22 апрельста Госсобраниянь сессияса депутаттне примасть Мордовия Республикань башка закоттненди кой-кодама полафткст. Тянь мархта региональнай законодательствась тифоль соответствияс федеральнайть мархта. Фкя инь оцю полафткссь ащи сянь эса, што решениятненди, конат канневихть регионть высшай руководителензон социальнай, финансовай и административнай гарантияснонды, регламентирования кармай улема аф Мордовия Республикань Оцюнять Указонзон, а башка закоттнень мархта.
Тянь вельде ули кода обеспечендамс синь примамаснон публичностьснон и сембонди няевомаснон, а стане жа синь пяшкодемаснон и контрольснон.
Законопроектти комментарий макссь Мордовиянь Оцюнясь Артём Здунов.
«Заработнай платать, премиальнайхнень, лия пандоматнень ладямасна - семботи улема азфокс законца. Лиякс азомс ськамонза, корыстнай арьсематнень мяльса кирдезь киндивок тяни кодамовок решеният примсемс аш кода. Сембось кармай улема панжадокс и основаниятнень тевс нолязь, - китькстазе сон. – Тяда башка, законопроектсь тиендьсыне фкя лацоннекс республикать иногольдень сембе руководителензон гарантияснон, аф ваномок синь личностьснон или киньге субъективнай мялензон лангс, мезсь стане жа пяк эряви. Региононь Оцюнять кочксесазь эряйхне, сяс арьсян, што и сяда товолдонь гарантиятнень колга решениятнень примсемат народнай избранникненди, теест улема законца, а аф кодамовок подзаконнай акттнень или директиватнень эса. Дополнительнай преференцият аф латцевихть».
Тяда башка, Мордовиянь Оцюнясь шарфтозе депутатскяй корпусть мяленц региональнай нормативно-правовой базать сяда товолдонь оценканц и анализонц эрявиксшинц лангс, сонь федеральнай законодательствать мяльса кирдезь соответствияс тиеманцты.
«Тяса тиема пяк оцю работа: содасасть, што примаф РФ-нь субъекттнень эса публичнай властть организациянц марстонь принципонзон колга федеральнай закон, сяс Конституциятивок сувафтома полафкст, и тя или тона закоттненди: Госсобраниять колга, кочкаматнень, депутатть статусонц, госвластень исполнительнай оргаттнень системанон колга, государственнай должносттнень и гражданскяй службань должносттнень колга, референдумть колга, имуществать учетонц кизефксонц колга и кой-конатнень лиятненди. Законца улема тяштьфокс семботи лац-ряц. Кочкайхненди минь тянь квалма стане жа пачфттяма», - мярьгсь Артём Здунов.
Мордовия Республикань Оцюнять Пресс-службац