Мордовиядо

1930 иень якшамковонь 10-це чистэ ВЦИК-нь Президиумось примась постановления Мордовиянь автономной областенть теемадонзо.

1930 иень якшамковсто саезь ютазь шкась невтизе, автономиянь максомась седеяк пек сюлмизе эрзянь-мошконь раськенть Россиянь ламо раськень семиянть марто ды панжсь лия ёнов а молиця возможностть культурань койтнень-кирдатнень ванстомаст ды республикасонть эриця весе раськетнень потенциалост вевгавтомаст туртов.

Мордовия Республикань Прявтось Артём Алексеевич Здунов

Тёжат иетнень перть эрзянь-мокшонь раськенть уцясказо кеместэ сюлмавозь Россиянть уцясканзо марто. Кезэрень шкатнестэ саезь сон ульнесь виев кода ратной тевтнесэ, истя жо сокицянь-видицянь тевдеемасонть ды промыслатнесэ. Минь кирдтянок мельсэнек сеть содавикс ломантнень, кинь уцяскаст кеместэ сюлмавозь минек ёнксонть марто, кинь лемест сырнень буквасо сёрмадозь минек масторонь ды республикань историянтень. Сынст девизэст свал ульнесь истямо: «Ансяк икелев! Ансяк Изнямо!» 

Тешксэв, минек республикань 90 иетнень тешкстынек Ине Отечественной войнасо Изнямонь 75 иетнень топодемань иестэнть. Сеть кежей иетнестэ Мордовиянь эрицятне невтизь покш патриотизмаст ды эсь прянь а ванстомаст, долгонь ёжост ды героизмаст. Республикасонть теезельть воинской зярыя покш подразделеният, сынст ютксо 326-це Рославльской стрелковой дивизиясь. Минек ёнкссо чачозь 100 тёжадо ламо ломантне казезь боевой орденсэ ды медальсэ, 109-нь максозь Советской Союзонь Героень лемесь, 25-тне кармасть Славань орденэнь пешксе кавалерэкс. 

Мордовиянь автономиянь иетнестэ путозь юр минек республикань социально-экономической потенциалонть кемекстамонтень. Мордовиясо панжозь промышленной покш предприятият, транспортонь сюлмот, велень хозяйствасонть саезь рекордонь норовт. Прявт ёнксокс кармась валдонь источниктнень, кабелень продукциянь нолдамось. «Арепливир» препаратось, конась анокстазь ды нолдазь Саранскоень «Биохимик» предприятиясонть, совавтозь васенце лекарстватнень юткс, конат нолдавить тевс КОВИДэнть лецямсто. Эрязасто виевгадсть микроэлектроникась ды приборостроениясь. Мордовиясь кармась масторонь силовой полупроводникень техникань ды светотехникань промышленностень производствань куншкакурокс, республикань прявтошось теевсь тонавтнемань ды наукань покш куншкакурокс. 

Минек республикась свал явовсь ламо конфессиятнень ютксо чарькодемасонть ды ламо раськетнень ютксо ялгаксчисэнть. Обществасонть вейке-вейкень чарькодеманть изнямосонть ламосо лезды Рузонь Православной Церькованть, традиционной весе религиятнень представительтнень марто вейсэнь важодемась. Покш мель минь явтанок весероссиянь гражданской идентичностень кемекстамосонть эрзянь-мокшонь раськенть таликантень, эрзянь ды мокшонь кельтнень, раськень культуранть ды койтнень-кирдатнень ванстомантень ды сюпалгавтомантень, республиканть финнэнь-угрань сообществанть марто сюлмотнень келейгавтомантень. 

Мордовиянь неень шкань историясонть башка тарка саи Россиянь Федерациянь Президентэсь В.В.Путин. Сон ламоксть сакшнось минек республикав, вадрясто содасынзе Мордовиясо молиця тевтнень, свал лезды тенек. Самай сонзэ лезксэнзэ вельде республикасонть топавтозь виевгавтомань покш программатне. 


Вейсэ Россиянть марто, вейсэ – Россия!

Эрзянь-мокшонь раськенть историязо ламо ёнксонь ды сюпав, сон кеместэ сюлмавозь Россиянть историянзо марто. Ламо пингетнень перть эрзятне ды   мокшотне минек масторсонть эриця лия раськетнень марто вейсэ лопань-лопань тейсть сонзэ историянть, печтясть стака варчамотнень ды сайсть ине изнявкст. Текень марто, эрзятнень ды мокшотнень, кода лия раськетненьгак, эсест сюпав историяст, сынь теить покш путовкс Россиянь государстванть кемекстамонтень ды виензамонтень. 

Эрзятнеде-мокшотнеде историянь васенце тешксэсь кандови минек эрань VI пингентень. Византиянь епископось Иордан «О происхождении и деянии готов» важодевкссэнзэ эрзятнень ды мокшотнень ёвтынзе сеть плематнень ютксо, кить пандсть каявкс готонь инязоронтень Германарихнень. Эсензэ юрсонзо этнонимесь кандови иранонь-скифень кельтненень. Мордовиянь этносонь субэтносокс аштить эрзятне ды мокшотне.

Эштё 16-це пингестэнть саезь Мордовиянь эрицятне вейсэ рузонь казактнень марто ванстасть Россиянь юго-восточной границятнень, ульнесть Россиянь государстванть кемекстамосо. 

Республикань сехте кезэрень ошось, Темниковась, теезь 1536 иестэ. Сон ульнесь эсензэ лувсо нежедемань пунктокс. Тестэ государень ломантне, ледницятне, казактне, служивой татартнэ келейгавтсть Россиянь державань границятнень. Те кандови эрямонь лия содавикс таркатнененьгак – Саранскоентень, Инсаронтень, Атемаронтень ды лиятненень. Республикань прявтошось – Саранскоесь – теезь 1641 иестэ.  

2.jpg

1612 иестэнть, се шастонть, зярдо раськень ополчениянь прявт вийтне олякстомсть минек государствань прявтошонть, тесэ, неень шкань Мордовиянь таркасонть, сонзэ эрицятне аштесть Россиянь рубежтнень ванстомасо. Кочевниктне бажасть совавтомс аразьчис Нижегородской модатнень, штобу мейле каявомс кутьмерьс ополчениянтень. Самай сестэ Мордовиянь Баюш Разгильдеев князесь эсензэ войсканзо марто яжизе ногаень орданть Чукал веленть ало, конась ней ашти Покш Игнатовань ёнкссо. 

Эрзятне-мокшотне лия раськтнень марто вейсэ ульнесть ополчениясонть. Эрзянь ды мокшонь велетне, кода кортыть историянь се шкань источниктне, модань тягловой (податной) эрьва пельксстэнть пурнасть ополчениянть туртов кавтонь-кавто четверть пинеме ды целковоень-целковой тикшенть кисэ.

крае.jpg

1612 иень тевтне невтить, ниле пингетнеде икеле весе масторонть туртов стака шкастонть эрицятне невтизь гражданской вейкетьксчинть, саизь эсест лангс масторонть уцясканзо кис ответственностенть, ванстызь сонзэ яжамодонть-каладомадонть. 

Мордовиянь эрицятнень туртов пек малавикс апак изняво адмиралось Федор Ушаков, Мордовиянть менельсэ ванстыцязо. Эрямонь меельце 8 иетнень сон ютавтынзе эрзянь-мокшонь моданть лангсо, Алексеевка велесэнть эсензэ кудоюртсо. Эсензэ ярмаконзо лангс панжсь Темниковасо госпиталь, ламо лездась 1812 иень Отечественной войнанть шкасто. Ушаков кармавтсь калмамс прянзо Санаксарсо.

erzya_1.jpg

Эрзянь-мокшонь раськенть государственностень теевемась кандови 1920-1940 иетненень. 1928 иень медьковсто теезель Мордовиянь национальной округось Саранск ошсо куншкакуронть марто. 

1930 иень якшамковонь 10-це чись – башка чи Мордовиянть историясо. Те чистэнть ВЦИК-нь Президиумонть постановлениянзо коряс Мордовиянь округось теезель Мордовиянь автономной областекс. Истя эрзятнень-мокшотнень, минек масторонь сехте покш раськетнестэ вейкенть, кармась Россиянь Федерациянть юрсо эсест автономияст. Те макссь виев эскелькс тесэ эриця раськетнень кельтнень, культуратнень ды койтнень виевгавтомантень, путсь юр неень шкань социально-экономической инфраструктурань теемантень, сайсь покш талика Мордовиянь государственностень кемекстамосонть. 

erzya_5.jpg

1934 иень ацамковонь 20-це чистэ автономной областесь теезель Мордовиянь Автономной Советской Социалистической Республикакс. 

Ине Отечественной войнась кармась Россиянь историясо аволь ансяк зыянов, истя жо героической шкакс. Гитлерэнь Германиянть яжамонтень лия раськетнень марто вейсэ покш путовкс тейсть Мордовиянь ломантне. Военкоматсто повесткатнень апак учо, сядот ды сядот ломанть ютасть призывень пунктнес энялдома марто кучомс сынст фронтов.

Отечествань доблестной ванстыцятнень ютксо минек ёнкссо чачозь 246 тёжадо ламо ломанть, конатне весе фронтнэсэ тюрематнесэ невтизь пряст апелиця воинэкс. Мордовиясо чачозетнень ютксто 110 тёжадо ламотне казезь боевой орденсэ ды медальсэ, 124 ломантненень, кинь уцяскаст кеместэ сюлмавозь минек республиканть марто, максозь Советской Союзонь Героень лемесь, 31 – Славань орденэнь пешксе кавалерт. Мордовиясо чачозь 134 тёжадо ламот ломантне эзть велявто кудов тюремань паксятнестэ.  

1950-1970-це иетнестэ путозь кеме юр минек республикань социально-экономической потенциалонтень. Самай те шкастонть саезь Мордовиясо панжозь промышленной покш предприятият. Прявт отраслякс кармась валдонь источниктнень, кабелень продукциянть, силовой полупроводниковой прибортнэнь ды сынст юрсо преобразовательной техниканть нолдамось. Эрязасто виевгадсть микроэлектроникась ды приборостроениясь. Республикань прявтошось теевсь тонавтнемань ды наукань покш куншкакурокс. 

Региононь историясо прявт тевекс кармась 1957 иестэ Огаревонь лемсэ Мордовиянь государственной университетэнть теемась.

1959 иестэ Саранскойсэ панжозь Лодыгинэнь лемсэ валдонь источниктнень Весесоюзонь научно-исследовательской институтось, истя жо силовой электроникань НИИ-сь. Сынст арсевкстнэ-панжоматне теизь Мордовиянть масторонть силовой полупроводниковой техникань ды светотехникань промышленностень куншкакурокс. 

1994 иень якшамковсто Верховной Советэнь сессиясонть примазь закон региононть Мордовия Республикакс лемдемадонзо. 

2007 иень кизна Саранскойсэ ютавтовсь «Шумбрат, Финно-Угрия!» Раськеютконь I фестивалесь, ков сакшность Россиянь, Венгриянь ды Финляндиянть прявттнэ, истя жо масторлангонть келес финнэнь-угрань раськетнень представительтне. 

2012 иень умарьковсто Саранскойсэ ютавтовсть кенярксчинь мероприятият, конат алтавсть Эрзянь-мокшонь раськенть Россиянь государственностень лия раськетнень марто вейсэндявомань тёжа иетненень. Те кенярксчинь прявт смустесь – тешкстамс Россиянь раськетнень вейкень-вейкень чарькодемань, вейкетьксчинь, ялгаксчинь башка смустенть. Кенярксчитнесэ ульнесть РФ-нь Президентэсь В.В. Путин, Московонь ды весе Русень Патриархось Кирилл, весе масторонть келес содавикс лия ломантне. 

2012 иень таштамковонь 29-це чистэ Саранскоесь ёвтазь 2018 иень Футболонь коряс масторлангонь чемпионатонь матчтнень анокстыця-ютавтыця оштнень ютксо. Те шкастонть саезь республикасонть ушодовсь мундиалентень покш анокстамось, конась официальна тешкстазь историясо сехте вадрякс. 

2018 иесь – Мордовиянть историясо лиятнень ёнов а молиця ие. Те историянь покш тев, конась полавтызе республикань экономиканть, социальной ёнксонть, эрицятнень менталитетэст. Саранскойсэ налксесть Перунь ды Даниянь, Колумбиянь ды Япониянь, Португалиянь ды Иранонь, Тунисэнь ды Панамань сборнойтне. 

Саранскойсэ Масторлангонь чемпионатось истя жо тешкстазель государственной исторической содавтомасонть: Колумбиянь ды Япониянь сборнойтнень матчонтень сакшнось Япониянь принцессась Хисако Такамадо, Япониянь футболонь ассоциациянь почетной председетелесь. Те 102 иетнень перть Япониянь императорской семиянть Россияв васенце самозо. 

2019 иень аштемковсто «Мордовия Арена» стадионсонть васенцеде налксесь Россиянь футболонь коряс сборноесь. Вастовомась прядовсь рекордонь счетсонть - 9:0 Станислав Черчесовонь подопечнойтнень лезэс. Официальной ловоматнень коряс, матчонтень сакшнось 42 241 ваныця, те истя жо рекодонь невтевкс. 

2021 иень даволковонь прядовомсто Мордовияв велявтсь республикасонть спортонь сехте вечкевикс видтнэстэ вейкесь – эень спидвеесь. Мордовиянь Прявтонь тевтнень топавтыцянть Артём Здуновонь ушодксонзо вельде Саранскойсэ ютавтовсть эенть лангсо мотогонкатнень показательной невтематне. Те велявтомась – кеняркс эрьванть туртов, кие кирди мельсэнзэ, кода икеле вечкевсь спортонь те видэсь. Бути теить од условият, Мордовиянь мотогонщиктне, паряк, одс кармить сехте виевть планетанть лангсо!

Мордовиянь ломантненень ули мезень кисэ кирдемс каштанчи. Ютазь шкань изнямотне – сы шкань изнямотнень кеме юрось. 

panorama_sar.jpg

Мордовиянь эрицятне Россиянь социумсонть

Эрзянь-мокшонь раськесь Россиянь сехте кезэрень раськетнестэ вейкесь. Сонзэ историясь ашти этносонь касомань-кепетемань вадря невтемакс, конась тёжадо ламо иеть эри Россиясо ды эзизе ёмавто этнической чачонзо, келензэ ды культуранзо. IX-X пингетнестэ саезь эрзянь-мокшонь раськесь ульнесь Россиянь государственностень теемасонть, сонзэ ванстомасо ды виевгавтомасо. Эрзятне ды мокшотне «эзть ёма» лия раськетнень ютксо, совасть Россиянть, сонзэ ламо раськень эрицятнень юрс ды ванстызь эсь пряст.

X пингенть ушодовомсто Древнерусской государствань юрсо ушодовсь эрзянь-мокшонь раськенть славянтнэнь марто сюлмотнень ладямось. XI-XIII пингетнестэ неть сюлмотне виевгадсть, теевсь экономикань ды культурань вейкине пространства, конась сезевсь феодалонь явшемасонть ды монголтнэнь каявомасонть. Эрзянь-мокшонь раськетнень ды рузонь княжестватнень политико-государственной сюлмотнень седе тов кемекстамось мольсь Сырнень Орданть каршо вейсэнь бороцямонь шкастонть. XIV-XV пингетнестэ Московонть перька вейсэндявоманть вельде мольсь Рузонь государстванть кемекстамось. Эрзянь-мокшонь раськень покш пельксэсь вейсэндявомань процессэнть ушодовомсто совась Московонь княжествань юронтень. XV пингень 80-це иетнестэ те процессэсь прядовсь эрзянь-мокшонь раськенть Рузонь централизованной государствантень совамосо.

Эрзятне ды мокшотне рузтнэнь марто вейсэ тейсть путовкс социальной од идентичностенть, этнической отношениятнень, од ландшафтнэнь, региононь хозяйстванть ды материальной культуранть чачомантень.

Кезэрень раськесь сайсь башка тарка Россиянь историясонть. Эрзятне ды мокшотне кеместэ сюлмизь уцяскаст сеть раськетнень марто, конат эрить минек масторсонть. 


Мордовиянь ломантне

Мордовиясо покш мель явови содавикс ломантненень, кинь уцяскаст сюлмавозь минек ёнксонть марто. Мордовиясто ундоксонзо Весе Русень Патриархонть Никононь. Минек моданть лангсо топавтсь тевензэ содавикс святоесь, духовной арсицясь Серафим Саровский. Мордовиянть марто кеместэ сюлмавозь Россиянь содавикс истят цёратнень лемест, кода святойтнень юткс совавтозесь Россиянь моряктнень покровителесь адмиралось Федор Ушаков, полководецэсь Петр Румянцев, поэтэсь Александр Полежаев, историкесь Василий Ключевский, просветительтне Макар Евсевьев ды Захар Дорофеев, Филатовтнень врачонь династиясь, содавикс морыцясь Лидия Русланова, татаронь поэтэсь Хади Такташ. 

Минек масторонть историяс сырнень буквасо сёрмадозь истят покш военачальниктнень лемест кода армиянь генералось Максим Пуркаев, генерал-полковниктне Иван Болдин, Сергей Горюнов, Советской Союзонь маршалось Сергей Ахромеев. Ромодановань ёнкссо чачсть летчикесь Михаил Вельдяскин ды генерал-лейтенантось Петр Ляпин, сондензэ эсь мемуартнэсэ вадрясто сёрмадсь Изнямонь маршалось Георгий Жуков. Чаунза ёнксонь Покш Ремезенки велесэ чачозесь Анатолий Кильдюшов ульнесь 1945 иестэ Якстере площадьсэ Изнямонь парадсонть. Сеттнень ютксо, кить снимасть фронтонть, ульнесь кинооператорось Владимир Сущинский. «Разгром немецких войск под Москвой» советской лентантень, ков совасть минек ёнкссо чачозенть кадратне, максозь «Оскар» содавикс кинопремиясь.

Мордовия Республикань Почётонь граждантнэнь ютксо - Советской Союзонь Героесь летчикесь-истребителесь Михаил Девятаев, Россиянь Героесь летчикесь-космонавтось Владимир Дежуров, Советской Союзонь Героесь генерал-полковникесь Николай Антошкин, Весе Русень Патриархтне Кирилл ды Алексий, академикесь Евгений Каблов, МХАТонь руководителесь Олег Табаков ды ламо лия содавикс ломанть, конат башка шкатнестэ славасть Мордовиянть ды минек ине Россиянть. 1898 иестэ чугункань кинь строямосо лездамонть кисэ «Почетный гражданин Саранска» лемесь максозь рузонь государственной деятелентень Сергей Витте графонтень.

Ташто Шайговань ёнкссонь Ташто Акшинасо раськень кудоюртсонть куватьс эрясь поэтэсь ды философось Николай Огарев. Сонзэ лемензэ кандтни Национальной исследовательской Мордовиянь государственной университетэсь. 1945-1969 иетнестэ вузсонть тонавсь рузонь содавикс мыслителесь Михаил Бахтин. 

2013 иестэнть эсь мельдензэ получамс Саранскоень прописка яволявтсь французонь актерось Жерар Депардье. Ельникень ёнкссо чачсь Россиянь кинодеятелесь Николай Бородачев, Орданьбуень ёнкссо – актрисась Ия Репина. Мордовиянь артистэсь Вячеслав Акашкин 1970-це иетнестэ налксесь вейсэ Иннокентий Смоктуновскиень ды Людмила Касаткинань марто. Оперань морыцянть Илларион Яушевень лементь кандтни Саранскойсэ театрась, композиторонть Леонтий Кирюковонь – музыкань училищась. Ташто Шайговань ёнкссто – композиторось Георгий Сураев-Королев ды минек республикань гимнань музыкань авторось Нина Кошелева. 

Мордовиясь кирди каштанчи скульпторонть Степан Эрьзянь теевкстнэнь кувалма. Сон важодсь Италиясо ды Франциясо, ламо иеть эрясь Аргентинасо. 1950 иестэ велявсть Советской Союзов, косо важодсь куломазонзо 1959 иес. Калмазь Саранскойсэ Мемориальной калмазырьсэнть. Скульпторонть лемензэ канднить художественной зярыя музейть, Московсо ды Мордовиянь прявтошсо куротне.

Ковылкинань ёнкссо чачсь артыцясь Федот Сычков. Мордовиянь артыцятнень юткс совить Виктор Беднов, Степан Коротков, Анатолий Баргов, Петр Рябов, Александр ды Владимир Шадринтнэ, Игорь Сидельников ды лиятне.

Мордовиянь модась сюпав шкинемав ломантнесэ. Тесэ чачсть масторлангонь келес содавикс морыцясь Иван Скобцов, республикань культурань заслуженной деятелесь Владимир Ромашкин, артисткатне Нина Маркова, Нина Спиркина, Людмила Ганина, Александра Куликова, Мария Антонова...

Мордовиянь содавикс сёрмадейтне Кузьма Абрамов, Никул Эркай, Яков Пинясов, Михаил Безбородов, Илья Кривошеев, Анатолий Эскин ды лиятне. Кочкуровань ёнкссо чачсь сказительницась Фекла Беззубова. 

Покш Березникень модась макссь масторонтень ученойть-физикть - Радий Илькаевень ды Анатолий Астайкинэнь. Косогоры велесь дипломатонть, чрезвычайной ды полномочной посолонть Валерий Кеняйкинэнь чачома тарказо. Инсаронь ёнксонть марто сюлмавозть отечественной сейсмологиянь ушодыцятнестэ вейкесь Александр Орлов, советской содавикс ученоесь, государственной ды общественной деятелесь Петр Антропов. Краснослободской ёнкссо чачсь рузонь просветителесь, путешественникесь ды археологось Петр Севостьянов, Рузаевкасо – военной гидрографось Дмитрий Алашеев, конань лемезэ максозь Антарктидасо заливентень, истя жо советской партийной руководителесь, дипломатось Яков Рябов.

Советской государственной деятеленть Евгений Веселовскиень лезксэнзэ вельде Саранскойсэ ушодозь промышленной ды гражданской строямось. Покш путовкс Мордовиянь прявтошонь чачонть теевемантень путсь содавикс архитекторось Сергей Левков.

Мордовиянь ёнксонть неень шкань тонавтнемань ушодыцякс кармась Иван Воронин – учёноесь-литературоведэсь, сёрмадеесь ды общественной деятелесь. Сонзэ лемензэ кандтни музеень-архивень комплексэсь. Республикасонть наукань ды высшей образованиянь покш организаторокс мереви лемдемс Григорий Меркушкинэнь ды Александр Сухаревень.

Мордовиясь кирди каштанчи тесэ чачозь содавикс спортсментнэнь кувалма. Те олимпийской чемпионтнэ – чиицясь Пётр Болотников, хоккеистэсь Иван Трегубов, гимнасттнэ Алексей Немов, Светлана Хоркина, бороцицясь Алексей Мишин ды лиятне. Минек региононть марто кеместэ сюлмавозь советской хоккеистэсь ды футболистэсь, тренерэсь Виктор Шувалов, Россиянь заслуженной тренертнэ Константин Кокурин ды Леонид Аркаев, боксёрось Олег Маскаев. Теньгушева ёнксонь Шокша велень эрицятне кирдить каштанчи содавикс земляконть, НХЛ-нь тештенть, Россиянь хоккеень коряс сборноень лидерэнть Александр Овечкинэнь кувалма.

Те малавгак аволь весе содавикс лемтне, конатнень марто вейсэ аштить эрзятне, мокшотне, рузтнэ ды лия раськень ломантне, мезесь невти Россиянь ды сонзэ пелькскенть – Мордовиянть – историянь вейкетьксчинть.