Ветеранць азондозе, што мзярда ушедсь войнась, теенза ульсь 15 киза – сон тонафнесь кефкиеце класса, кой-коста покодсь колхозса трактористкс. Комозьце класста меле мольсь военкомату и эняльдсь прважамс сонь авиационнай войскатненди – арамс летчикокс ульсь сонь идькспингонь мечтац. Григорий Степановичень прважазь 3-це военно-морской авиационнай училищав, кона тоста ульсь Мордовияса. Тонафнемда меле 1944 кизоня Григорий Корнилаев тусь Черноморскяй флотонь 23 Краснознаменнай штурмовой Николаевскяй авиаполкти. Эрязста примсесь участия Равжа морять лангса боевой действияса, Одессать и Николаевть идемаса. 1945 кизоня ульсь прважаф Дальневосточнай фронтти, минь земляконьконь, генералть Максим Алексеевич Пуркаевонь командованиянц алу. «Сяськомань шить васьфтине Дальняй Востокса.Тя ульсь оцю кенярдема, но инголе ульсть нинге Япониянь армиять мархта сраженият», - явсь ВОВ-нь участниксь.
Ветеранць казьф «За Победу над Германией», «За Победу над Японией», «За боевые заслуги» медальса и Великай Отечественнай войнань I степенень медальса.
«Службась ульсь аф теждя, летчикненди ульсь пяк стака. Но мон тиендине семботь эсь Шачема Масторозень, эсь народозень лемс!» - китькстазе Григорий Корнилаев.
Войнада меле ветеранць покодсь Рузаевскяй районца партиянь райкомса омбоце секретарькс. 1957 кизоста кандсь служба МВД-са. Пенсияс лиссь полковниконь званияса. Лама киза вятсь общественнай покодемат, ульсь прявксокс МВД-нь ветеранонь советть эса. Службанц пингста ульсть казьфт лама медальхт и наградат.
Инь питнись, Григорий Степановичень валонзон коряс, А. И. Покрышкинонь лемса медальсь, кона макссеви военно-патриотическяй воспитанияти, авиациять и космонавтикать виензафтомас личнай путфксонкса.
Григорий Степанович сюконясь МР-ть коряс МВД-нь руководствати пичедеманкса и эрь кодама кизефксса лездоманкса.
Аф ваномок лама кизонзон лангс, ветеранць ваны новосттнень, специальнай военнай операциять молеманц и народъетконь обстановкать мельге. Сонь тяфта жа пяк пичефтсы телефоннай мошенничествась.
Артём Здунов сюконясь Григорий Степановиченди фашизмать лангса сяськомати путфксонкса, эсь прянь аф ужяльдезь Отечествати служениянкса.
«Пяк приятна знакомондамс Мархтот лична, Артём Алексеевич.Шумбраши Тейть!Сатфксне покодемасот няевихть,но арьсян синь касфтомс! – мярьгсь Григорий Корнилаев. – А тяниень пингонь од ломаттненди арьсян бороцямс и тиендемс семботь Шачема Масторнеконь пара эряфонц лемс!»
Мордовия Республикань Оцюнять пресс-службац