Мордовиянь Оцюнять аф лама пингс тевонзон тиендисна Артём Здунов 13 майста видеосвязень режимса етафтозе коронавируснай инфекциять профилактиканц и келемоманцты кить персеманц коряс региональнай оперативнай штабть очередной заседаниянц. Корхтамась мольфтевсь тяниень пингонь эпидемиологическяй обстановкать, ковидть каршес вакцинациять мольфтеманц, здравоохранениянь региональнай системать работанц колга.
Целайнек инфекциять келемоманц коряс ситуациясь стабильнай и кирдеви контроль ала. Сярядемать коряс статистикась аф полафни несколька недяля, суткаста мушендови 28-30 од сяряди. Госпитальхнень эса ащихть пцтай 450 сяряди, 1000 ламам амбулаторнай пациентсь пчксихть пневмониянь теждя форматнень и ОРВИ-тнень эзда.
Оперштабсь ванозе бизнес-сообществать пшкядеманц сянь колга, штоба лоткафтомс ограничениятнень кафетнень и рестораттнень эса. Корхтамада меле Артём Здунов китькстазе: тянь ули кода тиемс, кда пяшкодевихть несколька обязательнай условиятне.
Васендакиге эряви тиемс вакцинация общественнай питаниянь предприятиянь сембе работникненди, мезенкса тевс нолдамат мобильнай пункттне. Маластонь кафта недялятнень важна ваномс ситуациять 1и 9 майста етафтф оцю мероприятияда меле. Кода азозь заседаниянь участникне, конкретнай решеният ули кода примамс аньцек крхка анализонь тиемда и федеральнай центрать мархта консультацияда меле.
Кода азозе МР-нь Правительствать Председателенц заместителенц тевонзон тиендисна Галина Лотванова, тяниень пингть важна кемокснемс од ломаттнень вакцинацияснон коряс работать, башка – республикань тонафнемань заведениянь студенттнень еткса. Кизонь пингть ламотне еткстост кармайхть работама строительнай отряттнень, идень лагерьхнень эса, туйхть ваймосема. Стане жа эряви кирдемс контроль ала обстановкась ся ломаттнень мархта, конат работайхть вахтовай методса. Васендакиге мяльса кирдевихть Атюрьевскяй, Ковылкинскяй, Кочкуровскяй, Чамзинскяй райоттне.
Стане жа корхтафоль оцю трудовой коллектифнень вакцинацияснон колга. Тяниень пингть сон мольфтеви аф сатомшка вииста. Штоба петемс тянь ширде тефнень, оперштабть сай заседаниязонза тердевихть ся промышленнай предприятиятнень вятисна, коса вакцинировандаф сотрудникнень процентсна лядонды емлакс.
Важнай информация выпускникненди и синь родительснонды. Оперативнай штабть пингста примаф решения вейхксоце и кефкиеце классонь выпускникненди мекольце звонокнень етафтомс еткшиста, 22 майста.
Мордовия Республикань Оцюнять пресс-службац