Беларусь Республикась – минек региононь прявт партнертнэнь ютксо вейкесь – вейсэнь тевдеемась ладязь экономикань ды социальной сферань малав весе енкстнэнь коряс. Мордовиясь ды Белоруссиясь важодить микшнемань-экономической, научно-технической ды культурань вейсэнь тевдеемань коряс вейсладямонть лувсо, конась тешкстазь 2017 иестэ.
Тедеде кемекстазь 2023-2025 иетнес дорожной картась. Сонзэ коряс, васняяк, виевгавтовить сюлмотне промышленной ды велень хозяйствань предприятиятнень ютксо.
Беларусь Республикасо улемстэ минек делегациянть туртов анокстазь деловой покш программа: масторонь руководстванть марто важодемань вастовомат, вейсэнь тевдеемань коряс важодемань группань промкст, промышленной прявт предприятиятнень, воинской славань таркатнень ды культурань объекттнэнь ванномась.
Мордовия Республикань Прявтонь пресс-службась