Мордовиянь Оцюнясь Артём Здунов азондсь минь регионнеконь колга, сонь пара шинзон колга: странать кучка вастса ащемац, оцю узловой железнодорожнай центрань и народъётконь аэропортонь улемась. Республикась – железнодорожнай вагононь инь оцю нолдайсь, занци цебярь васта сельхозпродукциянь нолямать коряс, мольфти сонь переработканц. Тя и ули экспортонь основась, особенна исламскяй миронь странатненди.
Артём Здунов китькстазе, што тя форумсь пяк ладяй международнай контактонь касфтомати-виияфтомати: «Оцю сюкпря тяфтама мероприятиянкса, сон эрявикс странань сембе региоттненди. Тя межрегиональнай сотрудничествань основась, уликс действеннай инструмент».
Ульсь китькстаф, што Мордовиясь кирдьсыне и келепнесыне аф аньцек межрегиональнай, но и международнай внешнеэкономическяй соткснень. Мекольце колма кизотнень паршиень экспортсь исламскяй сотрудничествань Организациянь странатненди кассь 27 % -та 55 % -ти марстонь объёмть эзда. Основной мишендемань партнеркс сашендови Казахстансь (35% экспортонь объемть эзда ётай кизоть), тяфта жа лядяф марс покодемась Турциять и СНГ-нь странатнень мархта. Переговоронь стадияса ащи мишендемань сотрудничестваь Египетть, Катарть, Малайзиять, ОАЭ-ть и Саудовской Аравиять мархта.
«Минь ульхтяма касомань этапса. Тейнек пяк эряви ладямс сотрудничествать сембе странатнень мархта », - китькстазе Мордовиянь Оцюнясь.
Сон тяфта жа азондозе, што Мордовиясь касфни-виияфни особай экономическяй зона, коса улихть сембе уликс преференциятне бизнести. Эрязста мольфтевихть научнай разработккатне Технопаркть и Н.П. Огаревонь лемса МГУ-ть базаса тястоконь промышленнай предприятиятнень мархта.
Артём Здунов китькстазе: республикась максси сембеширдень лезкс инвесторхненди сембе направлениятнень эса. Потенциальнай партнерхненди кармайхть интереснайхть тяфтама направлениятне кода высокотехнологичнай фармацевтикась и биотехнологиясь, светотехническяй и кабельнай промышленностсь. Тят направлениятнень эса Мордовиясь фалу ащи лидеркс странаса.
«Сашендода ширезонк!», - шумордазе эсь выступлениянц республикань руководительсь.
Сессиять пингста тяфта жа выступандасть Татарстанонь инвестиционнай касомань Агенствань руководительсь Талия Минуллина, Донецкяй народнай республикань губернаторсь Денис Пушилин, Томскяй областень губернаторсь Владимир Мазур, Хеврон провинциянь губернаторсь Халед Дудин и лиятне.
Мордовия Республикань Оцюнять пресс-службац