Мордовиянь Оцюнясь Артём Здунов 15 декабрьста видеосотксонь режимса ётафтозе регионца коронавируснай инфекциять инголяманц и келемоманцты кить персеманц коряс оперативнай штабть пуромксонц.
Башка мяль шарфтфоль од кизонь илатнень пингста общепитонь организациятнень покодемаснонды. Артём Здунов китькстазе, што решениясь эряви примамс эпидемиолокнень, врачнень и бизнес-сообществать азфснон мяльса кирдезь, тяка пингть предпринимательхненди шарьхкотькшнема эсь ответственностьсна общепитса эпидемиять каршес водендаф мератнень пяшкотькшнеманкса. Корхтафоль, што эряви пуроптомс оперативнай группа кафетнень, рестораттнень и вень клупнень эса антиковиднай мератнень пяшкотькшнемаснон мельге ваноманкса. Артём Здунов макссь поручения Правительствать Оцюнянцты Владимир Сидоровонди лац-ряц арьсемс, кода ладямс общепитть покодеманц илань шитнень, решениять примамс недялять аделавомс.
Региононь Оцюнясь азозе: мекольдень кафта недялятнень республикаса коронавируснай инфекцияса сярядихнень лувкссна аф ламода кирсь. Шиньберьф сярятьксни аф 130 лама ломань. Ковиднай госпитальхнень эса пчксихть пцтай 1000 ломанць.
Кода пачфтезе вице-премьерсь Галина Лотванова, кирсь аф больничнай пневмониятнень лувкссна, апак заняк лядонды ковиднай стационарса васттнень 26 процентсна.
Тяка пингть, кода азозе Мордовиять эзга главнай санитарнай врачсь Татьяна Харитонова, республикаса ушедсь касома ОРВИ-са и гриппса сярядихнень лувкссна.
Вакцинациясь Мордовияса мольфтеви сяда тов, но мекольдень недялять сон сяда лафчептовсь. Республикань Оцюнясь китькстазе, што нолямс тянь аш кода. Малаткшнихть од кизонь илатне, пингстост касонды урмать келемоманкса пелькссь. Сяс путф задача виияфтомс санитарнай вешфкснень пяшкотькшнемаснон мельге контрольть, тяконь лувксса идень саттнень и школатнень эса. Од кизонь пуромкст тяса ётафнемс мярьгондеви, но аньцек сявондемок мяльс уликс сембе кардаматнень. Тяка пингть арьсема сянь коряс, кода мялень салайста ётафтомс ломаттнень ётка пингснон ару кожфса — корхтамась мольфтеви катокнень-меснень покодемаснон колга.
Мордовия Республикань Оцюнять пресс-службац