«Стакачись, конань марто мон сынь, пек умонь, республикань Прявтонь таркасонть тынк коллегатне эзизь вите сонзэ. Вырыпаево велень эрицятне сермадсть коллективной пшкадема ды энялдыть явомс покш мель те кинть лангс. Тосо эйкакшт, сыре ломанть, Ромоданованть видьс а пачкодят, седеяк стака пиземе шкасто. 2012 иестэнть саезь мон сермадан пшкадемат, ансяк мезеяк апак тее. Ютынь весе инстанциятнень. Республикань икелень Прявтось алтакшнось, 2019 иенть самс кись ули строязь, сон теде кортась Культурань кудосонть, ков пурнавкшность малав тежа ломанть. Секскак энялдтано тынк витемс стакачитнень, конат кадовсть икелень руководительтнень мельга», – мерсь Андрей Филиппов.
Мордовиянь Прявтось алтась явомс покш мель Ромодановань енксонь эрицятнень пшкадеманть лангс. Эрявикс кармавтомат максозь Правительствантень.
«Эряви совавтомс полавтомат проектэнь-сметань документациянтень ды мейле кундамс важодемантень, ярмакт эряви анокстамс республикань китнень фондсонть», – мерсь Артём Здунов.
Кода пачтясь васенце вице-премьерэсь Игорь Фрейдин, экспертизань заключениясь улезэ анок сы иень эйзюрковсто, секскак витнемань тевтнес кундыть строямонь шканть ушодовомсто, сексня кись улезэ анок.
Андрей Филиппов энялдсь республикань руководителенть истя жо лездамс теемс Давыдовонь курованть кинь почодоманть. «Единой Россиянь» региононь отделениясь, ков сон пшкадекшнэсь, лездась рамамс шлаконь шебень. «Станислав Викторович Тиньгаев вадрясто лездась те кевкстеманть коряс, сюкпря сонензэ. Ансяк ней эряви строямонь техника кинть валакавтомс», – толковизе Андрей Филиппов.
Мордовиянь Прявтось кармавтсь региононь Транспортонь ды китнень хозяйствань Госкомитетэнтень саемс кевкстеманть ванновт алов. Госкомитетэнь председателесь Валерий Кандрин алтась кучомс техника Вырыпаево велентень маласо таргонть перть.
Вастовомасонть Андрей Филиппов истя жо евтась талномат Инсар леень экологиянь коряс «ежодонзо». Республикань Прявтось евтась мель кортамс неть кевкстематнень Вирень, охотничьей хозяйствань ды природопользованиянь министерствань ды Росприроднадзоронь представительтнень марто. Министрантень Адель Галиуллиннэнь кармавтозь вастовомс яволявтомань каицянть марто.
Мордовия Республикань Прявтонь пресс-службась