23 апрельста Саранскяйса ушедсь каземань фестивальсь – сон ётафтови #МЫВМЕСТЕ Всероссийскяй акциять рамканзон эса. Фестивальть васенце тевоц – пуроптомс марс вийхнень и панжадоста явомс возможносттнень проектть озадонь седихть аф ащи участниконзон ёткса. Ляфтатасаськ, што благотворительнай тя мероприятиять ётафтоманц колга мяльть ширенц кирдезе Россиянь Президентсь Владимир Путин «Россия – страна возможностей» платформать наблюдательнай советонц заседанияса.
Мордовиянь Оцюнясь Артём Здунов фестивальть панжеманцты сась аф шавонь кятть – усксь Ялгань идень кудонь шабатненди книгат, налхкшт, корма кудфтома животнайхненди.
«Сембонди оцю спасиба, што Очижи православнай праздниконь каршеня кочкавоме тяса, - мярьгсь республикать руководителец. - Мордовиясь – тя возможностень и фкя-фкянди лездомань регион. Эрти эздонк ули кода тиемс путкс пара тевти. Фестивальть вельде можна лездомс сятненди, кинди тя тяни эряви сембода пяк».
Фестивальса работась мялень салай лама площадка. Кепотьксонди, «Зеленый мир» идень экологическяй организациясь няфтсь экологическяй просвещениять мархта сотф несколька проект. Эздост фкясь - «Добрые крышечки». Зеленомировецне кочксихть пластиковай сюлекань панкст, конат прважсевихть региональнай партнерть - «Ремондис» компаниять мархта - переработкас, а получаф средстватнень макссесазь инвалиттненди лезксонди.
«Сембоц кочкаме 600 малава килограмма, - азондозе «Зелёный мир» ДЭО-ть руководителенц заместителец Наталья Казабаранова. – Шарьхкодьсасть, конашка тя объемсь, кда фкя панкскять сталмоц 70 грамма? Получаф сембе ярмаксь карьхцяви ограниченнай возможность мархта ломаттненди лезксонди–инвалиднай коляскань рамамс».
Фестивальса ульсь кода аф аньцек тиемс эсь путксцень благотворительностень тевти, но и тонадомс лама эрявиксти. Тяса ётафневсть мялень салай мастер-класст.
«Волонтеры-медики» Всероссийскяй общественнай движениять Мордовия Республикаса координатороц Валерия Кислова работас коре ялганзон мархта няфнезе, кепотьксонди, кода маштозь нолямс тевс скандинавскяй якаманди инвентарть. Тяда башка, фестивальть рамканзон эса тифтольхть площадкат шра лангонь футболть, пирьфонь налхксематнень, зоотерапиять, буккросинкть и лия направлениятнень коряс. Сембось салсезе и иттнень, и оцюфнень мяльснон.
#МЫВМЕСТЕ каземань фестивальсь моли 1 майть самс.
Мордовия Республикань Оцюнять Пресс-службац