Артём Здунов отмечазе, што республикаса сярядихнень лувкссна кассь кафтонь-крдада ламода.
«Шиньберьф средняйста сярятьксни 45 ломань. Эпидобстановкать сяда тов вииякшнемац ащи примсеви профилактическяй мератнень эзда. Коллективнай иммунитетсь республикаса арась 13,9 процент. Тя пяк ёмла показатель!» - мярьгсь республикань руководительсь.
Вице-премьерсь Галина Лотванова отмечазе, што сярядихнень лувксснон касомац активнайста моли Москуть и Московскяй областть эзда.
«Кота райоттнень эса сярядихнень коряс показательсь сяда оцю среднероссийскяй показательхнень коряс – тя Ельниковскяй, Лямбирскяй, Ковылкинскяй, Большеберезниковскяй, Атяшевскяй райоттне и Саранск ошень округсь, - китькстазе сон. – Основной сталмось тяниень пингть прась амбулаторнай звеноть лангс. Недяляста врачнень тернемасна кассь 30 процентта республикаса и 54 процентта – Саранскяйса».
Стационарса ащихнень пцтай пялесна 60 кизоса и сяда сире ломатть. Азфоль, што реанимацияса тяниень пингть ащихть сят, кит тифцть прививкат кизода тяда инголе, тя корхтай сянь колга, што эряви эсь пингстонза тиендемс ревакцинация. Мзярс коллективнай иммунитетсь Мордовияса коль кири, Саранскяйса, Лямбирскяй и Зубово-Полянскяй районца сон валгсь 10 процентта алу.
Мордовиять эзга Роспотребнадзорть руководителец Татьяна Харитонова китькстазе, што омикрононь уликс штаммтне пяк педихть и тёждяста ётафневихть, но пяк пелькст аф вакцинировандаф ломаттненди, хроническяй урма мархтотненди и 65 кизода сиретненди.
Тяда башка, малаткшни гриппть каршеска прививкань тифтемань пингсь. 9 августста регионозонк поступай 122 тёжянь доза тяфтама вакцина оцю насленияти, а сентябрть ушетксста – шабатненди.
МР-нь здравоохранениянь министрсь Олег Маркин китькстазе, што тяни сембода цебярь пингсь, штоба тифтемс вакцина.
«Тя сезонть учендовихть гриппонь колма од штаммт, конатнень каршес населениять аш иммунитетоц. Поступаф вакцинать эса аралама ня штаммтнень эзда ули», - отмечазе Олег Маркин.
Республикань предприятиятнень руководительснон инголе путф задача обеспечендамс трудовой коллектифнень вакцинацияснон.
Мордовия Республикань Оцюнять пресс-службац