Мордовия Республикань Конституцияв сувафтфт полафкст: Госсобраниять тяни ули полномочияц Мордовия Республикань Счетнай палатань Председателень полафтыень должности путомать и валхтомать коряс.
Фкя вайгяльса примафт полафкст Мордовия Республикань «О транспортном налоге» Законтти, конат токсесазь лама идь мархта и идь-инвалид мархта семьятнень. Транспортнай средствань мощностьсь, конань лангс макссеви льготась транспортнай налогть коряс тяфтама семьяса шачфтыхнень эзда фкяти тяни касфтови 200 а.в. молемс. Тяфта жа лядонды транспортнай налогть коряс льготань получандамась шавф специальнай военнай операцияса участникнень семьяснонды.
Правительственнай частть потмоса выступандась Мордовияса предпринимательхнень праваснон араламаснон коряс Уполномоченнайсь Елена Юрченкова. Сон азсь мяль примамс Мордовия Республикань Закон «О семейном предпринимательстве» и поладомс «предприниматель» Мордовиянь покоди династиянь колга Положениять, а тяфта жа ваномс возможностть максомс предпринимательхнень праваснон коряс Уполномоченнайти законодательнай инициативань права.
Сессиять шумордамста Мордовиянь Оцюнясь Артём Здунов пшкядсь депутататтненди, тердезень эрязста участвовандамс населениять мархта покодемаса республикаса сетьмешинь максома кизефкснень коряс. Тяфта жа азф мяль ётафтомс нормативнай базань мониторинг и кда кармай эрявома пшкядемс Государственнай Думав миграционнай законадательстваса шава вастонь топафтомань цельть мархта.
«Минь должны грамотнайста вятемс контрольть мигрантонь потокть мельге. Аф лоткафтомс, а именна контролировандамс, содамс, кие ширезнок сашенды, кодама цель мельге. Минь карматама макссема работадательхненди рекомендацият лия странаста сафнень покодема сявомста, тернема экспертт рузонь кяльть, минь культураньконь и лия эрявикс ширетнень содамаснон ваномс. Сяка пингть школава тонафнихне должны ётафнемс «Разговоры о важном», национальнай или религиознай кизефксснень видеса аф кельмонь апак сувафтт. Эсь кепотьксонеконь мархта минь должны тонафтомс иднеконь маштома явфтома цебярть аф цебярть эзда», - мярьгсь регионтть Оцюняц.
Ульсть ванфт и лия кизефксне