Мордовиянь Оцюнять аф лама пингс тевонзон тиендисна Артём Здунов 7 майста видеоконференциянь режимса етафтозе коронавируснай инфекциять профилактиканц и келемоманцты кить персеманц коряс региональнай оперштабть заседаниянц. Корхтафоль тяниень пингонь эпидемиологическяй обстановкать, ковидть каршес вакцинациять мольфтеманц,
аф рабочай шитнень пингста здравоохранениянь региональнай системать работаманц колга, а стане жа сянь, кодама форматса етафтовихть Победань шити лемтьф мероприятиятне. Штабса примафоль решения — Саранскяйса и Рузаевкаса 9 майста салютти — улемс! Но пяшкотькшнемок уликс санитарно-эпидемиологическяй сембе вешфкснень.
Етай недялять коронавирусса сярядихнень коряс статистикась лядсь ингольцекс. Од сярятькстыхнень лувкссна суткаста — 28-30 ломань, пчксемань учреждениятнень эса ащихть пцтай 400 пациент. 100 малава ломанць пневмониянь теждя форма и ОРВИ мархта — амбулаторнай пчксемасот.
Артём Здунов китькстазе, што вакцинациянь кизефксне пяк важнайхть. Тячиень шити республикав поступась 132 тежяньда лама доза, пцтай 80 процентсна нолдафт ни тевс. Маластонь шитнень поступай нинге 9 600 доза. Практикась няфнесы, што ся райоттнень эса, коса мольфтеви цебярь разъяснительнай работа, коса врачне отвечакшнихть пациенттнень кизефксснон лангс, тоса вакцинациянь темпне ащихть достойнай уровеньца. «Вдь прививкась — урмать эзда аралаеньке», - мярьгсь региононь вятись.
Кода азозе МР-нь Правительствать Председателенц заместителенц тевонзон тиендисна Галина Лотванова, аф кржа сярядись састь Мордовияв лия региоттнень эзда. Сяс муниципальнай образованиянь оцюнятненди эряви кемоста ваномс ситуациять мельге, штоба урмась афоль келема. Тяка пингть азфоль, што оцю пельксса ингольцекс ащихть эряфкшу ломаттне. Синь кошарявихть аф улендемс лама ломанень пуропни мероприятиятнень эса.
Заседаниянь участникне корхтасть 9 майти лемтьф мероприятиятнень етафтомаснон колга. Примафоль решения етафтомс салютт Саранскяйса и Рузаевкаса. Саранск ошень округонь оцюнясь Петр Тултаев азозе, што илань салютсь кармай 22.00 частса, ошеряйхне пачфтевихть транспортса сембе райоттненди.
Артём Здунов нинге весть лятфтазе, што торжестватне, конат етафтовихть республикать столицаса и сембе муниципальнай райоттнень эса, должетт етафтовомс Роспотребнадзорть сембе вешфксонзон пяшкотькшнезь.
Мордовия Республикань Оцюнять пресс-службац