Сюбаевтненень сэнь уштомапелесь истя жо сась догазификациянь программанть коряс. Семиясь эри од кудосонть 2019 иестэ саезь, колмо иетнень перть ушсть уголиясо.
«Миненек пек лездасть райононь администрациясо, толковизь, кода пурнамс документтнэнь, кона программантень ули седе вадря теемс яволявтоманть, - евтни азоравась. - Минек куросонть ней ули аволь ансяк газопровод, истя жо асфальтонь ки. Программанть вельде кудос газонть ветямс ютавтозь аволь ламо ярмакт».
«Икеле миненек савкшнось пачкодемс кудонть видьс внедорожниксэ. Ней кись пек вадря! Покш сюкпря тень кисэ», – кирдизе нинзэ Ильдар Сюбаев.
Ильдар ды Зульфия кастыть кавто эйкакшт – кавксоце классо тонавтницясь Риян ды ветеце классо тонавтницясь Диляра. Церынькась яки Технопарков, тейтерькась – Весероссиянь музыкань пелькстамонь участница. Артём Здунов энялдсь тейтерьканть невтемс инжетненень, конатнень ютксо ульнесь Саранскоень ды Мордовиянь митрополитэсь Зиновий, пианинасо налксемань ерокчинзэ. Чайде симемстэ кортасть рузонь ды татаронь раськетнень койтнеде-кирдатнеде, кельтнень, семиянь питнейчитнень ванстомань эрявиксчиденть, эйкакштнень кастомадост-превс путомадост. Семиясь каванинзе инжетнень татаронь раськень ярсамопельсэ – перемячадо.
Мордовиянь Прявтось тешкстызе: «Истямо ярсамопель мереви варчамс ансяк татаронь семиясо. Весемесь стряпазь эсест кедьсэ, ойме марто».
Од иень кенярксчитнень каршо инжетне истя жо састь аволь чаво кедь марто: эйкакштненень – ламбамо казнеть, фруктат, тетянтень-авантень – кудонть туртов казнеть.
Региононь руководителесь истя жо ваннызе поселкасонть од кинть. 3,4 вайгельбеть асфальт ацазь Еникеевень ды Темниковской куротнева. Те топавтозь «Комплексное развитие сельских территорий» федеральной проектэнть вельде. Те важодеманть арсеви поладомс – асфальт ацави Луговой, Аграрной, Изнямонь 70 иень, Салимовонь, Усмановонь, Заречной, Мариновонь, Западной куротнева. Те эште малав 9 вайгельбеть.
«Тедеде минь явинек райононть виевгавтомс 500 миллионт целковойть, истя жо китнень строямс. Сы шкантень те енксонть коряс покш арсемат. Догазификациянь программась кармась вадря лезксэкс эрицятнень туртов – ломантненень а сави ютавтомс покш ярмакт семиянь бюджетстэ кудов газонть ветямс. Ней масторонь Президентэсь кемекстась решения – карматано ветямо социальной учреждениятнень ды промышленной предприятиятнень догазификациянть. Те пек эряви минек промышленностенть ды велень хозяйстванть кастоманть-кепетеманть туртов», – тешкстызе Мордовиянь Прявтось.
Мордовия Республикань Прявтонь пресс-службась