Ульсь китькстаф, што нилеширдень сотрудничествань соглашениять коряс тяса тиф тесна администрациять, Дубенскяй райононь ветеранонь советть, Россиянь социальнай фондть региональнай отделениянц и республикаса «Союза пенсионеров России» отделениять мархта покодема.
Эрь шиня центраса ётафневихть мероприятият - ковти 50 лама. Сембе синь ётафневихть питнефтома тертьф лекторхнень, пенсионеронь Союзть отделениянцты сувайхнень, саф посетительхнень мархта.
Учрежденияса тифт творческяй мастерской, «Компьютерный мир» локация, «Тихая гостиная», «Буфет здорового питания», «Территория гармонии», ули медицинскяй кабинет, актовай и спортивнай залхт.
22 мартста сире поколениянь общениянь Центрав сась Мордовиянь Оцюнясь Артём Здунов. Сон ванозень центрать локациянзон, корхтась сотрудникнень и посетительхнень мархта.
Творческяй мастерскойса машты кядь аватне тиендихть алмазнай мозаика, вышивандайхть бисерса картинат. Фалу ётафнихть выставкат. Центрав сашендыхне макссихть СВО-нь участникненди лезкс помощь – котцихть маскировочнай сетть, котцихть носокт, кочксихть и прважсихть ярхцамбяль мархта посылкат. Аньцек тя тялоть мастерицатне «Тепло солдату» акциять потмоса кодасть 80 парада лама понань цюлка.
Актовай залса ётнихть «Сударушка» ансамбльть репетициянза, лекцият и мероприятият. Особай ванф Дубенкань сире поколениянь ломаттне макссихть физическяй культурати, кирдихть лозунгти: «Вастса аф ащемась – тя эряфсь».
Се повозь эстокиге няеви, што пенсионерхне общениянь Центраса аф посетительхть, синь тяса главнайхть. Сиянь кизонь ломаттненди тяса ётафневихть «Социальный туризм» программать коряс экскурсият, психолог мархта релаксациянь сеанст, библиотекаса налхксихть шахматаса и шашкаса, корхнихть лувф произведениятнень колга и азонкшнихть творческяй мувксснон колга. Тястоконь поэтессась Светлана Фадейкина лувозень Артём Здуновонди эсь валморонзон. Мордовиянь Оцюнясь азс Светлананьди мяль сувафтомс творчестванц, художественнай фильмань тиемас, конатнень лагса тяниень пингть покодихть Мордовияса.
Ульсь китькстаф, што поколениянь соткснень кирдемс пенсионерхне кочксихть школаса тонафнихненди патриотическяй воспитаниять колга урокс. Эрявикс направлениясь - пенсионерхнень компьютернай и финансовай содамашиснон касфтомасна. Спикеркс выступандайхть правоохранительнай органонь сотрудникне, банковскяй сферань и Саранскяень наукань и техникань Кудонь покодихне.
Артём Здунов китькстазе, што тя Центрась – сире поколениянь ломаттненди досугонь тиемань социальнай миссиянь пяк цебярь кепотькс.
Мордовия Республикань Оцюнять пресс-службац