«Социальнай фондть отделенияц – фкя инь оцю федеральнай структурась Мордовияса. Тя и оцю организациясь функционалонц ширде – сон максси ломаттненди 44 государственнай лезкс, ламоцнень ули кода получамс электронна или МФЦ-ть вельде», - шумбракстомок пуромфнень, тяшкстазе республикань руководительсь.
Артём Здунов сюконясь Россиянь Социальнай фондть руководителенцты республикаса лама кизонь эряз эряма условиянь тиемаса лезксонкса. Республикань 17 районца покодихть сире поколениянь корхнемань Центрат, маластонь пингть арьсекшневи тиемс сембе вастова. Пара валхт сашендыхть сиянь пингонь ломаттнень и синь идьснон эзда.
«Россиянь Социальнай фондонь мокшэрзянь отделенияса покодихть оцю квалификация мархта содай специалистт, синь покодихть тяниень пингонь технологиятнень коряс. Пялешкаснон ламоцссна покодихть 10 лама кизот. Пяк лама корхтатама династиятнень колга. Мяленьке, штоба тя профессияса, кона веши кирдемшка, ломаттненди ванф, психологиять коряс содамошит, стане жа тиевольхть кеме династият», - мярьгсь Артём Здунов.
«Социальнай фондть и Мордовия Республикать сотнесазь цебярь, пара ялгаскшинь сотксне. Эсь ширденк тисаськ семботь, эряфс нолдасаськ сембе арьсеф проекттнень, штоба республикань эряйхне марялезь минь кельгоманьконь и ванфоньконь, - азозе Сергей Чирков и пшкядсь фондонь сотрудникненди. – Пара, мес регионць няйсы тинь цебярь тевонтень. Седикс-ваймокс поздравляндатядязь тинь оцю казне мархта, конатнень тинь тячи получасть. Арьсян теенть аньцек цебярь, сатфкст сяда товолдонь тевсонт!»
Церемониять пингста ётафтовсь Соглашениянь сёрмадомась Мордовия Республикать и Российскяй Федерациянь социальнай срахованиять и пенсионнай фондть ёткса. Сон арьсеф ялгаксшинь сотксненди государственнай гарантиянь максомати, социальнай лезксонь мератненди, башка категориянь ломаттненди социальнай услугань максомати и социальнай сфераса государственнай политикать коряс кизефкснень ваномаснонды. Документть пес кядьснон путозь Артём Здунов и Сергей Чирков.
«Услугань объёпне касыхть, Президентть эняльдеманза пшкядемаса лац няфтьфт – лама социально ориентированнай эняльдемада. Сембось тя веши и обордованиянь одкстоптома, и системать ладяманц, - мярьгсь Артём Здунов. – Оцю путксоц межведомственнай оборотть – штоба ломанць афоль вешенде, косот сонь документонза, коса ащи сонць. Тейнек эряви, штоба сон получаль государственнай лезксонь форма. Сембось тя сёрматф минь соглашениясонк».
Соцфондонь председательсь Сергей Чирков тяшкстазе, што соглашениясь сотф и социальнай проекттнень виияфтомаснон мархта, конат шарфтфт республикань эряйхнень вастсон цебярьгофтомаснонды: «Минь марса республикать мархта виияфтсаськ соткснень назначениянь частьса, кепотьксонди, единай пособиять – сон появась минь странаньконь историяса васенцеда. Стане жа документса азондови клиентскяй обслуживаниять колга – карматама макссема ярмакт тя системать виияфтоманцты, сире пингонь поколениянь корхнема центратненди и социальнай лезксонь сембе уликс мератненди. Минь максоме вал, и минь сонь кирдьсаськ сембе вийса».
Мордовия Республикань Оцюнять пресс-службац