Од заводонь путомась арьсеви аделамс 2025 кизоти. Тоса кармай нолявома гражданскяй техника крхка локализация мархта. Компаниясь арьси нолямс смартфотт, компьютерхт, планшетт, ноутбукт.
Тяниень пингть «Рутек» мощностьса «Мордовия - Технопаркса» нолявихть смартфотт, сервернай платат, планшетт и лия устройстват. Башка васта ноляви устройствань линейкаса занци отечественнай смартфонц Р-ФОН-ць, компаниять флагманскяй продуктанзон эзда фкясь, конац покоди российскяй мобильнай операционнай РОСА Мобайл системать лангса. Сон тиф мекольце технологическяй трендтнень коряс и высокопроизводительнай процессор мархта, батареянь оцю покодемань пингса, стильнай дизайнса и сяда оцю аралама мархта недекларируемай возможносттнень эзда сюконямок аппаратнай компонентонди эсь драйверонь тевс нолдамать инкса. Компаниять сембе продукциянц пяк качественнай и надежнай, мезсь тиеньдсы сонь россиянь рынкаса востребованнайкс.
«Мордовияса тиф васенцесь регионса промышленно-производственнай типонь особай экономическяй зонась 2022-2026 кизотненди РМ-нь социально-экономическяй виензамань программать видеса – лятфтаса, сон кемокстаф РФ-нь Правительствать мархта Президентть поручениянц коряс. ОЭЗ «Система»-са «Рутек» заводтть путомац — тя значимай проект республикати. Сон аф аньцек сувафты инвестицият, но и максы од покодема вастт, мезсь кармай лездома регионтть социально-экономическяй виензаманцты. Минь макссетяма оцю питне «Рутек» компаниять путфксонцты Мордовиять высокотехнологичнай производстванц виияфтоманц инкса и аноктама макссемс сембе ширдень кирдема проектть пара эряфм ётафтоманцты», — мярьгсь Мордовиянь Оцюнясь Артём Здунов.
«Минь кенярдттяма азондомс Саранск ошса од заводононь путомать колга. Тя важнай аськолкс «Рутек» компанияти, конац лезды тейнек аф аньцек келептемс производствать, но и сувафтомс региональнай экономикань касомати оцю путфкс. Минь сюконятама Мордовия Республикань Оцюняти Артём Здуновонди и сонь команданцты проектть кирдемакса и сотрудничестванкса», — китькстазе «Рутек» компаниять генеральнай директороц Дмитрий Иванников.
Мордовия Республикань Оцюнять пресс-службац