«РусГидро» ПАО-сь – россиянь инь оцю электроэнергетическяй компаниясь. Минь регионнеконь мархта сонь сотнесы тесна сотрудничествась – аньцек ётай кизоть Мордовияса корпорациясь производствань нужатнень лемс рамась промышленнай паршида 1 млрд цалковайда лама ярмак лангс. Тяниень пингть кабельно-проводниковай паршиень поставкатнень вятьсазь «Сарансккабель»-сь и «Сарансккабель-Оптика»-сь. Лацсеви сотрудничествась «Цветлит» и «Электровыпрямитель» заводтнень мархта.
Мордовияв покодемань васедемать пингста госкорпорациянь делегациясь примась участия «День поставщика ПАО «РусГидро» VI конференциять эса. Мероприятиясь кочкась 250 ломаньда лама эрь кодама странань регионцта. Выставкань форматса эсь продукцияснон и разработкаснон няфтезь Мордовиянь предприятиятне и организациятне, а деловой программать пяльксса участникне полафнесть содамашиснон мархта региональнай промышленнай комплексонь компетенциятнень и «РусГидро» ПАО-ть закупканзон спецификаснон колга.
Васедемать пингста Артём Здунов китькстазе, што ётай кизоть республикань производительхнень поставкань объёмсна «РусГидро»-ть лемс кассть ингольдень показательда нилень крда – тя цебярь сотрудничествань показатель, конац ули кода нинге касфтомс.
Компаниять генеральнай директоронц полафтыец азондозе, што делегациясь, конац сась региону, няфтьф корпорациянь деятельностень ламоц направленияса. «Сюконятама лямбе васьфтеманкса и поставщиконь Шить оцю уровеньца кочкаманц-ётафтоманц инкса. Келептьф составса корхнеме республикань производительхнень мархта. Ули закупкань объёпне – тя аньцек ушеткс. Тейнек ули коза касомс!» - китькстазе Александр Чариков.
Васедемаса тяфта жа корхтасть Петербургскяй Народъётконь экономическяй форумть площадкаса покодемань плантть колга.
Мордовия Республикань Оцюнять пресс-службац