Васенце пяшксеметражнай документальна-налхкомань фильмать эсьлацонь скульпторть и минь земляконьконь Степан Дмитриевич Эрьзянь колга нилеце пяльксоц ащи налхкомань и художественнай сценаста. Тя васенце тяфтама картинась российскяй кинематографть эса. Съемкаса ульсть заняфт тяфтама россиянь содаф актерхне, кода Елизавета Арзамасова, Даниил Спиваковскяй. Скульпторть алянц налхкозе Станислав Дужников. Прявкс рольть налхкозе Мокшэрзянь драматическяй театрань актерсь Павел Михайлов.
Мокшэрзянь культурань атмосферать посетительхнень лемс тиезе «Мерема» этнографическяй фольклорная пуромкссь. Инжихнень шумбракстозь картинань тиихнень и Мордовия Республикань Оцюнясь.
«Тячи проверясайнек эсь эмоциянеконь фильмать эзда, а сяльде, арьсян, сон келиста туй странать эзга. Документальнай кино Степан Дмитриевич Эрьзянь колга ламоцне няендсть, а вага налхкомань – тя мезе-бди од. Темась салай мяль, сон интереснай, минь земляконьке – сембе масторонь уровенень ломань, содавикс аф фкя континентса, – мярьгсь Артём Здунов. – Кенярдян, што минь покодтяма пяшкся метраса, арьсетяма ётамс и художественнай киноти, Мордовияса обязательна карматама касфтома-виияфтома и кирдема киноиндустриять эса! Минь кельгсаськ киноть, кельгсаськ Степан Дмитриевич Эрьзянь, кельгсаськ Мордовиять!»
Минь содаф земляконьке и картинань тиихнень эзда фкясь Станислав Дужников сюконясь Мордовиянь Оцюняти проектть кирдеманц инкса и китькстазе: «Эрьзянь содасазь сембе масторть лангса кода асудонга асу скульпторть, а минь странасонк сонь афзаслуженно кадозь вниманияфтома. Надиян, тя фильмась шарфты эсь лангозонза мяль, и сяльде Степан Дмитриевич Эрьзянь творчестванцты касфтсы кельгомать».
Мероприятиять пингста ётась Мордовиять, кода кинорегионтть презентацияц. Зрительхненди ульсть няфтьфт нинге кафта фильмань трейлерхт, конатнень съемкасна мольфтевсть и Мордовиясонга: «Спасая маленькие жизни» и «Школа Бабы-Яги». «Спасая маленькие жизни» документальнай фильмась корхтай Республиканскяй идень больницять покодиензон колга и лемтьф сонь 60 кизонцты. «Школа Бабы-Яги» пяшксеметражнай фильмать-азксть премьерац путф планц тя кизонь кизоть лангс.
Тяфта жа китькстасаськ, што минь республиканеконь и «СОЛАР» кинокомпаниять улихть и сяда тов сотрудничестванди планцна. Арьсеви ушедомс «Тайна адмирала Ушакова» пяшксеметражнай художественнай фильмать съёмканзон, конац кармай азондома 1812 кизонь событиятнень колга, а тяфта жа нолдамс «Школа Бабы-Яги. Продолжение» фильмать-азксть омбозе пяльксонц.
Мордовия Республикань Оцюнять пресс-службац