, кона 2018 кизоня примазень футболть коряс миронь чемпионатть матчензон.
Мордовия Республикань Оцюнять пресс-службац